تيمات الخيال العلمي حوالي 24 تيمة.. البعض بيصنفهم 25.. حنتكلم عن أهمهم ونسيب أسماء التيمات الباقية للي يحب يبحث وراهم: 1 - "لقاءات مع كائنات غريبة First contact with aliens".. ودا يعني أن ابطال قصتك حيلتقوا بكائنات أخرى غير بشرية.. من كوكب آخر.. من كون آخر.. من بُعد آخر.. من عالم موازي.. أو حتى من أعماق البحر أو الأرض. مش شرط الكائنات دي تكون عاقلة أو متحضرة.. ممكن كذلك.. وممكن تبقى بكتيريا.. كائنات غير مرئية.. كائنات هلامية لا شكل محدد لها زي الأميبا.. كائنات اشبه بالبشر.. أنت وخيالك. د. نبيل رحمه الله، قدم أشكال كثيرة في قصصه اللي بتحمل التيمة دي.. كان أجملها على الإطلاق في رأيي "شيطان الفضاء".. ودا كائن عاقل غير مرئي ولا مادي من كوكب قومه متحضرين.. طردوه ونفوه في الفضاء لأنه شرير حقير.. فوصل للأرض واكتشف أنه يقدر يحتل عقول وأجساد الكائنات الحية.. زي الحشرات والحيوانات والبشر.. ويتحرك من خلالها. ممكن تتناول التيمة غرباء أكثر تحضرًا أو أقل تحضرًا.. أو همج. من الروايات والأفلام اللي تناولت التيمة دي بنجاح كانت "حرب العوالم War of the worlds".. لـ"هربرت جورج ويلز H. G. Wells".. عن كائنات فضائية استعمارية شريرة من المريخ.. بتفوقنا تقنيًا.. وبتيجي تحتلنا ومبنقدرش نتصدى لها.. فبيتصدى لهم فيروس الأنفلونزا.. ويبيدهم جميعًا عن بكرة أبيهم. الروايات اللي من النوع دا بتطرح سؤال فلسفي دايمًا.. لو جت كائنات ذكية تحتلنا وتسلب مواردنا تبقى شريرة.. طيب لو قابلنا احنا كوكب كله خيرات، وعليه كائنات شبهنا ولسه تقنياتهم وأسلحتهم زي ما كنا في القرن العاشر مثلا.. واحتليناهم.. كده أحنا اشرار برضه؟ د. نبيل ناقش الجزئية دي بنجاح في العدد 124 من ملف المستقبل.. "الغزاة". 2 - الطيران وتحدي الجاذبية.. ودي تيمة قديمة قدم الإنسان نفسه.. حلم الطيران راود البشر كتير جدًا.. أرباب مصر القديمة كان فيهم كيانات بتتحدى الجاذبية وتطير زي "حورس".. وفي الميثولوجي الإغريقية كان في "إيكاروس" والحصان المجنح "بيجاسوس Pegasus". طبعًا مفيش حاجة اسمها "ما هم اخترعوا الطيارات خلاص حكتب أنا ايه في الموضوع ده".. لحد دلوقتي المحركات "الفرط ضوئية".. يعني اللي بتتجاوز سرعة الضوء، موضوع شائق في الخيال العلمي السلس.. الجاذبية أثرت على الزمن في فيلم "بين النجوم Interstellar ".. وخلت الساعة على الكوكب ذو الجاذبية العاتية تساوي عندنا سبع سنوات والإفلات منها معجزة.. الفيلم دا من افلام الخيال العلمي الصعب بالمناسبة. تخيل كذلك لو بتتحكم في الجاذبية نفسها.. وبقفاز خاص تشاور للواء دبابات وترفعه عن الأرض كيلومتر كامل وترزعه فجأة تحوله لحطام.. لسه كل التيمات مفتوحة.. المهم المعالجة اللي حتعالج بيها التيمة. 