في تيمة الخيال العلمي "الانتقال الآني Teleportation".. بتتكتب قصة قصيرة اسمها الذبابة.. العالم "كارل" عمل التجربة على نفسه.. ونقل نفسه آنيا من مكان لمكان في معمله.. لكن كان معاه ذبابة في حجرة النقل.. اتبدل وجهه بوجه الذبابة.. ومعرفش يعمل ايه.. فوضع رأسه الذبابية تحت مكبس معدني قوي.. وضغط الزر.. وتخلص من حياته.
تيمة القصة دي بتحمل في طياتها تيمة أخرى من عالم الخيال العلمي.
8 - التحول البيولوجي Metamorphosis.. في رواية لـ"كافكا" بنفس الاسم.. بطلها بيتحول لصرصار عملاق. "كافكا" عامة كان قنبلة تفاؤل.. وعشان تكتب بسوداويته محتاج أنك تكون مجنون تقريبًا.. في كذلك القصة القصيرة الشهيرة "الذبابة" للكاتب الفرنسي "جورج لانجيلان George Langelaan".. اتعملت فيلم بنفس الاسم "الذبابة The fly"... العالم غريب الأطوار "سيث بريندل" بيعمل التجربة دي.. وبتدخل معاه ذبابة لغرفة الانتقال الآني.. بينتقل آنيا إلى غرفة الانتقال الأخرى.. وبيخرج حاسس بطاقة ونشاط غير طبيعيين.
"سيث" بيفاجأ بنفسه بقى أقوى من المعتاد.. سريع نشيط.. اتكلمنا عن الحشرات من قبل وعرفنا إزاي هي في الحقيقة قوية جدًا.. الحشرات لقوها في القطب وفي البراكين وفي قلب المفاعلات النووية. فالحقيقة "سيث" امتلك قوى فائقة، لما امتزجت جيناته بجينات الذبابة.
صحيح بقى غتت ولزج ورزيل زي الذباب بالضبط.. بس هو مكانش يعرف ايه اللي حصل، وتصور أن الانتقال الآني أنعش خلاياه ونظف جسده من السموم.. لحد ما بقى التحول واضح فج.. وعرف أن الكمبيوتر لقى معاه كائن تاني في غرفة الانتقال.. فراح مازج جيناتهم ببعض.
ممكن دا يحصل في الحقيقة زي الفيلم أو القصة؟ في الواقع.. علميًا.. لا.. الإنسان عنده 23 زوج من الكروموسومات.. الذبابة عندها 6 فقط.. الحمض النووي البشري لما بيتلف أو بيتغير، ودا بيحصل في أجسادنا مئات الآلاف من المرات يوميا.. الخلية بتصلحه.. ولو التلف فاق الإصلاح.. وتحول لخطر.. الخلية بتتخلص منه.
فالحقيقة لأ "سيث" مكانش حيتحول لذبابة.. كان ممكن يمرض ويلزم الفراش عدة أيام لحد ما خلاياه تصلح الضرر.. أو على أسوأ الفروض، كان أصيب بسرطان ومات. دي إذن قصة من "الخيال العلمي السلس". القصة دي فيها التيمة رقم 9 "مخاوف البشر Human fears".. التحول والتغير ورعب التحلل الجسدي.. اللي بتشوفه في كل أفلام الزومبي.
9 - تيمة المخاوف البشرية لها فروع كتير جدًا.. أشهرها أفلام الموتى الأحياء.. الزومبي.. اللي هي خيال علمي سلس بلا جدال.. مفيش حد ميت حيصحي يجري ورا الناس يعضهم.. الأفلام دي بتمشي على حافة الخيال العلمي السلس كمان.. يعني خطوة كمان وتتحول لهطل وتقع في البكابورت وتندرج تحت بند الهبل.
أفلام الزومبي أو الموتى الأحياء، دايمًا بتتكلم عن فيروس مالوش وجود فترة حضانته دقيقتين.. حاجة مش موجودة في عالم الفيرولوجي مطلقًا، بيصيب الجثث، فينهضوا ويتحركوا ويتحولوا إلى آكلي لحوم بشر، يقتلوا الأصحاء فينهضوا من الموت بنفس العدوى، وإلخ. كمان بتلاحظ أن الزومبي "مبياكلش" الشخص اللي بيطارده.. هو بيعضه ويمشي.. "بيدوقه" يعني بس.. أو بيقتله ويسيبه يتحول لزومبي بدوره.. لأن لو غير كده كان الفيلم خلص بعد اربع دقايق.
الفرضية دي سينمائيًا مثيرة جدًا وأنا بحبها.. بس علميًا.. دا مجرد هبل صافي، ومستحيل التحقيق.. أن ميت يتحرك ويجري ورا آخرين يعضهم.. دا مستحيل.. طالما الجسد مفيهوش دورة دموية.. دم بيجري في العروق... الخلايا محرومة من الأكسجين، يعني بتتفكك وتنهار.. مفيش "أدينوسين ثلاثي الفوسفات Adenosine triphosphate".. يعني مفيش مخلوق حيعرف يخليها تتحرك.. إنشالله يكون إبليس شخصيًا.
