لسه مع "قطة شرودنجر" اللي حطها في الصندوق سنة 1937..
الربة المصرية القديمة القطة "باست" وقت غضبها على جمع من المصريين مكانتش بتأذيهم.. كانت بتختفي من القرية أو المدينة دي.. و دا يعني إنه تنتشر فيها الفئران و يضربها الطاعون.. و رضا باقي الأرباب كان مرهون برضا "باست".. لو "باست" راضية فهي تعرف ازاي تخلي الباقين يرضوا عليك...
"باست" و هي نونو كانت بتلعب على حجر "رع" في مركب الشمس بتاعته و بتتنطط في كل مكان كعادة القطط.. فوقعت في المياه الكونية الرهيبة اللي شايلة المركب.. و كادت تغرق.. و من ساعتها و هي بتكره الماء و السباحة.. مع إنها بتعرف تعوم...
و كانت "باست" هي الربة اللي رجعت إلي "ست" رب الظلام و الشر، مكانته عبر الوقت، و خلته وقف جوار المصريين في حروب كتير و دفعهم للفوز و الانتصار..
و كان "ست Seth" - رب العواصف والصحراء و شؤون الأجانب قبلما يعصى أبوه "رع" و يقتل أخيه أوزوريس - مابيعملش حساب لأي رب آخر .. إلا إنه كان بيعمل ألف حساب لـ"باست" و "تحوت Thoth" رب العلم والحكمة، اللي بيحوي عقله كل علوم و آداب و فنون الكون...
"تحوت" كان له دور حيوي جداً في الحياة.. كان واقف على مسافة من الخير و الشر (في إشارة إلي حياد العلم) كان بيرعى الخير و الشر معاً، فلما كان بيحصل صراع بين أحد آلهة الخير و آلهة الشر.. كان "تحوت" بيعالج الاتنين و يرجع لهم قوتهم.. و يقف على مسافة بينهم يراقب صراعهم الأبدي باستمرار عشان محدش من الطرفين يهزم الآخر ويقضي عليه للأبد.. و بكده.. يحفظ التوازن في الوجود..
علماء البيولوجي بيقولوا لنا إن الدولفين ما بيشربش من مياه البحر.. بيحصل على الماء العذب من السمك اللي بياكله.. بينما القط هو الحيوان البري الوحيد تقريباً اللي بيشرب من ماء البحر و يروي عطشه، لأن في كليتيه مصافي معينة بتعرف ترشح تركيزات الملح العالية و تتخلص منها..
حيوان غريب.. و مش مستغرب إنه أول حيوان تبادر لذهن "إروين شرودينجر" و هو بيفكر في تجربته "قطة شرودينجر"..
شرودينجر قال القطة في الصندوق.. حية و ميتة مع بعض في نفس الوقت..
طيب إزاي الكلام دا؟ و ليه مش حية "أو" ميتة.. طالما الاحتمالات 50:50؟
قالك ما احنا اتفقنا إن القطة دي جسيم.. و الجسيم دا بيتحرك و بيبقى علي كذا حالة في نفس الوقت.. يعني لما اقولك "الجسيم دلوقتي عند جدار الصندوق اليمين".. هو في نفس اللحظة اتحرك و راح للجدار الأيسر.. فلما أقولك "دا عند الجدار الأيسر".. تلاقيه نزل لقاع الصندوق.. فهو في كل الحالات في نفس الوقت لحد ما ترصده...
الجسيم في كل مكان..
هو لو الدنيا بتمطر.. المطر نازل فين؟ نازل في كل مكان.. بالنسبة لك هو في كل مكان.. لحد ما أرصده بدقة و أقولك لأ المطر دا في الشيخ زايد بس.. مش في القاهرة..
نفتح بقى الصندوق و نشوف الجسيم على أي وضع.. ساعتها يبقى دا وضعه الحقيقي اللي اترصد عليه.. غير كده هو في كل الحالات مع بعض..
لو قلت حية "أو" ميتة.. أبقى انا فرضت علي الجسيم في لحظة معينة "السكون في مكان".. بينما هو مش ساكن أبدا.. عمال يتحرك في كل حتة و في تغير طول الوقت...
و كان "شرودينجر" بيأكد إن الإليكترونات ليها طبيعة موجية و أثبت دا بالتجربة.. زي الضوء.. عشان كده الضوء بيعدي بين خصاص الشيش بتاع الشباك و بيمر من تحت عقب الباب.. مفيش حاجة اسمها أن الضوء تحطه و يقعد في حتة واحدة.. أمواج بتسافر باستمرار..
العلماء احتاروا.. طيب ماحنا مكونين من ذرات و اليكترونات.. يعني احنا لينا طبيعة موجية؟ احنا مش أجسام مادية؟؟
إحنا موجات؟ زي موجات الراديو؟؟ طيب ليه مابنعديش من الحوائط؟
حيرة...
اول واحد قدم حل للحيرة دي.. قدّ لنا مبدأ في الفيزياء اسمه مبدأ الريبة.. أو الإرتياب.. أو "عدم اليقين Uncertainty principle".. حطه واحد اسمه "كارل هايزنبرج Werner Karl Heisenberg" سنة 1927..
