الكوكب الأزرق.. والوحيد اللي فيه حياة عاقلة في المجموعة الشمسية في الوقت الراهن..
"الأرض Earth"..
أرضنا.. بغلافها الجوي.. وأمطارها وحيواناتها وبحارها وجمالها..
الماء سر الحياة.. زمان قال العلماء "حيثما وجد الماء وجدت الحياة"..
والحياة بتتطور وتتقدم و تبني حضارة..
وكوكبنا 71% منه تقريبا ماء..
من الحاجات اللي مش ناس كتير تعرفها إن دورة الماء على الأرض مغلقة.. هي هي نفس الكمية.. مابنستوردش ميه زيادة من كوكب تاني يعني..
يعني كوباية الميه اللي حضرتك بتشربها دلوقتي.. ممكن تكون هي نفس الكوباية اللي شربتها "كيلوباترا" سنة 30 قبل الميلاد.. أو اللي عرقها رمسيس الثاني سنة 1274 قبل الميلاد على ظهر حصانه في معركة قادش..
هي نفس كمية الميه ونفس الميه..
وكوكبنا له غلاف جوي وعكس الشائع برضه.. مش كله أكسجين.. 78% منه "نيتروجين".. و 21% أكسجين و 1% غازات أخرى..
وغلافنا الجوي هو مستودع المياه اللي بنشربها.. واللي بتتبخر وتنتقل من خلاله من مكان إلي آخر على شكل سحب وتنزل امطار.. ونشربها.. وهكذا..
ولو كل المياه السابحة في الهواء في غلافنا الجوي اتكثفت فجأة ونزلت الارض.. تغرق الأرض كلها.. وتغطيها بارتفاع 3 متر تقريبا...
وغلافنا الجوي له وزن.. اللي بيسبب الضغط الجوي على أجسامنا.. وله كتلة مقدارها 5.15×10 أس 18.. ومتقسم لخمس طبقات.. طبقة التروبوسفير.. والستراتـوسـفير والميزوسفير والثيرموسفير و لأكسوسفير.. آخر غلاف والطبقة الأخيرة من الخارج..
الغلاف الجوي دا بينقل لنا موجات الراديو الموجات اللاسلكية ومسؤول عن إننا بنتنفس ونشرب وبيحمينا من النيازك والإشعاعات المؤذية اللي بتيجي من الفضاء من الشمس أو غيرها..
والغلاف دا موجود في مكانه بسبب الجاذبية الأرضية.. هي القوة اللي بتشده مكانه وتحفظه حوالين الكرة الأرضية..
للأسف بتقابل الواحد ساعات منشورات غاية في الضحالة.. بتتكلم عن "الجاذبية بكرة حتتوقف 3 ثواني".. و "الأرض مسطحة والأرض الكروية خدعة من ناسا"..
لو الجاذبية الأرضية توقفت 3 ثواني.. الارض تصطدم باقرب كوكب ليها.. ويختل حزام المجموعة كله وكل الكواكب تخبط في بعض..
أو تهوي في قلب الشمس..
أما موضوع الأرض مسطحة دا.. فمش عارف بصراحة إيه هدف المؤامرة دي.. انهم يقولوا لنا "دي كروية" وهي مسطحة.. و ليه هي الكوكب الوحيد المسطح.. وازاي مسطحة و الشمس مابتشرقش عليها كلها في وقت واحد وتغرب في وقت واحد.. و ازاي مسطحة و في حاجة اسمها "خط الأفق المائل".. بتقدر حتى تشوفه بنفسك بعينيك وانت بتتابع مركب بمنظار مكبر.. و هو بيختفي "خلف" الأفق..
ما علينا من الضحالة.. نرجع لموضوعنا.. معظم سكان الأرض مش من البشر.. ولا الحيوانات ولا الحشرات..
بل من البكتيريا..
