لسه مع حرب العقول.. وحلقة اعتراضية برا سياق الحلقات.. في شباب شفناهم ثائرين أيام يناير.. بينما عمرهم صغير في سن المراهقة.. وبتسأل نفسك.. هم شافوا ظلم أو قمع أو غيره يثوروا عليه؟ الحقيقة أيوه.. أنا متفهم موقفكم تماماً.
متفهم أنك في يوم من الأيام ربما شفت والدك راقد بيحتضر من مرض.. زي إصابة فيروس سي.. ومش عارف يتعالج.. وشفت والدتك بتستلف علشانه فيعطيها من يعطيها ويهينها من يهينها.. وكنت بتروح تجيب عيش يوميا وتقف في طابور طوله كيلومتر.. يضيع وقتك فترجع ماتلحقش تذاكر فتروح المدرسة تصطدم بمدرس معندوش ضمير بيقرفك عشان تاخد درس.. وانتوا ممعاكوش فلوس الدرس.
بتمشي للمدرسة نفسها في المطر والبرد.. محتاج جزمة ومش عارف تشتري واحدة.. أخوك الصغير محتاج لبن ومفيش.. أخوك الكبير مش عارف يشتغل في وظيفة عامة ما بسبب "الواسطة".. ومش عارف يشتغل في القطاع الخاص بسبب أن ممعاهوش "توصية Recommendation".. اللي هي واسطة برضه عادي.. بس اسمها شيك.. مش حياخدوه إلا لو كان متميز بزيادة.. وظروفه ماتسمحش بدا.. لا في انترنت يدرس ولا كتب يقرا ولا اي شيء.
ماعرفش يتجوز زميلته اللي بيحبها عشان أهلها فضلوا شاب ثري من عيلة.. أختك أو والدتك بتشتغل بائعة في محل بسيط وصاحب المحل بيأذيها نفسيًا والزباين تتنطط عليها وأنت مش عارف تعمل أي شيء.
كتير ماعرفتوش تكملوا الشهر.. كتير وانت طفل اتحرمت من أشياء في إيد الأطفال التانيين.. كتير شفت والدك مقهور من الدين أو العوز.. ويمكن تكون شفته بيبكي.. عرفت انك حتتخرج ومش حتدرس الدراسة اللي بتحبها وتطلع "طيار" لأن معهد الطيران رسومه بالآلاف.. ولا حتبقى ربان بحري لأن الأكاديمية شرحه.. وعرفت إنك مش حتعرف تتجوز بسهولة.
خمنت إنك طول حياتك حتعيش في ضيق زي أهلك وتبقى متوتر عنيف طول الوقت.. عايش في ضغط عصبي طول حياتك، عشان تظفر بكام رغيف.
فبالتالي حتى وأنت شاب صغير كان عندك اللي يخليك تثور لما تحين اللحظة.
أنت اتحطيت غصب عنك موقف إنك فرصة ذهبية لأي حد يستغل طاقة الغضب اللي جواك.
بس الناس اللي تصدت لك برضه كانت معذورة. تخيل إن في ثعبان سام قاتل في البيت وانت واهلك خايفين منه.. فأنا جيت وقعدت أهتف علي باب بيتك ليل نهار.. ومانع الدخول والخروج.. وبعدين جبت صندوق أزايز وقود وحولتها قنابل مولوتوف، وبدأت أرميها على بيتكم عشان أتخلص من الثعبان دا.. إيه حيكون رد فعلك؟
طبعًا مش منطقي تسكت لي.. وأنا بحرقك انت وأهلك جيرانك أحياء عشان اتخلص من ثعبان. خصوصًا لو أنا رافض أي نقاش أو تعقل.. وشايف نفسي بس اللي صح والباقي "عبيد جهلة".
مع إن أنا عندي طاقة ممكن تستغل كويس وتخلي البيت نضيف من غير ثعابين.. وأحسن بيت في الحي.. بس باستخدمها خطأ.
أنا فاهم تمامًا اللي أنت اتعرضت له.. وبتحاول تغيره.. بس في سبيل إنك تغيره.. مشيت في سكة غلط.. مش حتوديك للي انت عايزه.
كأنك بالضبط عايز تطلع طبيب، فرحت تدرس في معهد اللاسلكي! أو عايز تطلع موسيقار.. فدخلت كلية زراعة.. أنت عارف أنت عايز إيه.. بس بتمشي في طريق خطأ.. مش حيوصلك للي أنت عايزه.
فكر في الكلمتين دول.. وقيسهم بالمنطق.. واسأل نفسك.. ليه أنت الوحيد اللي بتكره بلدك وتتمنى زوالها.. وهو شيء مابيتمناهوش متسول في الهند مبتور الأطراف بينام جوار الكلاب في مقلب قمامة.. ظروفه أبشع منك آلاف المرات.
مين اللي بيملا عقلك بالكراهية والحقد والظلام دول.. وبيظلمك.. وأنت أصلا اتظلمت طول عمرك؟
ملا عقلك بالكراهية وخلط المفاهيم دول إزاي أصلا؟
مين اللي فهمك إنه من الصح إنك تستخدم وسائل التواصل والتكنولوجيا في إنك تحرض علي خراب بلدك أو تنشر الكراهية أو الإشاعات وتسفه من وطنك.. بدل ما تحاول تعرف معلومة جديدة أوتدرس وتاخد كورس مجاني وتعوض اللي فاتك وتعيش حياة افضل؟
إزاي الحرب دي شنت على عقلك اليقظ البكر بكل قدراته.. وقررت تحرمه من حقوقه في إنه يكون افضل.. وتمسخ مفاهيمه للدرجة المروعة دي.. فيبقى الإرهابي وطني.. ورجل الأمن بلطجي؟
ومين قال إن الناس اللي في الصور دي "قدوة".. وللا عايزة فعلا وطن افضل.. وللا بيحاولوا يقدموا لك شيء يفيدك في حياتك؟
معلش إزاي شايف إن "الكوميكس" حتخليك مثقف.. وإن الألش والنكتة البذيئة والتهريج بألفاظ فاضحة اللي ماليين حياتك وصفحتك وراسك حيخلوك تشتغل في شركة عبر دولية مثلا؟
نوقف كتابة.. و توقف قراءة للحد دا وتفكر.. ياريت.. خد وقتك وإدي نفسك فرصة للتفكير. يا ترى اللي بعمله دا صح؟ أحرق البيت كله.. عشان في حاجة مش عجباني؟
الطرق اللي دخلولك منها كتير.. والحلول كتير.. حنتكلم عنها بالتدريج.. وبعدما تقف ثواني مع نفسك.. يبقى لحديثنا بقية.