أدب الرعب زي ما قلنا ابن الخيال العلمي.. قصص وأفلام الرعب بتزيد وتحقق نجاح في أوقات المجاعات والحروب والأوبئة والخوف وتدهور الروح المعنوية.
الفكرة كلها في التطهير.. دا مصطلح في عالم الرواية بيصف تاثير "المأساة" على القاريء. علم النفس بيهتم بالموضوع ده.. وبيذكر ذات المصطلح "تطهير Catharsis".
لما بيحصل حادث جنب الطريق، بتلاقي عربيات الناس والمارة بيهدوا أو يقفوا يتفرجوا على الأشـلاء والدم.. دي عملية تطهير سريعة، بيقول بها الشخص لنفسه "أنا بخير مش أنا اللي بنزف".. لما بتقرا رواية مخيفة أو تشوف فيلم رعب بتمارس ذات المبدأ.. "أيوه أنا مضغوط وعندي مشاكل وفي وباء/ حرب/ حصار.. بس الحمدلله.. أنا كويس.. أنا افضل من غيري.. دا في ناس أهه قدامي على الشاشة بقوا زومبيز وبياكلوا بعض".
قصص الرجل الخائن في المسلسلات بتعجب السيدات جدا.. بتمارس من خلالها عملية التطهير دي "آه جوزي غتت وفيه العبر بس مش خاين.. أنا لازلت في أمان" وقصص السيدة الخائنة بتثير شغف الرجال ويتابعوها.. "آه مراتي نكدية ومزعجة بس نظيفة.. أنا بخير".
حتلاحظ دا حتى كرجل في منشورات الفيسبوك للسيدات "شفتي محمود المليجي لما خان مي عز الدين مع صاحبتها في المسلسل العالمي (خد كيس الزبالة وأنت نازل؟؟) الوضيعة.. دي صديقة عمرها.. إلخ".. بينما أنت كرجل الموضوع مايشغلكش بتاتًا.. في الوقت نفسه.. وعيالك في الدرس.. أنت قاعد تتفرج على فيلم "فريدي ضد جيسون Freddy vs Jason" بمنتهى الحماس.. وبتمارس التطهير وعقلك بيسترخي.. العيال ممكن يتأخروا برا.. بس مش حيطلع لهم "جيسون".. ولا "فريدي" حيجيلهم في الحلم.. أنت مبسوط وعقلك بيطلع البخار اللي كان حينسفه.. ومراتك مش فاهمة إيه الهبل اللي انت بتتفرج عليه دا أساسا.. وكل ما بتعتقده وقتها أن حضرتك قد جننت.. وبتبدأ بوستات "ربنا يعوض صبري خير" و"إيه اللي خلاني أتجوز ما كنت كويسة".. إلخ...
المشكلة هنا أن الكاتب كمان بيمارس التطهير، وبيقع في فخ عقله الباطن دونما يشعر.. في أوقات الكساد الاقتصادي مثلا بتنتشر قصص الزومبي.. الزومبي هم الطبقة العاملة المطحونة اللي مبتلاقيش في ظل الكساد غير أنها تتجه للجريمة.. مصاص الدماء بيبقى دايمًا الرجل الثري اللي بيبتز الآخرين ويسلبهم حقوقهم.. الرجل الذئب هو في لاوعي الكاتب.. بيبقى الرجل الحر ذو الدوافع السامية.. رجل الطبقة الوسطى اللي أدت به سلسلة من الأحداث والصدمات إلى أنه يتحول لوحش.
