أصدقاء كتير بعتت تسألني الفترة اللي فاتت عن موقعة "ثرموبيلاي Battle of Thermopylae" اللي وقعت سنة 480 قبل الميلاد.. و ناس كانت فاكرة فيلم "ثلاثمائة 300" مجرد أسطورة أو عمل سينمائي مش مبني علي قصة حقيقية.. و طلبوا عن الموضوع معلومات وثائقية أكتر..
لقيت دي فرصة نتكلم عن أجيال الحروب بالمرة بتفصيل أكبر بما إن ناس كتير بتتكلم عن حروب الجيل الرابع.. و "ياتري في جيل أول و ثاني و ثالث؟" و شكلهم إيه...
"معركة ثرموبيلاي" من حروب الجيل الأول بامتياز.. طريقة نطق "ثرموبيلاي Thermopylae" في أول مرجع للي يحب يعرفها...
زي ما اتعودنا علي الصفحة دي مبنتكلمش عن شيء علمي إلا و يكون موزون قدر الإمكان بالكلمة.. عشان كده قلنا من حروب الجيل الأول "بامتياز".. مش من حروب الجيل الأول و خلاص...
حرب الجيل الأول هي الحرب اللي بيقف فيها "الرجال" بمعنى الكلمة في أي بقعة علي سطح الأرض عبر التاريخ، لصد عدوان عن أرضهم أو دفاعاً عن أعراضهم و ممتلكاتهم.. فكرة المواجهة "رجل لرجل".. و احترام قواعد الهدنة و قانون البلد الأم...
"الإسبرطيين Spartans" كانوا أساتذة في حروب الجيل الأول.. المواجهة المباشرة.. كانوا أساتذة لدرجة إن استعمال القوس و السهم، اللي بيرمي العدو من مسافة - في عرفهم شيء مخجل و نوع من الجبن و عدم الرجولة...
في حروب الجيل الأول مفاهيم زي "رجل" و "شرف" و "كرامة" و "حرية" مش بتتمسخ معانيها.. بتحمل معانيها الأصلية الراقية كفضائل عظمي.. في إسبرطة كان في 3 بس من حقهم يظفروا بقبر محفور عليه اسمهم بمنتهي الفخر: 1 - الملك؛ 2 - جندي مات في معركة؛ 3 - و أم ماتت أثناء الوضع...
دول بس اللي من حقهم التكريم.. طيب ليه الأم الي ماتت في أثناء الولادة مكرمة لدرجة زي دي؟ لأنها ماتت و هي بتقدم لإسبرطة ابن جديد.. بتمنح للدولة مقاتل...
النساء في إسبرطة كانوا مكرمين تكريم عظيم.. الست كانت متساوية مع الرجل في الحقوق و الواجبات و ممكن تحمل السلاح معاه و تقاتل دفاعا عن الأرض..
الطفل أول ما بيتولد بيتفحص.. لو قوي سليم.. مبروك لأهله.. بيعيش لحد خمس سنين و بعدين يلتحق بمدرسة عسكرية.. لو ضعيف أو مشوه او فيه نقص.. بيترمي في سفح "جبل تايجتوس Taygetus" تفترسه الحيوانات.. كنا اتكلمنا قبل كده بإيجاز عن الموضوع دا في بوست سابق موجود في تاني مرجع...
القصة إن الفرس قرروا يغزوا اليونان - و كانت دويلات مفككة - من ضمنها اسبرطة..
الأصدقاء بتسأل "إزاي 300 يتصدوا لمليون؟".. الحقيقة دا مذكور في مواقع كتير.. صحيح في ناس قالت "600 ألف".. و ناس قالت "ربع مليون.. لكن إللي وصلنا من اقرب مرجع للمعركة.. المؤرخ "هيرودوت Herodotus" بالحرف..إنه "إسبرطة Sparta".. خرجت بـ300 جندي تقابل مليون جندي فارسي...
يجوز الرقم مبالغ فيه بس مش حيكون مبالغ فيه جدا.. لأنهم لو 300 راحوا يتصدوا لألف و للا ألفين.. فهي مش معجزة مذهلة لدرجة إنها تتحول لملحمة و توصلنا من قبل الميلاد...
الممر الجبلي اللي سده الإسبرطيين "ثرموبيلاي Thermopylae" بيتسمي كمان "البوابات الساخنة The hot gates".. لأن في عيون طبيعية حارة في المنطقة دي...
في حرب الجيل الأول بيكون في "عامل نفسي".. أو ما يسمى بـ"الحرب النفسية Psychological warfare - PSYWAR".. بس تأثيرة بيظهر أكتر في الحروب الحديثة...
خرج ملك إسبرطة "ليونايدس King Leonidas" معاه الحرس الخاص بتاعه.. 300 جندي بس.. لأن مجلس شورى إسبرطة رفض يخرج يحارب الفرس و هم في الطريق.. و سد الـ300 ممر البوابات الساخنة..
