قابلنا هنا على الصفحة المتواضعة دي "أجاثا كريستي" و "بوارو" و "هولمز".. قابلنا "آينشتاين" و "بور" و "فلمنج" و "باستير".. قابلنا "شرودنجر" و قطته.. و قابلنا الـ"300" مقاتل الي شالوا أرواحهم على أكفهم و سدوا ممر "لبوابات الساخنة" أمام ما يقرب من مليون مقاتل من الأعداء..

شفنا حاجات كتير و قرينا حاجات كتير.. لفينا العالم و سافرنا أقصى الأرض.. و آن الأوان نطلع من الأرض إلي القمر...

قمرنا.. اللي بنشوفه في الليل.. و بيتغزل فيه العشاق.. و بيستعين بضوئه الصيادين.. و كان بيجري معانا جنب العربيات و احنا صغيرين ومسافرين على طريق سريع.. البعض شايف إن في ابتسامه مرسومة على وجه القمر.. لسوء الحظ أنا مشفتهاش أبدا.. بحس إن في على وجه القمر تعبير دهشة و ذهول..

القمر.. الساتيلايت اللي بيتبع الأرض و يدور حواليها طول الوقت.. و مالهاش قمر غيره.. بعكس غيرها من الكواكب في مجموعتنا الشمسية..

المجموعة الشمسية دي بتبقي شمس.. حواليها مجموعة كواكب و أقمار حوالين الكواكب بيلفوا في مسار تخيلي اسمه فلك أو "مدار Orbit".. بيبقى اسمها "نظام شمسي Solar system".. و بتبقي جزء من حاجة أكبر اسمها "المجرة Galaxy"...

كلمة "ساتيلايت" على فكرة مش بتعني الأقمار الصناعية بس.. في "ساتيلايت طبيعي natural satellite".. اللي هو القمر.. اللي بيدور في فلك كوكب و بيفضل تابع له طول حياته.. الكلمة أصلها عربي.. كلمة "ساتل" في العربية يعني "تابع".. لأن القمر "تابع" لكوكب الأرض.. مش كوكب بذاته...

القمر دا في مصر القديمة هو "عين حورس Horus".. اللي انتزعها "ست Seth" رب الصحراء أثناء صراعهم.. ارتفعت و تحولت لقمر بيضيء الدنيا بالليل.. قبل ما "تحوت" يعالج "حورس" ويمنحه عين جديدة.. عشان يحافظ على الصراع الأبدي بين الخير و الشر في الوجود...

داخل في حكايات و قصص و أساطير كتير.. مش أولها قصة "حورس".. و لا آخرها أسطورة رجل عادي من ملح الأرض.. بيتحول ذئب لما بيتحول القمر لبدر...

المسافة بين الأرض و القمر 384.400 كيلومتر.. تقدر توصل للقمر في ثانية و نص.. لو انطلقت بسرعة الضوء..

مكانش موجود.. و المفترض إنه اتكون بعد الأرض بشوية.. من حوالي 4 و نص مليار سنة.. لما الأرض اصطدمت بكوكب اسمه "ثيا Theia"..

"ثيا" كان كوكب في حجم المريخ تقريبا.. و يفترض إنه كان بيتمشى في مجموعتنا الشمسية.. بيدور بس مساره منحرف.. فيه ميل و بينحرف باستمرار.. لحد ما اصطدم بالأرض.. اصطدم بالأرض وجها لوجه صدمة رهيبة مروعة.. بس هي كانت أقوى.. مزقته إرباً و حولته لشظايا و قلب "ثيا" اندمج في قلب الأرض.. عشان كده قلب الأرض الساخن بتاعنا أكبر مما يفترض لجسم في حجمها..

اتكون من شظايا التصادم قمرين.. اندمجوا لاحقا و بقوا قمر واحد..

طيب في أقمار تانية غير قمرنا في الدنيا؟ أيوه في و حنوصل لهم بعدين واحد واحد هم و كواكبهم..

جيولوجي القمر زي جيولوجي الأرض.. فيه معادننا.. وعلي سطحة بثور كبيرة كانت في يوم من الأيام بحيرات للحمم على سطحه.. زمان في عصور الديناصورات عندنا كان في براكين بتثور على القمر.. في فرع كامل بيدرس الموضوع دا اسمه "النشاط البركاني على القمر Volcanism on the Moon"...

القمر مفيش عليه بحيرات و لا بحار و لا أنهار.. المياه على سطح القمر ماينفعش تتواجد زي ما هي على صورتها على الأرض لأنها بتتفكك و تتحلل بحاجة اسمها "التفكك الضوئي Photodissociation".. بس في آثار لجليد على سطح القمر.. و يحتمل وجود مياه في العمق..

و لو كانت المياه موجودة في أي مكان.. يحتمل فعلا وجود شكل من أشكال الحياة..

جاذبية سطح القمر 16.6% من جاذبية سطح الأرض.. يعني لو وزنك 100 كيلو جرام و رحت القمر يبقى وزنك 17 كيلو تقريباً..

في غازات على سطح القمر.. طالما له جاذبية يبقي بيجذب الغازات برضه زي أي شيء آخر.. بس الغازات دي ضيئلة للغاية مقارنة بأي كوكب له غلاف جوي زينا.. بالتالي.. علميا بيعتبر القمر بلا غلاف جوي بيحيط به فراغ..