في تيمة "التحول" مش لازم أبطالك تتحول لزومبي وصراصير ودبان والقرف دا.. أنت مش قاعد تكتب في المجاري يعني. ممكن "الرجل الأخضر" و"الرجل العنكبوت" و"الشرطي الآلي Robocop" نصف البشري ونصف الآلي.. دي نماذج كويسة برضه.. أو حتى "لوسي Lucy" في الفيلم الشهير بنفس الاسم.. تحولت إلي كيان خارق غير مرئي كلي القدرة يفوق البشر.
10 - تيمة إرث عالم آخر/ حضارة أخرى: هنا أنت بتبقى قاعد في هدوء وبتلاقي شيء جايلك من عالم آخر.. بتحفر بتلاقي إرث من حضارة سابقة.. الإرث دا غالبا شيء خارق أو تقنية متطورة ممكن تقلب العالم رأسًا على عقب.. الإرث دا سلاح ذو حدين. السيد "جوناثان كنت Jonathan Kent" وزوجته كانوا قاعدين في حديقتهم في أمان الله.. فلقوا صاروخ صغير بيهوي جواه كبسولة واقية فيها رضيع.. الرضيع دا شمس الأرض منحته قوة خارقة رهيبة.. "سوبرمان".
الأسرة دي كانت ممكن تستخدم سوبرمان وقوته في الشر، ويتحدوا القانون ويبقوا زعماء عصابة أو قتلة محترفين أو موظفين في الحي.. أو حتى يحكموا العالم.. لكن الأسرة اختارت طريق الخير.
في فيلم الخيال العلمي "المفترس The predator" في 2018.. بييجي كائن فضائي من كوكب بعيد.. دي مش أول مرة نقابله.. دي سلسلة افلام كان دا آخرها.. محدش عارف هو المرة دي جاي ليه.. الأرض بتحاربه في استماتة وبتسعى للسيطرة عليه أو قتله.. لكن الحقيقة هو كان جاي يمنح تقنية هدية للبشر، تنقذهم لأن كوكبه قرر يحتلنا.
"د. نبيل فاروق" قدم لنا التيمة دي في الآلي س18.. إرث حضارة سابقة.. وفي قصة "الساحر".. عن الفضائي اللي جه الأرض وبيسعى خلف رجل بعينه.. الأرض بتحاربه برضه.. لحد ما بيتضح أن الفضائي دا ما هو إلا رجل أمن شريف في كوكبه.. بس جه ينقذ الأرض من إرث أسود كفيل بتدميرها.. إرث عمره عشرات السنين.
12 - الخارقون: تيمة شهيرة قدمها د. نبيل في رواية جيب بنفس الاسم.. العالم دا جه منه سوبرمان والرجل العنكبوت والرجل الأخضر.. البطل الخارق لازم يكون له نقطة ضعف، وإلا الرواية حتبقى مملة جدًا.. لو أنا كقاريء عارف أنه لا بيموت ولا يمكن هزيمته. الخارق كذلك لو بطلك، لازم يكون له أشرار على نفس مستواه.
مش لازم البطل الخارق يكون بيطير أو بيخترق الجدران.. البطل الخارق ممكن يبقى عبقري.. ذكي.. واسع الحيلة.. ودا سر تفوقه.. "ريديك Riddick" اللي في المشهد الثاني في الفيديو المرفق نموذج لدا.. عمل جراحة في عينيه خلته بيشوف في الظلام.. عدا ذلك هو ذكي واسع الحيلة لدرجة مدهشة.
"ريديك" بيعرض تيمة جديدة هي رقم 13.. الفلسفة العلمية.. "ريديك" أوقات كتير مش حتعرف هو طيب وللا شرير.. الحقيقة هو بشري.. فيه الطبيعتين.. بس دايما في النهاية بتغلب عليه طبيعة الخير.
باتمان نموذج لبطل خارق مبيملكش أي قدرة غير عادية.. بس ثروته خلته يوظف في شركته عقول عبقرية.. بتزوده بتقنيات وأسلحة متطورة.. هو بدون التقنيات مجرد رجل قوي البنية يجيد العراك. باتمان في رسالة دكتوراة رصينة أمريكية في الأدب، هو أقوى الابطال الخارقين.. لأنه من غير تقنياته الخارقة.. فهو رجل بيجيد فنون القتال وبيدافع عن نفسه بقبضته العارية ويطلق النار ويقود سيارة بمهارة ويقفز من مروحية ويتسلق الجبال.. بينما سوبرمان والعملاق الأخضر والرجل العنكبوت، وحتى "ثور Thor" مثلا بدون قدراتهم بيبقوا هشين بلا قيمة.
14 - "نهاية العالم Apocalypse".. البطل الوحيد اللي ماشي وسط أرض خراب.. بيدور علي أي حد ناجي يؤنس وحدته زي "الأسطورة I'm legend" بطولة ويل سميث.. في مثال كذلك في فيلم "2012".. الشهير.. الحضارة انتهت وانهارت أو على وشك بسبب كارثة طبيعية، وباء، حرب نووية، الخ.. وفي مجموعة ناجين.. كل واحد بيحاول ينجو بنفسه...