3 - السفر عبر الزمن.. تيمة بتشد انتباه الجميع تقريبًا ولا تموت ابدًا.. من أنجح رواياتها كانت "آلة الزمن The Time Machine".. لـ"هربرت جورج ويلز H. G. Wells" كذلك.. وفيها بيسافر للمستقبل وهنا بيمزج تيمة السفر عبر الزمن بتيمتين أخريتين.. الأولى هي "اليوتوبيا" واللي بتخفي في أعماقها دستوبيا مروعة.. الدستوبيا هنا هي تيمة الخيال العلمي الثانية. "اليوتوبيا Utopia" هي المدينة الفاضلة اللي بتوفر لمواطنيها كل سبل الراحة وتقريبًا معندهمش اي مشاكل.. و"الدستوبيا Dystopia" هي عكس ذلك. يعني الأرض الخراب اللي الناس بتاكل بعض فيها بعد مجاعة أو كارثة نووية. مزج التيمات عادي ومقبول في الخيال العلمي وبيدي قصصه رونق.. اليوتوبيا اللي قابلها بطل قصة "ويلز" هو أنه لقى اليوتوبيا على سطح الأرض.. والناس سعداء ومبسوطة وهادئة ومابيشتغلوش ومعندهمش مشاكل لدرجة أنهم جالهم تخلف عقلي.. وفي الأعماق تحت الأرض كان العمال الأشداء.. الطبقة المطحونة.. ودول كانوا بيلبوا طلبات اهل السطح ويقدمولهم أكلهم ولبسهم وكل ما يلزمهم.. وبياكلوهم في الآخر. يعني العمال كانت بترعى السادة عشان تاكلهم.. زي ما بتربي أنت بالضبط قطيع من الماعز. 4 - تيمة العنصر الجديد: في الفيديو المرفق في مشهد 1، حتشوف تيمة العنصر الجديد.. فريق "رجال إكس" رايحين يجيبوا سبيكة لمعدن مجهول نزل مع نيزك.. "الأدامانتيام Adamantium ".. معدن فائق القوة حيحقنوه في جسد أحدهم فوق هيكله العظمي، فيبقى رجل لا يقهر. في عالم "مارفل" في "الفيبرانيام Vibranium".. معدن فائق الصلابة شديد الندرة مش موجود غير عند بلد معينة في إفريقية.. والبلد دي تقدمت تقدم علمي مدهش لما اكتشفوه.. درع "كابتن أمريكا" مصنوع من المعدن نفسه. في عالم مارفل كذلك الرجل الحديدي عمل عنصر جديد عشان يستعمله في مولد الطاقة اللي بيضعه في صدره.. حتلاقيه في الفيديو في مشهد 2. خيال علمي سلس كالعادة.. على الأقل المرة دي مارفل اهتمت بأن "طوني ستارك" يلبس منظار خاص عشان وهج شعاع الليزر القوي ده مايحرقش شبكية عينيه ويعميه. مش لازم العنصر يبقى "وهمي" زي عناصر "مارفل".. واسمه "فيبرانيام" أو "أدامنتيام" والقصص دي.. ممكن يبقى عنصر معروف بس فيه خاصية فريدة.. في فيلم "كونغو" اللي اتكلمنا عنه امبارح.. العنصر الجديد كان ماس.. مجرد ماس.. بس نقي وله خواص فريدة تخليه ذو أهمية بالغة في انتاج الليزر فائق القوة. في عالم "د. نبيل" في س18. مصنوع من سبيكة من معدن مجهول معرفناهاش لحد النهاردة، تحملت أنه يغوص في قلب الشمس ويؤدي مهمة في درجة حرارة 15 مليون درجة مئوية.. ويغوص في اعماق المحيط ويتحمل ضغط جوي هائل.. وميأثرش فيه اي سلاح في الكون. 5 - "التاريخ البديل Alternate history".. يحصل إيه لو دول المحور انتصرت في الحرب العالمية الثانية؟ بل يحصل إيه لو انتصر الأتـراك في الحرب العالمية الأولى واحتلوا العالم.. كان حياتنا بقى شكلها ايه النهاردة؟ يحصل إيه لو سافرت عبر الزمن للماضي مثلًا في رواية خيال علمي سلسل.. وقتلت "هـتـلر" وهو طفل رضيع؟ بلاش تقتله.. يحصل إيه لو ربيته تربية مختلفة؟ "تأثير الفراشة" هنا بيعمل حلقة من التأثيرات الأخرى ممكن بفعل بسيط تاثر في العالم أجمع.. في "لوسيفر1" المجلس العسكري المصري أغتيل كل أفراده.. ومبقاش في 30 يونيو.. واتحققت أحلام السادة النشطاء واتفكك الجيش، وساد التيار الديني.. يحصل إيه ساعتها في مصر والعالم؟ من الروايات الناجحة اللي قدمت تاريخ بديل كانت "صناعة التاريخ Making History".. وفيها شاب بيدرس تاريخ في أميريكا، عانت اسرته في نير عصر الرايخ الثالث.. بيتعرف شاب آخر عنده آلة زمن تخليك "تشوف" الماضي.. تتفرج بس.. بيعدلوا الآلة وبينجحوا يبعتوا أجسام غير حية.. جمادات.. للماضي في وقت ومكان معين.. وبيتخذوا قرار قاطع.. "هـتـلر" لا ينبغي أن يولد.. لازم يتولد قائد ألماني طيب رحيم ميرتكبش نفس الأخطاء والجرائم.. بيحطوا خطة، وبيبعتوا برشامة دواء معينة بتسقط في لحظة معينة عبر الزمن في كوب مشروب حيشربه أبو "هـتـلر".. وبتقع بالفعل في الكوب.. البرشامة دي بتجيب عقم.. بيشربها الحاج "ألويس هـتـلر" بالفعل.. وبيصير رجل عاقر.. مفيش "هـتـلر" خلاص. لما الشاب بينام ويصحى، بيكون التاريخ كله اتغير فبالتالي الحاضر اتغير بالكامل.. حيلاقي مصيبة.. لما مظهرش "هـتـلر".. وصل لحكم ألمانيا رجل اسمه "جلودر Gloder ".. ودا كان أزفت من "هـتـلر" بمئات المرات.. وعكس الفـوهـرر الصدامي.. "جلودر" بدأ بخبث ونعومة كالثعبان وعمل سلام مع الكل.. وبدا مسالم وديع.. لحد ما وصل لسر القنبلة الذرية أولا بأبحاثه السرية.. واحتل أوروبا كلها ونصف العالم، وحول أمريكا لمجتمع يـمـيني متـشـدد، يحكمه مـتـطرفين.. في تاريخ بديل من أكثر التواريخ اللي يتخيلها المرء سوادًا. من الروايات دي في عالم د. نبيل فاروق كانت "عبر العصور" و"فارس الزمن" و"الف عصر".. وكلهم بيناقشوا فكرة حقبة الرايخ الثالث كذلك.. يحصل إيه لو أنتصر؟ في عالم مخبول اسمه "د. خالد".. بيسافر للماضي ويقرر يمنح الرايخ الثالث تصميمات اسلحة مستقبلية رهيبة.. ويحذره من المواطن اللي اتهزم فيها ويديله سر القنبلة الذرية.. طبعًا عشان لما تنتصر ألمانيا.. يزيحه هو عن الحكم ويحكم العالم بداله. في كذلك للأديب الراحل رواية اسمها "ظل الأرض".. بتتكلم عن نفس التيمة بس من الخيال العلمي الصعب.. مفيش سفر للماضي.. في "عالم" موازي من عوالم نظريات "شرودنجر".. أستاذ ميكانيكا الكم، الحائز على جائزة نوبل سنة 1933... العالم الموازي دا الـنـازيين احتلوه كله.. وبدأوا يزحفوا إلى كواكب وعوالم أخرى.. وبيحاولوا يعبروا إلى عالمنا ويحتلونا. 6 - الروبوت.. الإنسان الآلي، سواء طيب أو شرير.. ممكن تقوم قصة بكاملها حول روبوت. زي س18 "المقاتل الأخير" و"غزو الأرض" للدكتور "نبيل فاروق".. أو "انا روبوت I, robot" لـ"عظيموف Azimov" والتحفة الخالدة "ذكاء صناعي AI".. المبني على قصة قصيرة لكاتب الخيال العلمي البريطاني "إين واطسون" اسمها "اللعب الخارقة تبقى طيلة فترة الصيف Supertoys Last All Summer Long".. وفيها شركة بتصنع روبوت شبه بشري "أندرويد Android".. للأهالي اللي يحبوا يتبنوا طفل.. لكن الأسرة اللي بتقتني الروبوت الصغير دا بتنجب بعد ذلك.. وبيبدأ الروبوت يقلد الطفل البشري وياكل زيه ويشرب زيه.. ودا بيتلف دوائره ويخليهم يصلحوه كل شوية.. وبيصاب بالغيرة من الابن البشري وبيحاول يخلي الأم