اتكلمنا عن الشمس و الأرض و كل كواكب المجموعة الشمسية.. الكلام دا في بوستات سابقة موجودة في أول مرجع للي يحب يراجعها..
النهاردة نختتم بأورانوس و نبتون و "بلوتو" الغلبان اللي طردوه من القائمة و مابقوش معتبرينه كوكب و دخلوا مكانه "إيريس Eris"..
"أورانوس Unranus" هو سابع الكواكب من حيث البعد عن الشمس.. و تالت أضخم كوكب بعد المشترى و زحل..
و "أورانوس و نبتون" مختلفين عن العملاقين الغازيين "المشترى و زحل".. و بيصنفوا "كعملاقين جليديين ice giants".. و غلافه الجوي في جليد و نشادر و ميثان و هيدروجين و هيليوم و عناصر أخرى..
أبرد مناخ في المجموعة الشمسية بدرجة حرارة بتوصل إلي 371 درجة فهرنهايت تحت الصفر..
أما قلب أورانوس فمكون من الصخور و الجليد..
و اليوم على أورانوس بـ17 ساعة و ربع من بتوعنا.. و جاذبيته زي جاذبيتنا تقريبا...
و أورانوس بيتم دورة كاملة حوالين الشمس في 30912 يوم..
يعني السنة على أورانوس تساوي 84 سنة أرضية من بتوعنا.. فلو طبقنا المثال المعتاد.. و سبت ابنك على الأرض عنده يوم واحد.. وسافرت آنيا لأورانوس و قضيت هناك سنة.. ترجع تلاقي ابنك عنده 84 سنة..
و أورانوس له حلقات زي زحل.. بس مش بتبان بسهولة.. و هو أصلا غير مرئي بالعين المجردة.. و له 27 قمر مرة واحدة.. أكبرهم "تيتانيا Titania" و دا ثامن أكبر قمر في المجموعة و قطره نصف قطر قمر الأرض..
أما صديقه "نبتون Neptune" رابع أكبر كوكب.. فدا كان أول كوكب يكتشفوه بالمعادلات و التوقع الرياضي.. لأن التغيرات غير المتوقعة في مدار كوكب أورانوس.. خلت الفلكيين يشكوا في وجود كوكب مجهول يقع خلفه.. بيأثر عليه..
و المسافة بين نبتون والشمس هي 30 ضعف المسافة بين الأرض والشمس.. يعني 30 "وحدة فلكية Astronomical unit".. أو 4.50 مليار كيلومتر..
و نبتون لحد دلوقتي له 14 قمر.. أكبرها "ترايتون Triton".. و له حلقات زي زحل و أورانوس..
و السنة على نبتون تساوي 165 سنة من بتوعنا.. بينما اليوم يساوي 16 ساعة و ست دقايق من توعنا..
أما "بلوتو Pluto".. فدا كان أصغر كواكب المجموعة الشمسية التسعة.. بس العلماء أعادوا تعريف مصطلح "كوكب".. و دا طلع بلوتو من الموضوع و خلاه "كوكب قزم dwarf planet"..
و الكوكب القزم لا هو كوكب مؤثر بجاذبيته و مجاله المغناطيسي فيما حوله.. و لا هو قمر تابع لحد.. هو بس عنده حجم و كتلة و قوة كافية تبقيه في مكانه و تحافظ على شكله الكروي أو شبه الكروي..
و بلوتو سطحه مكون من الصخور و الجليد.. و له خمس أقمار أكبرها "شارون Charon"..
و اليوم على بلوتو يساوي أسبوع أرضي تقريبا.. و السنة على بلوتو تساوي 247.7 سنة من بتوعنا..
بعد ما خرج بلوتو دخل الكوكب اللي بعده و كان اسمه "2003UB313".. و بعدين اكتشفوا إنه قزم زي بلوتو برضه.. فسموه "إيريس Eris"..
إيريس "قزم وراء نبتوني trans-Neptunian dwarf planet".. و "وراء نبتوني" دي يعني أي جسم يقع خلف "نبتون"..
و إيريس له قمر واحد زينا.. و أحيانا في دورته حوالين الشمس بسبب بعده عنها.. غلافه الجوي بيتجمد من شدة البرد..
و اليوم على "أيريس" أطول من يومنا على الأرض بساعة و تسع دقايق بس.. بس السنة على "أيريس" تساوي خمس قرون و نصف.. أو 560 سنة من بتوعنا..
يعني لو سافرت "أيريس" آنيا و قعدت هناك سنة.. حاترجع الأرض تلاقي مرسي لسه مرجعش..
"أيريس" زي باقي الكواكب لسه قيد الدراسة.. في كتير أوي لسه مانعرفوش عن المجموعة الشمسية..
أورانوس هو التركواز.. و نبتون هو الأزرق اللي في الصور اللي مع البوست..
من ضمن المعلومات الغريبة اللي بتصادفك مع دراسة المجموعة الشمسية.. إن اللي نعرفه عن المجموعة الشمسية أكتر من اللي نعرفه عن أعماق المحيط..
و اللي نعرفه عن الإتنين مع بعض.. أكتر بكتير من اللي نعرفه عن المخ البشري...
-----------
مراجع
----------
1 - منشورات سابقة:
- https://goo.gl/H5ttvo
- https://goo.gl/F8BG9o
- https://goo.gl/H5Hihz
- https://goo.gl/g0Yhwk
- https://goo.gl/tb3esD
- https://goo.gl/o1553k
2 - https://pds.jpl.nasa.gov/planets/special/pluto.htm
3 - https://goo.gl/FmrwXi
4 - Burgess, Eric (1991). Far Encounter: The Neptune System. Columbia University Press.
5 - https://theplanets.org/eris/