في أسطورة إن وقت تأسيس "القاهرة".. تجلى الكوكب دا واضح جلي في سمائها.. وعلشان كده من ضمن الاسماء اللي بيحملها اسم "القاهر"..
"المريخ Mars"..
الكوكب الأحمر.. بسبب أوكسيد الحديد اللي بيغمر سطحه...
في 30 أكتوبر سنة 1938، انطلق عبر إذاعة الراديو في الولايات المتحدة.. صوت المخرج "أورسون ويلز Orson Welles" على الهواء مباشرة.. بيعلن وصول السفن الفضائية المريخية من المريخ.. ونزول الغزاة المريخيين منها.. خضر البشرة.. قساة القلوب.. بآليات عملاقة.. بتمشي على 3 قوائم.. وبدء حربهم الشاملة على البشر.. لاحتلال الأرض..
ومع البيان الإذاعي المخيف.. انطلق آلاف.. و ربما ملايين من المواطنين الأمريكيين يهربون من المدن.. والمكالمات تنهال على أقسام الشرطة والطواريء.. وفي حالات فضلت الانتحار.. وقتلت نفسها بإيديها.. بدل ما يقتلهم الغزاة المريخيين أو يستعبدوهم..
قليلين ساعتها أدركوا إن البرنامج مكانش بيتكلم عن غزو حقيقي.. كان مجرد تهيئة درامية لقصة "هربرت جورج ويلز H. G Wells" الرائعة "حرب العوالم War of The worlds".. عن الغزاة اللي جم من المريخ يحتلوا أرضنا.. وفشلت اسلحتنا و جيوشنا في التصدي ليهم.. و كادوا ينتصروا فعلاً.. لولا انهم اصطدموا بميكروباتنا.. اللي جهازهم المناعي مقدرش يتحملها.. فلقوا حتفهم على سطح الأرض..
كتير الكوكب دا كان بيثير خيال كتاب الخيال العلمي... مع إن المريخ كوكب صغير.. ثاني أصغر كوكب في المجموعة الشمسية.. بس مشابه لكوكبنا الأرض في حاجات كتير..
اليوم على المريخ زي يومنا تقريبا.. بس أكتر بأربعين دقيقة.. 24 ساعة و 40 دقيقة..
السنة أطول من اليوم عادي.. بس أطول كمان من السنة بتاعتنا.. طولها 687 يوم.. وجاذبيته ثلث الجاذبية بتاعتنا.. يعني لو وزنك 100 كيلو على الأرض.. تبقى 30 كيلو على المريخ..
والمريخ له فصول زي فصول السنة بتاعتنا...
7 شهور ربيع .. و 6 شهور صيف.. و 5 شهور و ثلاث أسابيع خريف.. وحوالي 4 شهور شتاء...
ودرجة حرارة المريخ مناسبة للحياة.. فهو بيوصل في النصف الجنوبي إلي 30 درجة مئوية في الصيف.. و 20 درجة تحت الصفر في أماكن أخرى.. زي ما جو الأرض بيختلف من موسكو إلي القاهرة..
الاختلاف في درجات الحرارة دا بيسبب أحيانا عواصف عنيفة.. خصوصا لما المريخ بيقترب من الشمس.. والمريخ عليه أكبر جبل بركاني، في المجموعة الشمسية كلها.. اسمه "أوليمبس Olympus Mons".. ومساحته تقريبا هي نفس مساحة فرنسا..
المريخ له قطبين زي الأرض.. وعليه كميات من الجليد.. جليد المريخ لو ساح يغطي سطح المريخ بالمياه لعمق حتى 11 متر..
في كمية ضئيلة جدا من الماء في غلافه الجوي.. المياه عموما مش موجودة على المريخ في صورتها السائلة اللي عندنا لأن المريخ فقد في الماضي معظم غلافه الجوي.. وبقى الضغط الجوي هناك 1% تقريبا من الضغط الجوي بتاعنا...
أحيانا الجليد بيذوب و بيكون في ماء سائل بس في ظروف خاصة للغاية وبكميات ضئيلة جدا.. ماتكفيش أبدا لحضانة اي شكل من أشكال الحياة..
بس الكوكب في يوم ما كان عليه بحار.. وأنهار وماء.. آثار البحيرات لسه موجودة.. آثار أملاح بحرية.. وآثار لأملاح ما بتتكونش إلا في وجود الماء زي "الجاروسيت Jarosite"..
وفي 18 مارس 2013، ناسا اتكلمت عن وجود مياه تحت سطح المريخ.. وآثار لأنهار متجمدة..
يعني في يوم من الأيام كان في ماء.. و أنهار و بحار ومطر.. وحياة..
الحياة الي كانت على المريخ ناسا بترجح إنها أولية بكتيرية.. بينا في علماء آخرين أشاروا للعكس زي ما حنشوف.. وقالوا إنها كانت حياة ناضجة عاقلة ذكية زي البشر...
والمريخ بيسطع في سماواته قمرين.. "فوبوس Phobos" و"دايموس Deimos".. دورة "فوبوس" أسرع بكتير من دورة "دايموس" و مساره أقرب.. و ما بيتمش دورته في شهر كامل زي قمرنا.. لا.. في 11 ساعة بس..
وغلاف المريخ الجوي الرقيق كله ثاني أكسيد الكربون تقريبا.. بنسبة 96%.. والباقي هيدروجين وأكسجين وغازات أخرى.. وشوية مياه...