البشرية تلتفت اليه وتهتم به بدوره.. فلما بيصارحوه أنه روبوت بيرفض تصديق دا.. وبيحاول يقنعهم أنه ابنهم.. لحد ما بيتخلصوا منه ويتركوه وحيد.. بقية القصة هو بيحاول يوصل لأمه اللي مش فاهم تركته لاي سبب.. عشان يقول لها أنه بيحبها وتحكي له حدوته زي ما بتعمل مع ابنها البشري. الروبوت بيبقي طيب ولطيف أو شرير.. الروبوتس في روايات "عظيموف" بيحكمها 3 قوانين صارمة.. مزروعة في برنامجها.. بيخلي إيذائها للبشر أو تمردها عليها مستحيل.. ومع ذلك بيمرق روبوت معين عن سلطة البشر في "انا روبوت I, robot" وبيستقل بإرادته.. بيتضح السر لاحقًا هو أن صانعه صممه من أجل أنه يتمرد.. لأن الكمبيوتر الأم حيحاول يتحكم في الروبوتس لإخضاع البشر، وكانت مهمته هو أنه يتصدى للسوبركمبيوتر الشرير. حاليًا بدأت أنواع جديدة من الروبوتس تظهر.. الروبوتس النانو.. المشهد 3 من عالم مارفل.. الرجل الحديدي وهو بتتكون حوله بذلة معدنية جديدة بطريقة مبتكرة.. البذلة دي عبارة عن آلاف الروبوتس الصغيرة، زي البراغيث.. بتتضافر معًا عشان تعمل "شيء ما".. جهاز معينة أو آلة معينة أو درع.. أو حتى سترة حديدية. اسمها "الضباب النافع Utility fog". الروبوتس دي ظهرت للمرة الأولى في عالم الواقع على الورق كفكرة وضعها خبير النانوتكنولوجي البروفسيور "جون هول John Storrs Hall" سنة 1989. لازالت ماتحققتش كما ينبغي بس العلم صار على أول الطريق.. في مهندس في معهد "ماساتشوستس للتكنولوجيا MIT" صنع قطيع روبوتات صغيرة زي النمل.. بتتضافر معًا للقيام بوظيفة واحدة، زي أنهم يتحولوا لرافعة مثلا. من الفكرة دي ظهرت فكرة "الكلايترونيكس Claytronics".. روبوتس دقيقة للغاية في حجم جسيمات ذرية.. ولها ذكاء صناعي.. وبتتضافر معًا عشان تؤدي وظيفة ما.. الباب دا فتح فكرة جديدة مرعبة في عالم الخيال العلمي لسه محدش كتب فيها. الفكرة اسمها "جراي جوو" أو "صمغ جراي Gray goo".. تخيل فيه العلماء أن الروبوتس دي ممكن تفرّ من سيطرة البشر، وتبدأ تتكاثر عن طريق أنها تعمل ملايين النسخ من نفسها.. فتملأ الأرض والتربة والماء بجزيئاتها الرمادية المعدنية.. وتدمر المسكن الطبيعي للبشر وتخرب الأرض بتكاثرها لحد ما تفني الحياة عليها. عشان تعرف إننا علميًا رايحين في الكنافة.. أو بمعني أدق في الـ"جراي جوو".. فالمصطلح ظهر في الثمانيات. من أربعين سنة.. ما يقرب من نصف قرن. 7 - في تيمة "الانتقال الآني Teleportation".. ودي ظهرت في فيلم شهير اسمه "الذبابة The fly".. عن قصة قصيرة بنفس الاسم صدرت عام 1957.. عن عالم صنع جهاز انتقال آني.. واثناء تجربته على نفسه دخلت معاه في حجرة النقل ذبابة منزلية عادية.. فامتزجت جيناتها بجيناته.. وبدأ عبر الوقت، يتحور إلى كيان مرعب... دا المشهد الرابع والأخير في الفيديو مع البوست. يا ترى الفيلم دا ممكن يحصل فعلًا في الواقع؟ يعني "خيال علمي صعب".. وللا خيال علمي سلس.. وإيه الأدلة على دا... دا نعرفه المرة القادمة بإذن الله... ويبقى للحديث.. بقية. ------------------ - المنشورات السابقة أول تعليق.