مع تساقط جواسيس المشروع السري "مانهاتن".. بيقف شعر رأس الأمريكيين.. أمام اسم وحيد.. أحيطت به معلومات خطيرة بحق.
دا لأنه المرة دي.. مكانش اسم لأمريكي، جنده السوفيت، عشان يخدمهم وهو في قلب مشروع مانهاتن.. المشروع الخطير اللي كان هدفه انتاج أول سلاح نووي في تاريخ العالم.
المرة دي كان الاسم مصيبة حقيقية.. لأن الاسم الكودي كان لرجل مخابرات سوفيتي أصًلا.. مارس دور الخلية النائمة، لسنين طويلة.. لحد ما جت اللحظة، اللي اتحرك فيها.. وتسلل إلى قلب مشروع مانهاتن.
رجل الاستخبارات السوفيتي.. صاحب الاسم الكودي "دلمار Delmar".
و"دلمار" مكانش أمريكي واتجند.. كان في الأصل خلية سوفيتية نائمة.
والخلية النائمة دي بيبقى شخص من بلد آخر ولائه الحقيقي لبلده الآخر الأصلي ده.. وبيتزرع في بلد غريب لعشرات السنين.. ويندمج وسط أهله ويفتح بيزنس أو يشتغل عادي جدًا.. ومبيمارسش التجسس قط، حتى لو وقعت أخطر معلومات الكون في حجره مصادفة.. لحد ما بتيجي له الأوامر، فبينشط.. ويتحول من خلية نائمة، لجاسوس يقظ.
والجاسوس صاحب الاسم الكودي "دلمار".. احتار فيه الأمريكيين وماتوصلوش إليه ابدًا.. وبذلوا كل مرتخص وغال عشان يعرفوه.. وجندوا عملائهم في نص كوكب الأرض لأكثر من نصف قرن.. عشان يتوصلوا لهويته.. وماعرفوش يوصلوا إليه قط.
"جورج كوفال George Koval".. اللي عاش في أمريكا طيلة عمره كمواطن مهاجر عادي، بينما هو في الأصل جاسوس سوفيتي.. والتحق بالمدرسة والجامعة عادي خالص، وتألق ونجح، لحد ما بقى عالم مرموق.. واختارته الاستخبارات الأمريكية والأجهزة الأمنية.. كرجل لا غبار عليه.. عشان يلتحق بمشروع مانهاتن.
في فيلم أمريكي اسمه "سولت Salt".. بيوضح قصة الخلية النائمة دي بدقة.
وكان "كوفال" عالم فيزياء، ومهندس كهرباء، وعنده تلتقي كل الخيوط وبين يديه تنتهي، فكان أقيم الجواسيس السوفيتية في مشروع مانهاتن.. وجهوده هي اللي بالفعل، اختصرت الوقت كتير جدًا على السوفيت، عشان يعملوا القنبلة الأولى.
و"كوفال" سرق من الأمريكيين أسرار مكانوش بحلموا في أبشع كوابيسهم أنها تتسرب.. وفضل يجتهد ويعمل في مشروع مانهاتن ويحل مشكلاته ويخدم أمريكا في إخلاص وتفان.. لحد ما أحيل للتقاعد، وأعلن لهم أنه راغب في ان يقضي ايامه الأخيرة في وطنه الأم "روسيا".. فمنحته الحكومة الأمريكية مكافأة هائلة تقديرًا لجهوده، مع تذكرة طيران خاصة فاخرة على حسابهم.. لتقله إلى روسيا...!
وفي روسيا.. التحق "كوفال" بمعهد موسكو للتكنولوجيا الكيميائية في مجال البحث العلمي وعمل كمدرس فيه.. وعاش حياة عادية جدًا.. ماتختلفش عن حياة اي رجل روسي عادي، لحد ما توفاه الله على فراشه في هدوء، في العام 2006.. وعمره 93 سنة.
قصة "ديلمار" وهويته اتعرفت.. وفوجئت بها المخابرات الأمريكية زيي وزيك، في 2007.. لما الرئيس الروسي "فلاديمير بوتين".. أعلن دوره، وأثني عليه.. ومنحه لقب "بطل الاتحاد الروسي Hero of the Russian Federation".. عن خدماته في تلك الفترة...!
المهم أنه في تلك الفترة، ظهر في الوثائق اللي بتتفك شفرتها زي ما قلنا في البوستات اللي فاتت.. جاسوس اسمه الكودي "أليك Alek". وطبعًا مع سقوط الشبكة.. كان مكشوف بالفعل...
"آلان نن ماي Alan Nunn May" بروفسيور كامبريدج الإنجليزي.. ودا كان بيسرق عينات صغيرة للغاية من اليورانيوم - 233 و 235، ويهربها من المشروع.. وكان بيضحي بصحته وحياته بالحركة دي لأن كان بيخفيها في علبة تبغ.. لحد ما يطلع ويسلمها لمندوب آخر للسوفيت.. بيتلقفها في حاوية خاصة. الحركة دي آذت "آلان" جدًا واتسببت له في قروح وأورام، ومشاكل في الدم.. خليته يحتاج نقل دم باستمرار بقية حياته.
"آلان" اعترف في هدوء لما قبضوا عليه.. ورفض أن فعله يتسمى "تجسس".. وقال أنه ضحى بصحته عشان يتمم عمله "النبيل".. وخرج من السجن بسبب حالته الصحية.. وعاش لحد ما مات في 2003 بجلطة في الرئة.
انتهت شبكة تجسس مشروع مانهاتن، بعدة أسماء كودية أخرى، ماتكشفش عنها لحد اللحظة دي ولا اتعرف مين اصحابها.. "جورو"، "جارديان"، "زد"، "بي"، "تاسك"، وغيرهم.
جميع جواسيس المشروع مانهاتن اعترفوا أن سبب تجسسهم مكانش المال - هم معظمهم مكانش محتاجه فعلًا - لكن أنهم يوزنوا القوى في العالم.. وميبقاش السلاح الرهيب دا في يد الولايات المتحدة وحدها.
معضلة عجيبة.. لأن بالفعل لولا أن السوفيت بنوا قنبلتهم الذرية كذلك.. وتوازنت القوى.. الله وحده يعلم كانت الولايات المتحدة عملت ايه في العالم. في خبراء شايفين أن الجواسيس دول ابطال وزنوا القوى العالمية.. منهم أمريكيين على فكرة.. وخبراء شايفين أنهم خونة وعجلوا بنهاية العالم مش العكس.. لأن دلوقتي بقت اي حرب عالمية تعني تدمير الكوكب كله.. بدل انتصار دولة واحدة.
يا ترى إيه رأيك أنت؟
الجواسيس النوويين بتوع المشروع مانهاتن يختلفوا تمامًا عن جاسوس آخر، لقبه السوفيت بـ"العار".. ولقبه الأمريكيين بـ"الجاسوس الذي أنقذ العالم The spy who saved the world".
وقصة الرجل دا تطول.. فنبقى نتكلم عنها لاحقًا.
ويبقى للحديث بقية بإذن الله.
------
- المنشورات السابقة اول تعليق.
- الصورة لبطل الاتحاد الروسي "جورج كوفال".