كوكب مالوش سطح..!
"المشتري Jupiter".. اللي متسمي على اسم كبير الأرباب الإغريقية.. "جوبيتر" أو "زيوس".. رب الصواعق و المطر و الرياح و الغيوم.. كوكب مالوش سطح صلب تقف عليه.. أو تحط عليه معداتك و آلاتك..
دا لأن المشترى كتلة من الغاز...
كتلة هائلة من الغاز و السوائل.. اتكومت في شكل الكورة دي بجاذبية عالية.. مرتين و نص تقريبا الجاذبية بتاعتنا..
و بالرغم من إن الكوكب غازي.. إلا إنهم بيعتقدوا له قلب صلب من الصخر .. اتجمع حواليه هيدروجين و سوائل و غازات أخرى.. عشان تعمل أكبر كوكب في المجموعة الشمسية.. اللي كان زمان ضعف حجمه النهاردة..
و كانت حرارته أعلى بكتير.. فلو حرارة المشترى النهاردة بتوصل إلي 150 درجة تحت الصفر.. فهو كان اكثر حرارة.. و قلبه بيدينا درجة حرارة بتوصل إلي 24 درجة مئوية..
و مع ذلك الكوكب دا بيطرح حرارة أكتر بكتير مما بيستقبل من الشمس..
بيطرح الحرارة بكميات كبيرة.. بتخلي سطحه بارد.. و قلبه ساخن.. و دا بيسبب هبوط في الضغط على سطحه.. و العملية دي اسمها "آلية كلفن هلمهولتز Kelvin–Helmholtz mechanism"..
للمشترى أكبر غلاف جوي في المجموعة الشمسية كلها برضه.. بس لأن الكوكب مالوش سطح.. فهم بيقيسوا ارتفاع الغلاف الجوي من النقطة اللي الضغط بيبقي عندها يساوي 1 بار.. زي الأرض..
و اليوم على المشتري بيساوي عشر ساعات من بتوعنا.. أما السنة على المشترى فبتساوي 12 سنة من بتوعنا...
يعني لو سبت ابنك عنده يوم.. وسافرت و قعدت على المشترى سنتين.. على افتراض إنك حتلاقي طريقة تقعد بيها في الكيان الغازي دا.. ترجع تلاقي ابنك شاب عنده 24 سنة...
و كوكب المشترى له 67 قمر.. أيو "سبعة و ستين" قمر.. بيدوروا في فلكه.. أكبر أربعة فيهم هم اللي اكتشفهم "الموسوعي polymath" الإيطالي "جاليليو جاليلي Galileo Galilei" سنة 1610 ميلادية.. و هم "آيو Io" و "يوروبا Europa" و "جيناميد Ganymede" و "كاليستو Callisto"..
و "جيناميد" دا أكبر قمر فيهم.. أكبر قمر في المظام الشمسي كله.. أكبر حتى من كوكب عطارد...
و المشترى له قطبين.. و اتشاف علي قطبه الشمالي شفق قطبي زي اللي بيحصل عندنا على الأرض..
"زحل Saturn" برضه عملاق غازي زي المشترى.. أقل حجماً منه.. بس برضه كتلة من الغاز...
واخد اسمه من "ساترن" رب الخصوبة والزراعة عند الإغريق.. و هو الكوكب السادس من حيث البعد عن الشمس.. وثاني أكبر كوكب في النظام الشمسي بعد المشتري..
و اليوم على زحل قريب من اليوم على المشتري.. 10 ساعات و 42 دقيقة من بتوعنا.. أما السنة على زحل.. فهي أكبر بكتير.. تساوي 29 سنة من بتوعنا..
يعني بالمثال اللي الناس بتحبه.. لو سافرت و انت عندك تلاتين سنة و قعدت على المشترى سنتين.. و سبت ابنك عنده يوم.. ترجع تلاقي ابنك بعد سنتين.. عنده 60 سنة تقريبا...
و زحل كوكب بارد.. درجة حرارته 178 تحت الصفر.. و زحل له غلاف جوي و في مياه.. بس في صورة متجمدة...
زحل مشهور جدا بإنه حواليه حلقات.. هو الكوكب الوحيد اللي له حلقات ظاهرة مشهور بيها زي الصورة كده.. المشترى برضه حواليه حلقات بس غير مرئية.. غير "حلقات زحل The rings of Saturn"..
و الحلقات دي مياه و جليد ومعادن و جزيئات و شظايا و بقايا نيازك و صخور.. بتجذبها جاذبية زحل.. القريبة من جاذبيتنا جدا.. ماتفرقش عنها إلا زيادة بسيطة.. و بتلف حوالين الكوكب باستمرار..
و زحل زي المشترى.. له أقمار كتير.. 62 قمر.. و لسه في 4 مش متأكدين من وجودهم.. لو ثبت وجودهم يبقوا 66 قمر.. أكبرهم "تيتان Titan"..
و القمر "تيتان" دا غريب شوية.. و أقرب للكوكب منه للقمر.. فبيمتلك غلاف جوي معظمه من النيتروجين زي غلافنا.. و مناخه فيه أمطار و عواصف زينا.. و عليه آثار لبحيرات و أنهار زينا..
شكل النهار عليه جميل لو قدرت تروحه.. زي الصورة كده..
"و تيتان" بارد زي زحل.. درجة حرارته 179 تحت الصفر..
المشترى و زحل و تيتان.. مختلفين عن أورانوس و نبتون و "بلوتو" الغلبان اللي طردوه من القائمة و مابقوش معتبرينه كوكب و دخلوا مكانه "إيريس Eris".. اللي نتكلم عنهم بكرة.. و يبقى لحديثنا ختام..
------------
مراجع:
------------
1 - منشورات سابقة:
- https://goo.gl/H5ttvo
- https://goo.gl/F8BG9o
- https://goo.gl/H5Hihz
- https://goo.gl/g0Yhwk
- https://goo.gl/tb3esD
2 - https://goo.gl/iaAfQf
3 - Hefler, Michael (2001). "Europa: In Depth". NASA, Solar system Exploration. NASA, Jet Propulsion Laboratory