شفنا سوا حروب الجيل الأول.. ووقفنا نتفرج علي التشكل الإسبرطي "الفلنكس The phalanx" و حضرنا المعركة اللي حارب فيها الـ300 زي الشياطين، و التضحية العظمي اللي عملوها.. اللي يحب يرجع للكلام دا يلاقيه في أول لينك من المراجع...
حروب الجيل الثاني اختلفت شوية.. لأن التكنولوجي دخلت الموضوع.. بقى فيها أسلحة بتقتل عن بعد، و أكثر دقة و خطورة من السهام.. دخلت "الأسلحة النارية Breech-loading weapon" للساحة.. و اتغير معاها الموقف بالتدريج...
الحرب دي امتازت بأنها - بالرغم من إنها حافظت علي صفوف الجنود - .. إلا إنهم بقى لهم حرية الحركة و إطلاق النار.. دخلها كمان العنصر الإستخباراتي.. و لو إن دور المخابرات وقتها كان لا يتعدي الإستطلاع...
زي حروب الجيل الأول، حروب الجيل الثاني كان فيها العامل النفسي مهم جدا.. "الحرب النفسية Psychological warfare".. أو زي ما قال "نابوليون بونابارت Napoleon Bonaparte":
"الحروب تنحسم في صدور الرجال قبل أن تنحسم في ميادين القتال"...
من أمثلة حروب الجيل الثاني "الحروب النابوليونية Napoleonic Wars" و"الحرب العالمية الأولى WWI" و "حرب البوير Boer War".. و لأن الأمثلة علي الحروب دي كتير.. نتأرجح النهاردة بين الحرب العالمية الأولى و حرب البوير..
لأن التكنولوجيا كانت محدودة.. فكانت الحروب دي بتعتمد علي القوة النيرانية الضخمة.. يعني قذيفة مدفع مثلا.. ممكن متبقاش دقيقة أوي.. بس بتحدث ضرر عظيم.. أو صفوف جنود تطلق النار في إتجاه صفوف العدو بلا تصويب دقيق...
الحرب النفسية للمرة الأولى فرضت نفسها بقوة و عنف كعلم حقيقي في الحرب العالمية الأولى.. و كان الألمان بيربطوا منشورات في مناطيد صغيرة بتسقط بعد فترة خلف خطوط العدو.. فيها رسائل من طراز "إخلع يا دفعة".. "زوجتك في انتظارك.. لماذا تموت".. إلخ..
و بعدين بدأ الألمان يرموا المنشورات دي من الطائرات و تبعهم البريطانيين.. في حرب نفسية غير مسبوقة تستند لأسس علمية لأول مرة في التاريخ...
بالمناسبة.. البريطانيين كانوا غير راغبين في موضوع الحرب النفسية ده و مش مصدقينه.. لحد ما أقنعهم واحد اسمه لورد "ألفريد هارمسوورث Alfred Charles William Harmsworth".. و فكرهم بالهزيمة اللي كادت بريطانيا تنالها في "حرب البوير" علي إيد أحد أبطالها "دانيال ثيرون Daniel Theron" اللي حانتكلم عنه كمان شوية...
و بالمناسبة برضه الأخ "ألفريد" هو مؤسس جريدة "الديلي ميل The Daily Mail" البريطانية.. اللي معاليك بتنشر منها أخبار عن بلدك النهاردة.....!
الديلي ميل .. نسيتوها؟ اللي قالت إن مبارك له في البنوك سبعين مليار دولار.. و اللي بتتابع أخبار باسم يوسف و بتروج له كأنه شطر الذرة.. و اللي لمعت البرادعي و غيره.. و اللي قالت إن في طيار بريطاني بطيارة مدنية في سينا ناور صاروخ أطلقته داعش....!
كان "ألفريد" شاطر في مجال البروباجاندا، فبدأ حملة دعائية رهيبة و كتب بنفسه منشورات اترمت علي الجنود الألمان كان لها مفعول السحر.. لدرجة إن الجنرال الألماني "إريك لوديندورف Erich Ludendorff" بعد الحرب قال بالحرف:
"لقد كان جنودنا يفكرون بالضبط كما يريد العدو و يبدون في الميدان شاردين خائفين، كالفأر الذي يحاصره ثعبان في جحر"...
خد بالك لحد اللحظة دي إحنا بنتكلم عن حرب "جيل ثاني".. صحيح في حرب نفسية.. بس جايالك من العدو.. اللي أنت عارف إنه عدو.. اللي بتقابله برضه في الميدان وجها لوجه...
حرب البوير كانت بين بريطانيا وجمهوريتي البوير؛ جمهورية جنوب أفريقيا (الترانسفال) وجمهورية البرتقال الحرة...
من أبطال الحرب دي واحد اسمه "دانيال ثيرون Daniel Theron".. اللي في الصورة دا..
"دانيال ثيرون" كان له وحدة خاصة بيه.. كان اسمها "وحدة إستطلاع ثيرون Theron se Verkenningskorps" أو "Theron Reconnaissance Corps"...