المشكلة أننا حاليا وسط الخراب اللي في العالم مبقيناش محتاجين تطهير.. شبعنا اصلا ومشهد الدم بقى بالنسبة لنا ممل.. فلما الكاتب النهاردة بيقدم لك رواية رعب أو فيلم مخيف.. أنت دا بقى بالنسبة لك هبل.. مين فاكر لما نزل فيلم "الموتى الاشرار Evil dead" في 2014، بعد ثـورات وإرهاب ودم وقرف؟
فاكر السخرية اللي قوبل بيها على السوشل ميديا.. رغم كونه فيلم رعب؟
في ظل الانهيار والكساد والفقر والهزيمة برضه بتنتشر قصص الخارقين.. زي سلسلة افلام مارفل.. وكل واحد في عقله بيحب بطل خارق وينظر له بأمل باعتباره المنقذ والمخلص.. أو الشخصية اللي ممكن هو نفسه يتحول إليها لو اتيحت له الفرصة.. "سوبرمان" ظهر على الورق لأول مرة أثناء الكساد العظيم في أمريكا.. وحسس الناس أن في أمل...
فالناس حاليا مبتدورش على التطهير بقدر ما بتبحث عن الدراما النظيفة الرتيبة.. بتحن للماضي.. لأوقات الهدوء والاستقرار والاسترخاء.. أو العمل اللي يقدح زناد الخيال بدون توتر أو خوف.
دي حاجة مهمة لو ناوي تحترف الكتابة وبالذات في مجال الخيال العلمي.. لازم تكون على دراية بعلم النفس.. مش مطلوب تبقى "كارل يانج" يعني. بس تقرا فيه شوية.. أو على الأقل تستشير مختص.. عشان تعرف تخاطب جمهورك بإيه امتي.
التيمة 19 في أدب الخيال العلمي هي "الوعي".. ودي بيتفرع منها الإدراك الفائق للحواس.. قراءة الأفكار والتحريك عن بعد ونقل وعي شخص إلى غيره ومعرفة المستقبل والقصص دي كلها.. من أمثلتها في سلسلة ملف المستقبل كانت "مرآة الغد" وأجزاء "العقل" و"الخصم الرهيب".. عن رجل سافر للتبت وتعلم التخاطر والتحريك عن بعد على يد الكهنة.. وطور قدراته لدرجة فائقة وصار يسخدمها في الشر...
من أمثلتها في عالم السينما كان "الشر المقيم Resident evil".. وكانت البطلة فيه بتمتلك قوى عقلية خارقة. والقصة الشهيرة "د. جيل ومستر هايد Strange Case of Dr. Jekyll and Mr. Hyde" بتندرج تحت نفس التيمة دي.
20 - العوالم الموازية.. ودي اتكلمنا عنها لما أشرنا لقصة "ظل الأرض" للدكتور نبيل فاروق.. كتب برضه قصة "الأرض الثانية" حول نفس التيمة.. وكان متأثر للغاية بفكر انتصار الرايخ الثالث في الحرب، وما يستتبعه ذلك من خراب.. فمعظم العوالم الموازية اللي نقلنا إليها حملت الحبكة دي باسلوب مختلف شيق في كل مرة.
من عالم السينما في فيلم "الأوحد The One".. عن شرطي شرير من عالم موازي متقدم تقنيًا.. العالم الموازي دا في منه 124 نسخة.. كل ما تموت نسخة منك في أحدهم.. تتوزع قوتها على الباقين.
بيقرر الشرطي يستفيد من المعلومة دي وبينتقل عبر العوالم الموازية يقتل أشباهه، لحد ما بيوصل للعالم الموازي الأخير.. عالمنا.. وكان شبيهه فيه شرطي كذلك لكن نظيف.. ولاحظ أنه بيتمتع فجأة بقوة مدهشة.. وتجاعيده بتقل وشعره الأبيض بيتلاشى.. ودا أثار حيرة زوجته.. الناس بتكبر مش بتصغر.
مع الصدام بين الاثنين.. بيكتشف الشرطي الشرير أن غريمه له نفس قدراته وقوته بالضبط.. فبيبدأ يستغل التشابه بينهما كأنهما توأم.. ويورطه في سلسلة مصائب مالهاش حل.
21 - التحكم الآلي أو "السايبربانك cyberpunk ".. عالم القراصنة وتقنيات الهاكرز والكمبيوتر العملاق اللي بيتحكم في دولة.. زي سلسلة "ماتريكس".