عشاق كتير حلموا يعيشوا على القمر.. وسط النور و الضوء و العزلة و الجمال.. و في إيه أجمل من العزلة مع حبيبك؟

بس انت للأسف ماتقدرش تعمل دا الا في خيالك.. لأنك ماتقدرش تتنفس على القمر عشان مفيش هواء.. ومفيش ضغط جوي.. عشان مفيش غلاف جوي..

بالتالي من غير بدلة الفضاء المعروفة.. تقدر تعيش على القمر 15 ثانية.. بعدها تفقد وعيك من نقص الأكسجين.. حتى مش حتقدر تحبس انفاسك لدقائق زي الأرض.. لأنك حتخضع لاختلاف الضغط عشان مفيش ضغط جوي.. و تتمدد رئتيك رغماً عنك و تتسرب منك سوائل جسمك و تتكون في دمك فقاعات غازية..

و تموت...

بالضبط زي الغواص اللي خرج من عمق كبير بضغط كبير إلي سطح الماء دفعة واحدة في ضغط أقل..

إحنا مابنشوفش غير وجه واحد من القمر.. لأن القمر عامل علينا "قفل Lock" بوجه واحد..

عارف الأفلام اللي بتشوف فيها الطيارات المقاتلة عاملة "قفل" علي بعض قبل ما تضرب صاروخ و بالتالي مهما الخصم ناور.. الصاروخ بيفضل يناور وراه؟ القمر عامل علينا قفل زيه اسمه "قفل المد والجزر Tidal locking".. ساعات بيسموه "القفل الجذبي gravitational locking"...

يعني مهما القمر بيلف حوالينا مابنشوفش منه إلا وش واحد.. بيلف و هو مديلنا نفس الوش باستمرار.. الوش اللي بينور لما تنعكس عليه أشعة الشمس.. القمر مش بينور لوحده زي ما ناس كتير فاهمة.. مش زي الشمس.. لا.. القمر بيعكس أشعة الشمس و ينور لنا بالليل...

بسبب طريقة دوران القمر دي.. اليوم الواحد على القمر يساوي 29 يوم و نص تقريباً من بتوعنا..

يعني لو سافرت إلي القمر 1 رمضان.. و قعدت يوم واحد.. ترجع الأرض تلاقي نفسك وقفة العيد...

اليوم القمري على القمر هو نفس الشهر القمري على الأرض..

يعني لو سبت ابنك على الأرض عنده يوم و انتقلت آنياً.. وقضيت شهر على القمر و رجعت.. ترجع تلاقيه عنده سنتين و 4 شهور...

حركة القمر لها تأثير على المد و الجزر في بحارنا و محيطاتنا بسبب جاذبيته.. و في دراسات قيد البحث إن جاذبيته الضعيفة دي أثناء دورته ليها تأثير على أمزجة البشر و الحيوانات و تصرفاتهم كمان..

طيب الوش التاني.. "الوجه المظلم"..؟

هو في حقيقته مش مظلم.. و ماسموش "الجانب المظلم من القمر" عشان ضلمة.. هو اسمه الحقيقي "الجانب البعيد للقمر Far side of the Moon" اللي مابنشوفوش أبدا من الأرض.. و كلمة "مظلم" يقصد بيها إنه "مجهول".. مستخبي مش بنشوفه...

يحصل ايه لو انفجر القمر دا أو تلاشى؟ المحيطات على الأرض تثور وتغرقنا.. و يختل المناخ و نفقد الحياة النباتية و بعدين نفقد الحياة الحيوانية و مانلاقيش حاجة ناكلها.. فتضربنا المجاعات و تنتشر الأوبئة من الجثث في كل مكان..

و بعدين يختل حزام المجموعة الشمسية الجذبي.. لأن كل الأجرام السماوية دي ماسكة بعض بحزام غير مرئي من الجاذبية..

جاذبية الشمس ماسكة الكواكب حواليها و الكواكب ماسكة الأقمار و الأقمار متماسكة مع الكل..

كل شيء مضبوط بميزان.. و لولا الميزان دا ينهار كل شيء..

و تنحرف الأرض عن مسارها...

و تبدأ تصطدم بباقي الكواكب..

أو تهوي في قلب الشمس..

عشان كده للقمر اتفاقيات دولية بتحميه.. و الدول اللي غزت الفضاء وجب عليها إنها تتصدى لأي عدوان على القمر.. من نيزك عملاق ممكن يدمره أو يخرجه من مساره. أو تفجيرات نووية.. أو أي كارثة من النوع دا..

كمان محظور تماما استخدام القمر كقاعدة عسكرية أو إنزال أسلحة على سطحه.. أو لأي غرض غير الأغراض السلمية...

كام واحد تأمل القمر و قعد بعدها يكتب قصيدة؟ و كام واحد وجه القمر فكره بذكريات السهر وسط الحقول أو السفر على طريق سريع ليلاً؟ كام جندي كان ساهر في الليل وسط برد الصحراء والقمر هو رفيقه الوحيد؟

القمر هو أقرب جرم سماوي لينا.. بالتالي عدينا عليه الأول.. بس هو يختلف تماما عن "عطارد Mercury".. أصغر الكواكب و أقربها لشمسنا.. اللي نتكلم عنهم لاحقاً و يكون للحديث بقية...

---------

مراجع

---------

1 - Wieczorek, M. (2006). "The constitution and structure of the lunar interior". Reviews in Mineralogy and Geochemistry. 60 (1): 221–364...

2 - Lang, Kenneth R. (2011), The Cambridge Guide to the Solar System, 2nd ed...

3 - B. Gladman; et al. (1996). "Synchronous Locking of Tidally Evolving Satellites". Icarus. 122: 166–192...