الكوكب اللغز...
متسمي على اسم ربة الجمال و الرقة و الحب "فينوس".. ثاني كوكب بعد "عطارد".. وثاني أكثر جسم متألق في السماء ليلاً بعد القمر.. وممكن أحيانا تشوفه في ضوء النهار.. هو اللي في الصورة متألق دا.. والأصغر شوية الأقل تألقاً هو "كوكب المشتري Jupiter"..
وعشان كده العرب سموه "الزُّهرة".. يعني الحسن والبياض والجمال والتألق...
في نظريات علمية بتقول إن "كوكب الزهرة Venus".. كان زي أرضنا...
زيها بالضبط ولسه شايل كتير من صفاتها.. لدرجة إنه مع التشابه ييسموه "شقيق الأرض Earth's sister planet"..
غلاف جوي فيه أكسجين.. وثاني أكسيد الكربون ونتروجين..
جاذبيته قريبة جدا من جاذبيتنا..
وكان عليه بحار.. ومحيطات.. وأنهار وغابات..
أدغال وأحراش وزرع وحيوان...
مطر..
وحياة...
ولكن فجأة حصل شيء غريب مش مفهوم..
النظريات كتير.. بس أكثرها جموحا وتشويقا إن الكوكب من 600 مليون سنة أو أكثر.. اتعرض لكارثة.. وبدأ يتلوث..
تلوث غير معلوم المصدر.. ملأ الغلاف الجوي بثاني أكسيد الكربون.. اللي وصل لنسبة 96.5%...
البعض بيقول إنه مكانش تلوث.. بس بسبب بخر الماء.. ازدادت كثافة الغلاف الجوي وبدأ يتراكم فيه ثاني أكسيد الكربون بالنسبة الرهيبة دي.. فبدأ الكوكب يتحول لما يشبه الصوبة الزجاجية.. ويحبس حرارة الشمس..
وارتفعت درجة الحرارة لما يقرب من حرارة الحمم البركانية.. واستقرت عند 900 درجة فهرنهايت.. يعني أعلى من درجة حرارة "عطارد".. بالرغم من قرب الأخير من الشمس..
ومع الحرارة الرهيبة اتبخرت كل قطرة ماء على الكوكب.. وبادت كل أشكال الحياة..
الموضوع مش متوقف على الحرارة فقط.. الزهرة عاصف.. وعواصفه ما بتهداش أبدا.. بس عواصف نارية ساخنة.. تحرقك في ثوان وتحولك إلي رماد..
وإذا كان المطر بيضايقك على الأرض.. فأحب أقولك إنه بعض المعادن على سطح الزهرة - زي الرصاص - في أماكن معينة.. بتنصهر من الحرارة دي وتتبخر..
وتنزل مطر...!
مطر من معدن منصهر..
ومع الخلل الرهيب و التفاعلات في المناخ.. باقي الكوكب بينزل عليه مطر برضه.. بس معظم تكوينه من حمض كبريتيك مركّز..
بالعبارة الدارجة "مية نار"...
بس مية النار دي مابتوصلش لسطح الكوكب أبدا.. لأنها بتتبخر من فرط الحرارة قبل ما توصل للسطح.. وتتكثف في سحب حمضية.. وتمطر من جديد..
الضغط الجوي هو وزن الغلاف الجوي اللي بنتحمله علي أجسادنا.. وبتتحمله الأشياء حوالينا...
بيزيد الضغط لما بتغوض في البحر مثلا وتنزل في عمق.. لأن جسمك بيحمل كمان وزن الماء..
الضغط على سطح الأرض عندنا بالتقريب هو 1 "بار Bar"...
أما علي سطح الزهرة فالغلاف الجوي كتلته أكتر من كتلة غلاف الأرض بأكتر من 90 ضعف.. يعني ضغط جوي 93 بار..
يعني قوة قدرها 930.197162129779 طن.. على كل متر مربع...
ضغط يوازي وجودك علي عمق كيلومتر تقريباً تحت سطح البحر.. الضغط دا كافي لسحق الإنسان وعصر جسده في لمح البصر.. كأن سيارة نقل داست على علبة سجائر فارغة...
وبينما اليوم عندنا على الأرض 24 ساعة.. فاليوم على الزهرة يساوي 5,832 ساعة.. يعني 243 يوم من بتوعنا.. والسنة تساوي 225 يوم من بتوعنا.. يعني اليوم على الزهرة أطول من السنة هناك..
يعني لو سبت ابنك على الأرض لسه مولود وسافرت الزهرة آنيا.. فبغض النظر عن إنك حتتحول لقطعة فحم أو كومة رماد.. بس لو حصل وقعدت يوم بشكل ما.. حترجع آخر اليوم تلاقي الولد عنده 8 شهور...
الزهرة بيلف حوالين نفسه بالعكس.. مع إتجاه عقارب الساعة.. عكس اتجاه دوران كل الكواكب.. اللي بتدور عكس اتجاه عقارب الساعة.
والشمس بتشرق عليه من الغرب...
قطعة من جهنم بتدور في الفضاء.. أمطار حمضية.. صواعق.. معادن منصهرة.. براكين.. ضغط جوي رهيب وحرارة قاتلة...
ليه المناخ دا كده؟ بشكل قطعي مش متأكدين.. ليه مالوش أقمار؟ محدش عارف..
لغز...
الصورة التانية.. الصحراء اللي بتضربها الصواعق دي.. المفروض إنها صورة من صور "الزهرة" الحقيقية الملونة.. بس مش متأكد من صحتها و ملقتهاش على موقع ناسا.. بس موجودة على موقع "الفضاء Space.com"
الزهرة يختلف كتير عن الأرض.. كوكبنا اللي ممكن تكون متصور إنك تعرف عنه كتير.. بس الحقيقة هو بيحمل مفاجآت أكتر مما نعرف.. نتكلم عنها لاحقا ويكون للحديث بقية..
-------------
مراجع
-------------
1 - منشورات سابقة:
- https://goo.gl/H5ttvo
- https://goo.gl/F8BG9o
2 - Mallama, A. (2011). "Planetary magnitudes". Sky & Telescope...
3 - "Venus: Facts & Figures". NASA...
4 - Lopes, Rosaly M. C.; Gregg, Tracy K. P. (2004). Volcanic worlds: exploring the Solar System's volcanoes...
5 - Nimmo, F.; McKenzie, D. (1998). "Volcanism and Tectonics on Venus". Annual Review of Earth and Planetary Sciences...