"هايزنبرج" قدم للعلماء مجموعة معادلات.. و قال لهم: "شوفوا يا جماعة.. ممكن تحسبوا الضوء على إنه أمواج أو تحسبوه على إنه ذرات.. و تحسبوا الإليكترونات على إنها أمواج أو ذرات.. و كل واحد يختار الإفتراض اللي يعجبه و حيلاقي المعادلات دي تصلح للافتراضين"..
طيب إزاي؟ إزاي المادة تبقي طاقة و الطاقة مادة؟ و إزاي تبقى الحقيقة هي التناقض بعينه؟
و رد عليهم "هايزنبرج".. إنه مفيش سبيل للعلم لإدراك "المطلق".. الحقيقة المطلقة لا سبيل لإدراكها...
العلم ما يقدرش يدرك كينونة الشيء بشكل دقيق محدد.. بس يقدر يدرك ازاي الشيء دا بيتعامل في أوساط مختلفة.. و علاقته بباقي الأشياء..
فلما الضوء يتصرف بشكل مادي ذري مرة و مرة بشكل موجي.. و الإليكترونات تتصرف بشكل موجي مرة.. و مرة بشكل ذري..فدي مش طبيعة المادة و لا طبيعة الضوء..
دا "السلوك" و "الطريقة" اللي الضوء بيتصرف بيها في حالات و أوساط معينة.. و بالتالي كده يمكن يكون لهم طبيعة مزدوجة..
تماما زي ما انت بتثور و تغضب في موقف معين.. و ممكن تبقى هاديء مستكين في نفس الموقف في وقت آخر.. لا دي طبيعتك الدائمة و لا دي طبيعتك الدائمة..
انت اتصرفت بطبيعتين مختلفتين وفقاً لمتغيرات كتير..
و ثانيا.. العلم مايقدرش يدرس وحدة أساسية مكونة لشيء.. و يوصل لنتيجة مطلقة.. أحكام العلم كلها تقريبية احصائية.. و بالتالي صعب جدا تدرس حالة مفردة على حدة و تفهم أو تصل لنتيجة..
و عشان يبرهن لهم هايزنبرج على الإستحالة دي ضربلهم مثال و قال لهم: تعالوا نتخيل إننا عايزين نشوف "إليكترون" واحد.. و نحدد مكانه و سرعته..عايزين أولا ميكروسكوب بيكبر 100 مليون إكس.. و لو صنعنا الميكروسكوب دا.. فالإليكترون أصغر من موجة الضوء.. يعني شعاع الضوء مش حايسقط عليه عشان نشوفه..
عايزين أشعة موجتها قصيرة جدا.. و اختار لتجربته الفكرية دي أشعة الراديوم...
تعال بقى نشوف الإليكترون تحت الميكروسكوب.. لما بتسلط عليه اشعة الراديوم عشان تشوفه و تحدد مكانه.. أشعة الراديوم حاتضرب الإليكترون زي عصاية البلياردو ما بتضرب الكورة.. لأن الأشعة حزم من الطاقة.. الإليكترون حايكتسب طاقة لما تضربه.. و يتحرك.. و يقفز بعيد بسرعة...
فلما تيجي تحدد مكانه.. و تسلط عليه الأشعة عشان تشوف السرعة اللي بيتحرك بيها.. الأشعة تضربه فينطلق زي كرة البلياردو في مكان جديد..
"فكل ما تيجي تحدد مكانه تتغير سرعته و كل ما تيجي تحدد سرعته يتغير مكانه"... فاكر الجملة دي من منهج الفيزياء؟
جابو "شرودنجر" و قالوله طيب.. يعني ممكن في لحظة نلاقي القطة حية.. و في لحظة بعدها نلاقي القطة ميتة.. بس احنا فتحنا و لقيناها حية.. يبقى إجابة سؤالك هي إنها "حية"...
قال لهم لأ.. لأن أي شيء "قابل للحدوث يحدث فعلا"..
يعني ايه الكلام دا؟ يعني في عوالم موازية حوالينا.. اللي بيحصل عندنا في عالمنا.. غير اللي بيحصل في غيرها..
يعني بينما احنا لقينا القطة حية.. في عالم موازي جنبنا نسخة من عالمنا.. هم لقوا القطة ميتة...
"أي شيء قابل للحدوث يحدث فعلا"؟؟
يعني في عالم موازي شبه عالمنا دا بالضبط انتصر فيه هتلر..!
و عالم آخر الإسكندر الأكبر مماتش فيه و كمل غزواته..
و عالم آخر آينشتاين ماتولدش فيه.. و أنت اللي توصلت للنظرية النسبية..
و عالم آخر ربنا يتولاه برحمته، محمد مرسي فيه لسه رئيس جمهورية..
و عالم فيه علاج للإيدز.. و عالم غيره الإيدز فيه بقى بينتقل بالهواء و أباد البشر..
إيه الموضوع دا.. إيه القصة المعقدة دي؟
دي جزئية ممتعة بس شرحها يطول.. وتخلي للحديث بقية...
------------------
مراجع
------------------
1 - منشورات سابقة:
-https://goo.gl/2GfWC2
- https://goo.gl/8QyXaq
2 - Zee, A. (2003). Quantum Field Theory in a Nutshell...
3 - Physics and Beyond: Encounters and Conversations. Harper & Row...
4 - Bryce Seligman DeWitt, The Many-Universes Interpretation of Quantum Mechanics, Proceedings of the International School of Physics "Enrico Fermi" Course IL: Foundations of Quantum Mechanics, Academic Press (1972)...
#كوانتم#Quantum