22 - هندسة الوراثة.. أول كاتب عربي على الإطلاق كتب رواية من النوع دا كان د. نبيل فاروق.. فكتب "العدو الخفي" و"الخلية القاتلة".. عن دولة معادية صنعت بهندسة الوراثة شبيه لبطل سلسلته رجل المخابرات "نور".. وتسلل إلى منشآت عسكرية حيوية وسرق أسرار.. وبقت الدولة بتطارد "نور" الحقيقي باعتباره خائن.
من عالم السينما في فيلم "المجمّعة Splice".. عن عالم وزوجته.. جمعوا مخلوقة من مزيج من خلايا عدة حيوانات.. فكبرت إلى أنثى كاملة.. وعلى الرغم من شكلها المخيف وقعت في غرام العالم بعدما كانت بتعتقد أنه أبوها.. وبدأت تتوحش وتهاجم زوجته - أمها - عشان تستأثر به.
23 - المدن المفقودة.. مدينة أو عالم كامل في شق في جبل أو في أعماق البحر أو في أدغال إفريقية أو في أي مصيبة سوداء نائية، ومانعرفش عنه اي شيء.. كتب د. نبيل في التيمة دي "الستار الاسود".. عن مدينة تحت الأرض بيحيا فيها مخلوقات متوحشة آكلة للبشر أشبه بالشياطين في الوجدان الجمعي للبشر.. وفي عالم السينما كان في "كنوز الملك سليمان" و"إنديانا جونز" وسلسلته.. وطبعا فيلم "كونغو" اللي ذكرناه من قبل.
من الروايات اللي بتدخل تحت التيمة دي قصة "رحلة إلى مركز الأرض Journey to the Center of the Earth" لـ"جول فيرن".. وفيها بيلاقي الابطال عالم كامل بنباتاته بوحوشه وديناصوراته ومحيطاته.
في 2004 كان في فيلم "الفضائي يواجه المفترس Alien vs predator".. عن مدينة مفقودة تحت ثلوج القطب.. فيها أنثي لوحش فضائي مجمدة ومحملة بالبيض.. بتتفك من التجميد آليا بميكانزمات معقدة كل 100 سنة.. وتضع بيض بيطلع منه وحوش فضائية في انتظار "المفترس".. ودا كائن فضائي آخر بييجي هنا يمارس صيد الوحوش دي على سبيل الرياضة.
الفضائي كتلة أنياب ومخالب وذيله فيه زائدة عظمية زي رأس الحربة.. ودمه حمض قوي للغاية.. بينما "الصياد/ المفترس" متقدم تقنيا ومعاه أسلحة... في فيديو للفيلم دا في أول تعليق.
الفيلم دا بيحمل تيمة فرعية هي "البشر بين قوتين".. البشر بكل ضعفهم وتقنياتهم المحدودة وسط قوتين هائلتين.. التيمات الفرعية كتير.. من التيمات الرئيسية دي تقدر توصل لها لوحدك بسهولة.
24 - "ما وراء العوالم التي نعرفها Beyound the fields we know".. في القصة دي في عالم مختلف تماما له مفرداته وقواعده ومخلوقاته.. وحتى ابطال القصة ممكن ميكونوش بشر أصلا.. زي سلسلة "سيد الخواتم The Lord of the Rings".. وعالم "أزجارد" في قصص "مارفل". من اللي كتبه د. نبيل تحت التيمة دي رواية الجيب "سجن القمر" و"نقطة الصفر".
مزج بعض التيمات.. "أكتر من theme" يعني في عمل واحد.. شيء مفهوم ومقبول وبيمنح قصة الخيال العلمي ثراء.. بس دا يندرج تحت "تقنيات الكتابة".. اللي نقدر بعدما خلصنا التيمات نتكلم عنها في الحلقة القادمة...
ويبقى للحديث بقية.
---------
المنشورات السابقة أول تعليق.