النصر على الأرض مابيتحققش إلا بالانتصار في حرب العقول. ففي العام 1940، بتكون الحرب العالمية الثانية في أوجها، و"هتلر" بيوقع بالموافقة على خطة اسمها "الخطة أوتو Plan Otto".
وفي 22 يونيو، سنة 1941، بيرتكب "هتلر" غلطة العمر، فبيطلع الخطة "أوتو" من الأدراج وبينطلق في تنفيذها.. تحت الاسم الشفري "عملية بارباروسا Operation Barbarossa".
بيوحد كل قوات الجيش فيما عرف باسم "قوة الدفاع Wehrmacht".. وبينقض بما يقرب من خمسة مليون جندي على الاتحاد السوفيتي، اللي كان على الحياد في الحرب، وفيه معاهدة عدم اعتداء بينه وبين ألمانيا.
وعلى جبهة قارب طولها ثلاثة آلاف كيلومتر.. بيدفع "هتلر" قوات الجيش والبحرية وسلاح الجو.. وحتى برجال قوات النخبة المسلحة المسماة "قوات العاصفة Waffen-SS".
ولأنها كانت خيانة مفاجأة للاتحاد السوفيتي.. فالضربات كانت موجعة، وبتنسحب القوات السوفيتية، وبيحتل "هتلر" مناطق في غاية الحساسية، ذات أهمية اقتصادية.. زي أوكرانيا.. وبينجح هجوم دول المحور على الاتحاد السوفيتي نجاح ساحق.
بس دا وقع "هتلر" مع واحد مع أذكى العقول وواحد من أبرع القادة العسكريين في التاريخ.
"ستالين Joseph Vissarionovich Stalin".. اللي في الصورة دا.
الصورة دي بالمناسبة من مقال مهم جدًا من جريدة مصرية.. سابت كل الحقبة دي.. وتاريخ "ستالين" بالكامل.. واتكلمت عن "شنبات يقف عليها التاريخ".. دا عنوان المقال بالحرف.. حتى كتبوا العنوان لغويًا غلط.. "عليها" مش "عندها".
ما علينا.. ربنا يتولانا برحمته.. المهم أن "ستالين" دا كان رجل عادي.. بدأ حياته كعامل في مصفاة بترول.. وسلك طريق السياسة رويدًا رويدًا، لحد ما بقى محرر صحفي لجريد "البرافدا".. لحد ما بيوصل لمنصب سكرتير الحزب الشيوعي.. ومنه لرئاسة الحزب.. لرئاسة الاتحاد السوفيتي كله.
وكانت أوروبا بتلقب "ستالين" بـ"الرجل الحديدي man of steel".. كان ناشط سياسي في شبابه.. وبيتظاهر ويعارض النظام.. فكان عارف تأثير دا على الدولة وقت البناء.. وبالتالي كان بيعدم أي حد يعارض النظام أو يقف ضد الدولة.. وفي بعض التقديرات بتقول أنه أعدم أكتر من 20 مليون شخص.
رغم ذلك، "ستالين" النهاردة في روسيا بطل قومي.. ويعتبر عندهم بمثابة "محمد علي" عندنا.. الرجل الذي أسس روسيا الحديثة.
المهم أن "هتلر" بالعملية "بارباروسا" حط قوات المحور كلها في مواجهة مع "جوزيف ستالين".
وكانت "قوات الدفاع" الألمانية أقوى قوات مسلحة في العالم وقتها عددًا وعتادًا وعدة.. بس "ستالين" بيتحرك ويحشد الجيش ويجمع قواته.. كان مدرك تمامًا أنه صعب يهجم لأنه مهزوم واحتلت أجزاء من أرضه بالفعل.. وخصمه قوي جدًا.. بس علي الأقل يحاول يبرع في الموقف اللي اتفرض عليه.. موقف الدفاع.
لكن "ستالين" بيتفاجيء بأنه قوات المحور فضلت تتقدم.. وقوات الاتحاد السوفيتي بتنهزم وتستسلم وتنحسب أحيانًا بدون قتال.
وبيراجع "ستالين" الموقف كله.. وبيتكشف كان ارتكب غلطة كبرى، إبان وصوله لرئاسة الحزب، مكانتش في حسبانه ومكانش عارف أنه حيكون لها التأثير دا كله.
"ستالين" لما وصل للحزب الشيوعي.. أعلن إلحاده على الملأ.. وسفه من الأديان السماوية وهاجمها.. ولأن الاتحاد السوفيتي كانت أغلبيته مسيحية مع أقلية مسلمة.. فالاتنين ماعجبهمش الهجوم دا.. بدأوا يرد عليه.. فبدأ يعتقل ويعدم ويغلق الكنائس والمساجد.
الحقيقة أن دا أثر على معنويات الجنود الروس.. فكرة أن في "قوة عليا" بتحميهم وتباركهم.. فكرة أن في "جنة" و"خلود" مابقتش موجودة.. بالتالي فقدوا جزء كبير جدًا من حافز القتال. أموت ليه؟
أما الجنود اللي كتموا إيمانهم في قلوبهم.. فلأن ستالين كان متطرف في إلحاده.. فبالتالي خلق تطرف مضاد.. جعلهم متشددين دينيًا.. وناسيين فكرة الوطن.. وكل اللي في أعماقهم أن ستالين كافر.. ماينفعش نحارب في صفه.. ولربما أرسل الله النازيين عقابًا للاتحاد السوفيتي.. عشان سمحوا بإهانة كتبه ورسله وتعاليمه.
كارثة وقت الحرب.. ضيعت أرضي سوفيتية كتير.. وكادت تفكك القوات المسلحة.
ولأن النصر دايمًا مابيكونش لقطعان الحمير اللي بتصر على الخطأ.. "ستالين" بيقرر يتدارك غلطته.. وبيثني على الأديان.. وبيعيد فتح الكنائس ويخرج رجال الدين من السجون ويطلب منهم العون.. وبيشرع في إعادة إحياء الخطاب الديني لأذهان الناس.
بس على ما دا بدأ يعمل تأثير.. كانت ألمانيا اتقدمت كتير جدًا جوا أرض الاتحاد السوفيتي.. وكبدت "ستالين" خسائر فادحة.
"ستالين" كان عارف أن النصر مش للأكثر قوة.. لأنها مش مناطحة بين زوج من الثيران في زريبة.. النصر دايما بيكون من نصيب اللي ينتصر في حرب العقول.
ولأنه مثقف ودارس تاريخ كويس.. بيبدأ "ستالين" يحارب القوات النازية بأسلوب قديم.. كانت اتبعته روسيا ضد نابليون بونابرت نفسه، لما حاول يغزوها سنة 1812.
ولأن دا لوحده مش حينفع.. بيمزج "ستالين" دا بأسلوب مبتكر.. ابتدعه قدماء المصريين في حربهم ضد الفرس، وتلقفه منهم اليونانيين سنة 513 قبل الميلاد.
والمزيج المدهش دا نتكلم عنه لاحقًا.. ويبقى للحديث بقية.
----------------
منشورات سابقة:
----------------
1 - http://bit.ly/2tPfbS9
2 - rebrand.ly/37eb4
3 - https://bit.ly/2Caxcie
4 - http://bit.ly/2SWHWX0
5 - http://bit.ly/2TzjHmZ
6 - http://bit.ly/2CmhzV8
7 - http://bit.ly/2UCzTAr