"دانيال" إستعمل الحرب النفسية.. بس محاولش يأثر بيها في معنويات البريطانيين.. أثر بيها بس في معنويات وحدته.. كان دايما يحفزهم و يشجعهم علي القتال بأساليب مبتكرة.. و يحتفي بالجندي القوي المتميز.. طبق أساليب "حرب العصابات Guerrilla warfare".. حرب العصابات حرب بتطول بالنسبة لأي جيش نظامي.. خصوصا إنك مش عارف اللي بتحاربه دا مدني و للا مقاتل.. معاك و للا ضدك.. بالإضافة إلي إن جيش البوير كان فيه كتير مش أفارقة داكني البشرة.. لا.. كان في ناس أوروبيين و بالذات هولنديين كانوا اتولدوا و عاشوا في الأراضي دي و تصدوا للبريطانيين...
"دانيال" طبق خطط جديدة في الهجوم الخاطف.. و بقى ينسحب بأقل خسائر و يتوقع موطيء قدم الإنجليز و يهاجمهم قبل ما يعسكروا.. و هم لسه قاطعين مسافة و منهكين و بينصبوا معسكراتهم.. لدرجة إن القائد العسكري البريطاني "لورد روبرتس Lord Roberts" قال عنه: "هو أقوى شوكة في ظهر البريطانيين تمنعهم من الإنتصار"...
لورد روبرتس كان حاطط مكافأة 1000 جنيه سترليني علي راس "دانيا" حيا أو ميتا.. و أطلق قوات من 4000 جندي للظفر به.. و ماعرفش يوصل له مطلقا...
كان "دانيال" بيضرب بيه المثل في الشجاعة عند البوير، مكانش مجرد مقاتل.. إتحول إلي أسطورة شعبية.. زي أدهم الشرقاوي و يوسف العظمة و عمر المختار.. و غيرهم..
أحيان كتير كان بيرفض إنه يرسل أحد أفراد قوته للاستطلاع.. و بيستطلع أو يهجم منفرد.. دا طبعا مايفهموش برضه "مناضلي الكيبورد".. و دا اللي أدى إلي وفاته...
ففي 5 سبتمبر سنة 1900، تقدمت القوات الإنجليزية.. و كانت مرهقة من سير طويل.. و بعدما نصبت معسكرها أرسلت "سرية عسكرية Company" من سبع أفراد تستطلع و تأمن حوالين المعسكر..
و في الظلام و بهدوء و خفة.. علّق "دانيال" بندقيته علي كتفه و استني للحظة معينة و بعدين انقض علي السرية بخنجره.. قتل منهم 6 في سرعة لكن الجندي الأخير رفع بندقيته علي "دانيال" من مسافة كبيرة.. مما اضطر دانيال انه يسحب بندقيته بدوره و يطلق عليه النار..
قتل كل أفراد السرية بس صوت الرصاصة وصل للمعسكر الإنجليزي.. و فتحت القوات الإنجليزية النار علي البقعة اللي سمعوا منها الرصاصة عشوائيا.. و قتلت "دانيال ثيرون"..
خبر وفاته كان بداية النهاية لقوات البوير.. اللي حسوا بالهزيمة فعليا "في قلوبهم".. قبل ما ينهزموا علي الأرض.. و قال عنه القائد "دي وي General de Wet ":
"إذا اقتصر الأمر علي الشجاعة أو الشعبية فالرجال كثيرين و قد أجد ذلك بينهم.. لكن أين يمكن أن أجد رجلاً آخر يجمع كل هذه المهارات و الفضائل Men as lovable or as valiant there might be, but where shall I find a man who combined so many virtues and good qualities in one person" ؟
الهزيمة النفسية دي كانت بداية النصر البريطاني اللي تم بالفعل بعد عامين فحسب من وفاة "دانيال" في 31 مايو سنة 1902..
دا نموذج لحرب من حروب الجيل الثاني.. سلاح خفيف.. تكنولوجيا محدودة.. أكمنة.. حروب عصابات.. حروب نفسية...
دا يختلف عن حروب الجيل الثالث اللي نتكلم عنها لاحقاً بإذن الله.. و يكون للحديث بقية...
----------
مراجع
----------
1 - https://goo.gl/dJ6ojg
2 - Collins, Ross F. ed. World War I: Primary Documents on Events from 1914 to 1919 (Greenwood Press, 2008).
3 - Farwell, Byron (1989), The Great War in Africa, 1914–1918, W.W. Norton.
4 - Thomas Pakenham, page 571 The Boer War.
5 - Military History Journal, Vol 11 No 3/4 (October, 1999).
6 - Fransjohan Pretorius, 'The Experience of the Bitter-Ender Boer,' in The Boer War',' ed. by John Gooch (London: Cass, 2000), p.179.
7 - Maurice, John Frederick; Maurice Harold Grant (1907). History of the War in South Africa, 1899-1902. London: Hurst and Blackett. .
8 - Caldwell, Theodore C. (1965). The Anglo-Boer War: Why was it fought? Who was responsible?.