من أجمل المناظر اللي ممكن تشوفها هو منظر السماء الصافية بالليل.. و أنت بتتفرج على عشرات النجوم، اللي مالية السماء.. و بعضها بيلمع و يتوهج و بعضها بيبدو خافت مطفي..
لو دققت و بحثت كويس حتلاقي إن النجوم دي مش كلها زرقاء.. في منها ابيض زي المصابيح النيون.. و في منها أصفر.. و في أزرق.. و في حتى أحمر خافت...
دا لأنها في حقيقتها شموس..
شموس زي شمسنا بالضبط.. اللي بتشرق علينا الصبح و تختفي ساعة الغروب.. بس لأنهم بعيد جداً عننا فاحنا شايفينهم كنجوم مضيئة لامعة بالليل و خلاص..
النجوم "الباردة" دي شموس.. بعضها زي شمسنا بالضبط.. حرارة سطحها 5800 كيلفن تقريبا.. و حرارة قلبها 15.7 "مليون" كيلفن...
و الحقيقة إن هم مش مئات..
نظامنا الشمسي جزء من مجرة اسمها "درب التبانة The Milky Way".. المجرة دي فيها من 200 إلي 400 مليار شمس...
و معظمهم حواليهم كواكب.. و أقمار.. النجم عشان يحمل اسم "شمس Sun" لازم يكون بتدور حواليه كواكب.. مكونة مجموعة شمسية خاصة بيها...
شمسنا بتتكون في الأساس من الهيدروجين و الهيليوم.. فيها 1% أكسجين و أقل من 1% عناصر أخرى زي الكربون و الحديد..
كرة هائلة من البلازما (بلازما في اللغة اليونانية يعني هلام أو جيلي) عمرها بالتقريب 5 مليار سنة.. و الراجح إنها في نصف عمرها.. قدامها 5 مليار سنة كمان..
ليه الكتلة الغازية المشتعلة دي مش بتتحرق في ساعتين زي الكبريت و تخلص و تفني..؟
ليه الشموس مش بتتحرق و تختفي و تتلاشي بسرعة.. و ليه أعمارها بتوصل لملايين ملايين السنين..؟
دا لأن الإحتراق اللي بحصل في الشمس مختلف عن الإحتراق العادي.. غير احتراق ورقة مثلا بتولعها بعود كبريت...
فالورقة و الكبريت مثلا بيشتعلوا بطريقة كيميائية، و الطاقة الناتجة هنا.. و هي الحرارة.. ناتجة عن اتحاد الكبريت بالأكسجين بمواد عضوية...
أما احتراق الشمس و النجوم اللي زيها، فهو احتراق نووي..
احتراق فناء...
الذرة بتتحطم و تنطلق كأشعة في أرجاء الكون.. و النوع دا من الإحتراق النووي بطيء للغاية.. لأن قليل جدا من المادة بيقدم لنا طاقة هائلة.. يخلي الشمس هي المصدر الرئيسي للطاقة على الأرض و في المجموعة الشمسية كلها...
يحصل إيه لو غابت الشمس؟ النبات يموت لأنه مفيش "تمثيل ضوئي Photosynthesis" و درجة الحرارة تنخفض لمئات الدرجات تحت الصفر و المحيطات و البحار تتجمد.. و الحيوان يموت و الأطفال يجيلها كساح.. لأن أشعة الشمس بتكون فيتامين "دال D" في أجسامنا.. و ميبقاش في غذاء فيموت البشر.. و تنقرض الحياة..
طيب لو قربت الشمس أو كبرت في الحجم؟ تغلي البحار و المحيطات و يتحرق الغلاف الجوي و تتباد الحياة برضه و تنقرض من على الأرض..
الشمس بعيد عننا بـ 149.6 مليون كيلومتر.. يعني 8 دقايق ضوئية تقريبا.. الدقيقة الضوئية هي المسافة اللي يقطعها الضوء في دقيقة.. و هي 18000000 كم تقريبا...