تشكيل الإسبرطيين كان اسمه "التشكيل السلامي The phalanx" أو "الفلنكس".. تشكيل عسكري مربّع.. الكلمة مالهاش أصل عربي و متعربة إلي "سلامي" بمعني "مصطف كسلاميات الأصابع"...
زي ما هو واضح في أول و تاني صورة.. الفلنكس، كان غابة من الحراب و الدروع...
الدروع في "الفلنكس" كانت حروفها بتتسند علي بعض، فتبقي عاملة زي حراشف الثعبان.. اختراقها بيبقي تقريبا شبه مستحيل...
وقت ما يتقذفوا بالسهام كان الإسبرطيين بيتخذوا تشكيل اسمه "تشكيل السلحفاة Turtle formation".. دا واضح في تالت و رابع صورة...
قوة الفلنكس كانت بتكمن في نقطة واحدة.. الإتحاد..
كان التشكيل بيحارب كأنه وحدة واحدة.. و تتبدل الصفوف.. الصف الأمامي بيصد و يدفع بالدروع.. و الصف الخلفي بيضرب بالرمح.. و بعدين يتقدم و يحمي بالدروع و الصف اللي وراه يضرب بالرمح من فوق.. و هكذا...
حروب الجيل الأول بتعتمد علي تسليح الجندي و كفاءته القتالية و حسن تدريبه.. دا طبعا كان ملعب الإسبرطيين.. بخلاف إنهم مدربين منذ نعومة أظفارهم.. فهم كانوا تشكيلات "مشاة ثقيلة heavy infantry".. دروعهم مزيج من النحاس و البرونز و الحديد، و من الداخل مصنوعة من خشب البلوط ووزنها 18 كيلوجرام.. كان الجندي بيلبس خوذة تقيلة بتبين عينيه و أنفه بس.. ساعديه و ساقيه متغطيين بالبرونز و شايل رمح و سيف...
رمح الإسبرطي كان ثقيل و مصنوع من خشب لا يطفو في الماء.. وزنه 12 كيلوجرام تقريبا و له حد معدني أمامي و حد خلفي.. و السيف كان وزنه 8 كيلوجرامات تقريبا.. قصير لكن قاتل...
طبعا عشان الجندي يشيل مجموع الوزن دا كله و في نفس الوقت يتحرك و يقاتل و ينحني و يتفادي و ينطلق.. كان هو نفسه لازم يبقي قوي للغاية.. بالدروع و السلاح اللي شايله، كان جندي مشاة إسبرطة عبارة عن دبابة بشرية حية...
علي العكس كان الفرس مشاة خفيفة.. مسلحة بسيف و رمح و درع خشب.. تشكيل الإسبرطيين كان حوالي 6 أو 7 صفوف.. سدين ممر البوابات الساخنة الضيق.. و بيستقبلوا أفواج الفرس صف صف..
طبعا حروب الجيل الأول مايعرفهاش المخنثين و لا النشطاء الثوريين و لا يعرفها بالتأكيد فرقة "إخلع يا دفعة" و لا ثوار و مجاهدي "الكيبورد" و لا أي حد من المشهورين "فلفيس" اللي بيستخبوا ورا الشاشات و لما بيشوفوا برص بيبلوا كراسيهم و هم قاعدين..
مابيعرفهاش و يقدرها و يعرف يتعامل فيها إلا الرجال بمعنى الكلمة.. مش الذكور...
فضلت المواجهة كده.. جيش الفرس كان فيه "رجال" كتير.. بس الأسبرطيين مكانوش "رجال" و بس.. كانوا "رجال مقاتلون".. و في فرق شاسع بين الإتنين لو تعلمون...
شجاعة الـ300 و انتصاراتهم المذهلة.. خلت 7100 من أهالي اليونان.. من أركاديا و أثينا و غيرهم.. حدادين و صناع و حرفيين.. يشيلوا سلاح و ينضموا للإسبرطيين..
الإسبرطيين حطوا الجماعة دول في ضهرهم.. خط دفاع أخير لو اتهزموا.. و ماشتركوش في المعركة بشكل حقيقي مطلقا.. كل الحمل كان علي الـ300 إسبرطي..
ملك الفرس لقى تدريب الإسبرطيين عالي.. فدفع بحرسه الخاص "الخالدون The Immortals".. أقوي تشكيل عسكري في آسيا كلها..
برضه مواجهة مباشرة.. بس للأسف.. زي ماقلنا الإسبرطيين كانوا أساتذة في حرب الجيل الأول.. فسقط من "الخالدون The Immortals" حوالي 10 آلاف مقاتل.. و سقط 30 من الإسبرطيين.. و دا خلى قوات الفرس تنسحب مؤقتا...
احتار الفرس مع كتيبة الـ300.. مش عارفين يهزموهم و لا يخترقوهم و لا يعدوا من الممر.. فراح للفرس واحد يوناني اسمه "إيفيالتيس Ephialtes of Trachis".. و كان راغب في مكسب سريع.. مجهود بدون تعب زي الإخوة بتوع السوق السودا.. فراح باع أهل بلده.. و دل الفرس علي طريق خلفي يقدروا يطوقوا الإسبرطيين عبره...