ممكن تندهش لو عرفت كمية البكتيريا و الكائنات وحيدة الخلية اللي على الأرض.. دا ممكن تندهش أكتر لو عرفت إنك في جسمك شايل 37.2 تريليون خلية بشرية.. وفي نفس الوقت شايل علي جسمك وفوقه وداخله 39 تريليون خلية بكتيرية...
عدد البكتيريا "في/ على" أجسامنا أكتر من عدد خلايانا نفسها...
وتندهش أكتر و أكتر لو عرفت إن البكتيريا الضارة اللي بتأذي الإنسان نسبتها وسط كل دا ماتزيدش عن 2 - 3%.. من تعداد البكتيريا الي في الأرض.. لأن معظم البكتيريا الموجودة نافعة...
بتاكل الأجسام الميتة..
بتنتج أكسجين..
وحتى بتلتهم المخلفات النووية...
نسبة وجود البكتريا للإنسان في الأرض.. هي غالبا نفس النسبة بالنسبة للكون بتاعنا.. يعني احتمال إنك في الرحلات الفضائية تقابل بكتيريا او كائن وحيد الخلية.. أكبر مليارات المرات من احتمال إنك تقابل كيانات عاقلة ذكية عندها أطباق طايرة.
والبكتيريا دي ممكن تكون قاتلة.
وممكن تنفع كسلاح بيولوجي يبيد لك أعدائك في ثواني...
وبعد البكتيريا تأتي الحشرات.
لو عرفت إن كل بشري بيقابله على الأرض 200 مليون حشرة.. يبقى إحتمال إنك تقابل حياة حشرية في الفضاء يفوق احتمال إنك تقابل كائنات عاقلة بملايين المرات...
والحشرات دي ممكن تكون مؤذية..
أو قاتلة...
أرضنا عمرها تقريبا أربعة و نص مليار سنة.. عاش عليها كائنات كتير و مخلوقات كتير ماقابلناهاش وجها لوجه.. وانقرضت.. و ظهر مخلوقات غيرها.. و هكذا..
على الأرض.. الإنسان معاصرش الديناصورات أبدا.. وماظهرش في عصورها.. قصص البني آدم اللي لابس خيش وماسك رمح و بيحارب ديناصور دي انتشرت بسبب أفلام السينما.. دا أكتر من كده.. في ديناصورات من اللي بتشوفها بتقاتل بعض في السينما مقابلتش بعض أصلا في الحياة.. والمسافة الزمنية بينها و بين بعض.. هي نفس المسافة الزمنية بيننا و بين عصور الديناصورات نفسها..
الأرض مرت بكذا إنقراض.. أهمها كان من 252 مليون سنة تقريبا.. واسمه "الموت العظيم Great Dying".. أو "نقراض العصر البرمي الترياسي Permian–Triassic extinction event".. ودا أفنى معظم أشكال الحياة من الكوكب.. و فقدت الأرض 96% من الفصائل الحية...
بس الموت العظيم دا كان له أثر مهم.. الموت العظيم مهد الأرض لأشكال حياة مختلفة سمحت فيما بعد بحياة البشر.. لأنه أباد كائنات مفصلية اشبه بالصراصير وحشرات مفترسة طولها مترين وتلاتة متر وحشرات طائرة في حجم النسور.. مكانش حينفع نعيش وسطها..
كنا اتكلمنا من قبل علي موضوع إن الحياة نشأت على الأرض "بالصدفة".. و عرفنا إن علماء الرياضيات عملوا حساباتهم وقالك إن الكلام دا مش مضبوط و لا علمي.. عشان تنشأ خلية واحدة بشريط الحمض النووي بتاعها "بالصدفة"..دا احتماليته - إنه يحصل مرة واحدة بس - هي 1 علي 10 "دوسنتليون Ducentillion" والدوسنتليون دا رقم 1 وجنبه 603 صفر..
باختصار و بحسبة تانية.. دا يفوق عمر الأرض كلها بمليارات السنين.. ومستحيل يحصل صدفة في زمن كوكبنا.