الشمس ليها جاذبية.. زي كواكب مجموعتنا كلها.. علشان في أعماق قلبها في "مولد كهربائي solar dynamo" رباني طبيعي.. بيولد تيارات كهرباء و مجال مغناطيسي وجاذبية.. إيه المولد دا و بيشتغل إزاي؟ دا لسه شيء مش معروف تماما في عصرنا الحالي...
صحيح إن جاذبيتها 0.0006 من جاذبية الأرض.. بس القوة دي كافية إنها تشدنا ندور حولها في دورة كاملة.. مرة كل عام...
أقرب كوكب في مجموعتنا للشمس هو "عطارد Mercury".. و مع إنه أقرب كوكب للشمس، و المفروض يكون أكثرها حرارة.. إلا إنه دا مش صحيح.. أكثر الكواكب حرارة هو "الزهرة"، لأسباب غريبة جدا، حنعرفها بعدين...
عطارد درجة حرارته بتوصل في النهار إلي 427 درجة مئوية.. و بالليل بيبقي أقل من 170 درجة تحت الصفر..
السنة في عطارد بحوالي 88 يوم من بتوعنا.. بيتم دورته حوالين الشمس في 88 يوم.. يعني لو سافرت عطارد و قضيت هناك سنة.. ترجع تلاقي نفسك غبت عن الأرض شهرين و نصف فقط...
عطارد عامل قفل على الشمس.. زي اللي اتكلمنا عنه امبارح.. اللي القمر عامله مع الأرض.. "قفل المد والجزر Tidal locking".. أو "القفل الجذبي gravitational locking".. فله وجه واحد بيقابل الشمس معظم الوقت.. لأنه بيدور حوالين محوره مرتين بس كل 3 دورات يدورها حوالين الشمس...
و بسبب الأسلوب الغريب في دوران عطارد و دورانه شديد البطء حوالين نفسه و سرعة دورانه حوالين الشمس.. فالسنة عليه تساوي 88 يوم من بتوعنا.. بس اليوم في عطارد يساوي تقريبا 59 يوم من أيامنا...!
كوكب عطارد صغير في الحجم.. أكبر من قمرنا بحاجة بسيطة.. جاذبيته ضعيفة و غلافه الجوي رقيق جدا لأنه بيحترق و يتشتت باستمرار بسبب قربه من الشمس.. بس مش هو أصغر كوكب في مجموعتنا الشمسية...
إذا خرجنا من نطاق كوكب عطارد و سافرنا باتجاه الأرض عكس اتجاه الشمس.. لازم يقابلنا مسار كوكب "الزهرة venus".. اللي العلماء قالوا لنا إنه "كان زمان شبه كوكبنا بالضبط.."
يعني عليه مياه..
و بحار و محيطات..
و غلاف جوي و أكسجين..
و حياة..
لكن للأسف بيقولوا لنا برضه إن "الزهرة" اتعرض لكارثة عجيبة.. حولته إلي جهنم حمراء..
و الموضوع دا الحديث عنه يطول و يبقي للحديث بقية...
---------------
مراجع
--------------
1 - منشورات سابقة: https://goo.gl/H5ttvo
2 - Zombeck, Martin V. (1990). Handbook of Space Astronomy and Astrophysics 2nd edition...
3 - Bonanno, A.; Schlattl, H.; Paternò, L. (2008). "The age of the Sun and the relativistic corrections in the EOS". Astronomy and Astrophysics. 390 (3): 1115–1118. ..
4 - Munsell, Kirk; Smith, Harman; Harvey, Samantha (May 28, 2009). "Mercury: Facts & Figures"...
5 - "Mercury Fact Sheet". NASA. 22 December 2015...
6 - Correia, Alexandre C. M.; Laskar, Jacques (2004). "Mercury's capture into the 3/2 spin–orbit resonance as a result of its chaotic dynamics". Nature. 429 (6994): 848–850...