إزاي انتهت الحياة من على سطح المريخ؟ وراح فين غلافه الجوي وكل المياه اللي كانت عليه؟
في نظرية بتقول إن دا حصل بسبب هجوم عنيف من نيازك عملاقة.. عمل ثغرات في الغلاف الجوي.. خلت الرياح الشمسية تتفاعل مع طبقة الأوينوسفير مباشرة.. وتمزق معظم الغلاف الجوي..
في فجوات هائلة على سطح المريخ بيرجح إنها فعلا ضربات نيازك.. دي أكثر النظريات رجوحاً ومنطقية..
لكن بعض العلماء اللي درسوا الفجوات دي ودرسوا المريخ ككل.. طرحوا نظرية تانية غريبة..
نظرية بتقول إن المريخ كان فعلا عليه ماء وبحار وحيطات.. و مخلوقات زينا...
حضارة عاقلة.. سادت على المريخ.. وعمرته.. وبعدين أفسدته لحد ما انقرضوا كلهم...
حياة عاقلة ذكية زينا..
سادت الكوكب لملايين السنين..
وسخرت العلم اللي بتمتلكه لتيسير سبل الحياة..
وبعدين بدأت الخلافات بين أهل المريخ...
وبدأت الحرب..
النووية..
من 500 مليون سنة..
ومع الانفجارات النووية.. اعتل مناخ المريخ واتفكك غلافه الجوي.. واتحجبت الشمس ومات النبات.. واتصحرت الأرض.. وبادت الحياة..
أصحاب النظرية دي بيقولوا: إن الفجوات النيزكية دي في حقيقتها مش فجوات نيازك.. دي أماكن التفجيرات النووية اللي حصلت..
نظرية جامحة.. بس الدكتور "جون بريندنبرج John Brandenburg" وضع نظرية أكثر جموحاً..
"بريندنبرج" قال إن كان في حياة ذكية عاقلة فعلا.. بس كانت زينا تقريبا في العصر البرونزي.. لسه بدائية.. ناس بتصطاد و تاكل وتلتقط الثمار وتعمل سيوف ورماح..
والحضارة الوليدة دي اصطدمت بحضارة أخرى..
حضارة أكثر تطورا و قوة.. من كوكب آخر.. ابادتها بالأسلحة النووية عن بكرة أبيها...
واستدل على كلامه بصور وتسجيلات ناسا.. اللي بيقول إنها بتشير بوضوح لمكان انفجارين هوائيين على الكوكب.. وصور المسح الطيفي اللي بتشير لوجود طبقة رقيقة من اليورانيوم وبعض المواد المشعة.. على سطح الكوكب..
لكن العلماء ردوا علي "بريندنبرج" و قالوا إن اللي هو شايفه إنفجار هوائي دا خداع بصري في الصور.. ومجرد عواصف ترابية..
لكن الراجل مصمم على موقفه.. وبيتساءل عن سر الرحلات للمريخ بالذات.. وبيشير لأن الدول الكبري بتحاول توصل لآثار أي تقنية متطورة أو أسلحة.. فضلت من الحرب دي.. تخليها تقفز قفزة هائلة في عالم التسليح..
ورد الدكتور "جونتي هورنر Jonti Horner" وقال إنها نظرية طريفة ومثيرة للخيال.. لكن للأسف مش حقيقية..
ولسه السجال شغال بينهم.. وناس بتقول إن "بريندنبرج" عبيط.. وناس بتقول إنه من بتوع "نظرية المؤامرة".. وناس مصدقاه.. بينما علماء آخرين بيدرسوا إمكانية إنهم يطلقوا صواريخ.. تعمل تفاعلات معينة في مناخ المريخ.. فتخليه غني بالنيتروجين والأكسجين..
وهنا، ممكن يمتلك غلاف جوي زي زمان..
وتتغير درجة الحرارة وتنزل أمطار..
يعني مياه..
وحياة..
وفي علماء بتحلم إن المريخ يكون بديل للأرض..
وطن بديل بعد حرب نووية طاحنة.. أو بسبب فرط التلوث الي إحنا بنعاصره..
يعني بدل ما نحاول نحترم البيئة عندنا.. ونحافظ على أرضنا.. نخربها لحد ما تنتهي ونروح كوكب آخر نعمره وبعدين نخربه برضه..
كلها سجالات وصراعات علمية..
والكوكب الأحمر المتسمي على اسم إله الحرب الإغريقي بيدور في مداره في صمت.. ما بيحكيش لحد عن تاريخه وماضيه...
يا ترى في مياه بتجري في أعماق المريخ؟
في بكتيريا؟
محدش عارف..
بعد المريخ ييجي دور "المشترى".. أكبر كواكب المجموعة.. ودا الكوكب القادم اللي حيخلي للحديث.. بقية...
--------------
مراجع
--------------
1 - Williams, David R. (September 1, 2004). "Mars Fact Sheet". National Space Science Data Center...
2 - Mars'seasons: https://goo.gl/GYZtQG
3 - "Olympus Mons". Gazetteer of Planetary Nomenclature. USGS Astrogeology Research Program...
4 - https://goo.gl/HTMPb0
5 - Zubrin, Robert; Wagner, Richard (1997). The Case for Mars: The Plan to Settle the Red Planet and Why We Must...
6 - منشورات سابقة:
- https://goo.gl/H5ttvo
- https://goo.gl/F8BG9o
- https://goo.gl/H5Hihz
- https://goo.gl/g0Yhwk