وأرضنا اللي احنا واقفين عليها دي بتتحرك.. بتلف حول نفسها دورة كاملة في 24 ساعة.. يوم.. ليل و نهار.. وبتلف حوالين الشمس في 365 يوم.. سنة أرضية كاملة.
تستغرب برضه لو عرفت إن الأرض اللي حضرتك قاعد عليها دلوقتي بتقرا الكلام دا بتتحرك بسرعة رهيبة في الفضاء أثناء دورتها في فلكها.. 30 كيلومتر في "الثانية" الواحدة.. يعني 107826.05 كيلومتر في الساعة...!
والأرض ليها قمر واحد.. اقل عدد أقمار في الكواكب اللي ليها أقمار.
شفنا المصير الأسود اللي حصل لكوكب الزُهرة.. وحوله لجهنم حمراء.. الحقيقة إن دا ممكن يحصل للأرض بسهولة تامة.. لو نشبت حربة نووية.. أو زاد التلوث بدرجة عنيفة.. ماقدرش الكوكب يتخلص منه بسهولة.
وكل حاجة على الأرض وتحت قبة غلافها الجوي مضبوطة بميزان.. وكل مخلوق له دور.
حتى الصراصير.. لولاها نفقد معظم التربة الزراعية...
بيرجح العلماء إن الأرض قدامها من عمرها قد اللي فات.. حوالي 5 مليار سنة.. وبيتوقعوا كمان سيناريو النهاية.. بأن شمسنا بعد 5 مليار سنة حتتحول "لعملاق أحمر Red giant"..
و تكبر..
تبدأ ساعتها الحرارة على الأرض تزيد بشكل مش متوقع.. وغازات الغلاف الجوي تتفاعل.. وتتحول لأبخرة دخانية كثيفة.. ويبقى التنفس مرهق وصعب للغاية.. وبعدين تبدأ البحار و المحيطات تغلي حرفياً.. والجبال تسبح وسط الحمم و القشرة الأرضية تتحرك.. و بعدين يحترق الغلاف الجوي بالكامل.. وتبدأ الشمس الكبيرة الجديدة ساعتها تجذبها..
وتقع أرضنا في قلب الشمس..
وبعدين تبدأ الشمس تستهلك وقودها و تنطفي.. و تبدأ تنكمش.. و تتحول لثقب أسود.. بيطلع منه طاقة اسمها "إشعاع هوكينج Hawking radiation"..
الإشعاع دا يخلي الثقب الأسود ينكمش و يتضاءل وينطوي على نفسه زي الورقة قبل ما تلقيها في صفيحة قمامة..
وبعدين "يتبخر الثقب الأسود black hole evaporation"...
ويتلاشي..
و تنتهي الشمس إلي دفقة طاقة زي ما بدأت..
الأرض تختلف كتير عن "الكوكب الأحمر".. اللي جنبها.. واللي بعض العلماء وضعوا نظرية.. بيقولوا فيها إنه كان عامر بالحياة زيها.. لولا إن سكانه تعرضوا لكارثة "صناعية".. أبادت الحياة من عليه..
ودا الحديث عنه يطول و يبقى للحديث بقية...
----------------
مراجع
----------------
1 - منشورات سابقة:
- https://goo.gl/H5ttvo
- https://goo.gl/F8BG9o
- https://goo.gl/H5Hihz
2 - Seligman, Courtney (2008). "The Structure of the Terrestrial Planets"..
3 - Wenk, Hans-Rudolf; Bulakh, Andreĭ Glebovich (2004). Minerals: their constitution and origin...
4 - Habing, Harm J.; Olofsson, Hans (2003). "Asymptotic giant branch stars"...
5 - Scientists discover hazardous waste-eating bacteria: https://goo.gl/TSRi8D
6 - Why Giant Bugs Once Roamed the Earth: https://goo.gl/PcgHtb