"إيفيالتيس Ephialtes" اسم علم.. اسم بني آدم.. بس بسبب الواقعة دي اتحول في اللغة اليونانية و بقى معناه "كابوس".. و أحيانا بيطلق علي أي خائن.. "إيفيالتيس Ephialtes".. زي ما انت مثلا تلاقي واحد مش مفهوم له هو عايز ايه و تقوله "أنت مالك شبه أبو الفتوح كده النهاردة".. أو تشتم واحد و تقوله "يللا يا برادعي"...
المهم حصل التطويق.. الفرس بدأوا طوقوا الـ300 إسبرطي من الخلف و الأمام.. قبل ما يتم التطويق بالكامل..
هنا بياخد ملك إسبرطة قرار خطير للغاية.. التضحية العظمى.. اللي برضه لا يقدرها و لا يفهمها إلا رجل..
ملك إسبرطة جمع اليونانيين اللي في المؤخرة.. الـ7100 جندي.. و طلب منهم يرجعوا لليونان.. و يبلغوا أهلها إن "ليونايدس" و رجاله الـ 300 حيموتوا من أجل إن محدش يقول إن قوات إسبرطة انسحبت.. و لا إستسلمت و لا هربت من قتال.. حيموتوا عشان مايحبطوش روح جنود اليونان المعنوية.. و حيموتوا طبقا لقانون إسبرطة، اللي بينص علي إن المقاتل الإسبرطي لا يأسر و لا ينسحب.. ينتصر أو يموت..
مرت وثيقة جلدية بين الـ300 جندي.. كل واحد فيهم كتب عليها اسمه بمنتهي الفخر.. عشان توصل اليونان و يتعمل لهم "شواهد قبور" رمزية عليها اسمهم.. باعتبارهم ماتوا كما ينبغي أن يموت الرجال...
بينسحب اليونانيين.. و بيفضل الإسبرطيين.. و بيراقبوا قوات حرس ملك الفرس و هي بتطوقهم.. و بيتقدم منهم رسول فارسي علي جواد من مسافة آمنة.. بيطلب منهم الإستسلام..
مفيش خيار.. الإستسلام أو الموت.. بتفاجأ قوات الفرس بالرد عن طريق رمح طاير من بعيد.. من وسط التشكيل.. بيخترق قلب رسول الفرس و يسقطه من فوق حصانه.. دا الرد.. الإسبرطيين اختاروا الموت بشرف.. في الفيلم السينمائي الشهير.. اللقطة دي ظهرت في البداية.. بينما في الواقع هي كانت السطر الأخير في موقعة ثرموبيلاي...
بيهجم الفرس و بيبدأ القتال.. بتحصل مجزرة حقيقية.. الإسبرطيين حتي و هم محاصرين مش لقمة سائغة.. و كل واحد منهم مابيبيعش حياته رخيصة...
أسيبكم مع الفيديو التوضيحي اللي في البوست.. يشرح الموضوع دا بشكل أيسر و أفضل...
بتنتهي المعركة بموت الإسبرطيين حتى آخر رجل.. بس مبتروحش التضحية دي هباء علي الإطلاق.. لأن ""ثيميستوكليس Themistocles" حاكم أثينا لما بيوصله الخبر بيقول عبارته الخالدة "ليونايدس و رجاله لم ينهزموا.. بل إنتصروا إنتصار عظيم".. و بيبدأ يحشد قواته و يوحد اليونان ضد الفرس.. و بينجح...
دي حروب الجيل الأول اللي قوامها المواجهة المباشرة.. رجل لرجل و سيف لسيف.. ملحمة من القتال و الشجاعة و الصمود و الحديد و الدم و النصر و الهزيمة و توقير الجسارة و احترام القانون...
دي تختلف شوية عن حروب الجيل الثاني، اللي نتكلم عنها في بوست لاحق بإذن الله، بمثال برضه من معركة حقيقية من التاريخ..
و للحديث بقية...
--------------
مراجع
--------------
1 - https://www.youtube.com/watch?v=1dwjMN9HhTM
2 - https://goo.gl/bIRnJJ شامل المراجع
3 - Sacks, Kenneth S. (1976). "Herodotus and the Dating of the Battle of Thermopylae". The Classical Quarterly. 26 (2): 232–248
4 - Finley, Moses (1972). "Introduction". Thucydides – History of the Peloponnesian War (translated by Rex Warner). Penguin.
5 - Cartledge, Paul (2006). Thermopylae: The Battle That Changed the World. Woodstock, New York: The Overlook Press.
6 - Lind, William S. (January 15, 2004), "Understanding Fourth Generation War".
7 - Lind, William S.; Nightengale, Keith; Schmitt, John F.; Sutton, Joseph W.; Wilson, Gary I. (October 1989), "The Changing Face of War: Into the Fourth Generation", Marine Corps Gazette, pp. 22–26.
8 - Frost, Frank J. (1980). Plutarch's Themistocles, An Historical Commentary. Princeton University Press.
9 - الفيديو التوضيحي:
https://www.youtube.com/watch?v=8M4w-82iVXs