من أجمل الأفلام اللي حملت التيمة دي فيلم "كتاب إيلاي The book of Eli" لـ"دينزل واشنطن".. رجل وحيد بيسعى لأنه يوصل لجزيرة عليها آخر قوم متحضرين من بني البشر بعدما انهارت الحضارة.. وبيقاتل آكلي لحوم البشر والعصابات والمدمنين، عشان يوصل ويقدم للحضارة دي شيء ثمين للغاية.. الأخير من نوعه على وجه الأرض. في لقطة من الفيلم في المشهد رقم 3.. الفيلم فيه حبكة مدهشة.. أن البطل أصلا في قلب العالم المخيف المعادي دا.. غير مبصر.. ضرير.
15 - الرومانسية: الحب المستحيل.. بين رجل بشري وأنثى فضائية تشبه البشر أو العكس.. في أكاديميين بيحاولوا يدفعوا التيمة دي بالعافية لأنها تتحول لـ "الخيال العلمي الشهواني Erotic Sci-fi" ومش فاهم ليه ولا إزاي الحقيقة..ممكن أكتبلك رواية عن قصة حب في الفضاء، بكل ما فيه من مصاعب وأخطار وحتى جـنـس.. بس الجـنس لوحده حيتعمل عليه رواية خيال علمي كاملة إزاي؟ ممكن تلاقي دا في الكوميك ستريبس المصورة الرخيصة.. بس في رواية أدبية علمية كاملة تتمحور حوله.. دا تقريبًا مستحيل.
من القصص الرومانسية دي، قصة لدكتور نبيل اسمها "الأعماق" في سلسلة كوكتيل 2000.. بطل القصة مهندس فنية عسكرية التقي بغواصة لكائنات من أهل أطلانتس، وحب فتاة فيهم وحبته.. وصلح لهم الغواصة.. لكن قصة الحب انتهت بفراق اليم.
مش شرط قصة الحب تقود للجـنـس أو الحب بمعناه الدارج بين "رجل وامرأة" أو الزواج في عالم الأدب، وإلا حيبقى فيلم عربي لزهرة العلا وشكري سرحان.. مدرسة الرومانسية بتشمل العلاقة بينك وبين الله.. الطبيعة.. الأسرة والأب والأم والوطن.. الخ.. تعريف الرومانسية في الأدب هو الرواية اللي بتسرد علاقة روحية في إطار من المغامرة والغموض والقيم العظمى كالشجاعة وغيرها.. وليس فقط "قصة حب". علاقة الغوريللا ببطل قصة "كونغو" كانت رومانسية بحتة، لأنها اعتبرته أبوها.. وعلاقة الطفل الآلي "ديفيد" في "ذكاء صناعي AI" بالسيدة اللي اشترته كانت رومانسية تماما.. رغم كونه روبوت.. بس هو اعتبرها أمه.
16 - "اللغة Language" من تيمات الخيال العلمي.. تخيل أنك قابلت فضائيين جايين وبيحاولوا يتواصلوا معك.. محدش بيتكلم لغة الآخر.. النقوش اللي بتشوفها على جدران كهف في المريخ بلغة مجهولة.. اللغة دي لو سبرت اغوارها ممكن توصلك لسر خطير.. اختلاف التون والصوت واللهجة حوّل الموضوع لسلاح قاتل في فيلم "هجوم المريخ Mars attack".. اتضح أن أي صوت بشري بطبقة معينة بيغني بيخلي رؤوس الغزاة تنتفخ وتنفجر.. ودا اللي أنقذ الأرض من الغزو.. طبعا بعيدًا عن أن مثلا طبقة صوت "حمو بيكا" ممكن تخلي رأسك انت شخصيًا تتضخم وتنفجر.. فالفكرة في الفيلم كانت جديدة.. مبتكرة.
في فيلم "المفترس" اللي اتكلمنا عنه فوق.. في طفل متوحد.. التوحد زحف به إلى حواف العبقرية، ففك شفرة لغة الغزاة وفهمها وتعامل مع أجهزتهم وأنقذ العالم. في فيلم "يوم الاستقلال Independence day" فك لغة الغزاة الفضائيين خلا البشر يفكوا لغة برمجتهم ويبعتولهم فيروس مبرمج بذات اللغة يتلف أجهزتهم. التيمة مش مملة كما يبدو من اسمها للوهلة الأولى.
18 - تيمة حروب الفضاء.. طبعا كلنا عارفين حرب النجوم والقصص دي.. بتتفرع لعدة تيمات أخرى منها "الصدام العسكري" والصراعات السياسية.. لكن الصدام العسكري والصراعات السياسية مش تيمات رئيسية.
التيمة رقم 19 هي "الوعي consciousness " بما فيه الإدراك والتنبوء بالغد و الإدراك الفائق للحواس.. ودي نتكلم عنها مع بقية التيمات المرة الجاية بإذن الله.
ويبقى للحديث بقية.
--------------
- الفيديو أول تعليق.
- المنشورات السابقة أول تعليق.