سواء في خطتك للدايت قررت تتدرب كارديو أو بأوزان أو كالستنيكس.. ففي نصيحة واحدة هي اللي فيها خلاصة الموضوع كله..
"كن جادًا Get serious"..
وقت التدريب يعني "وقت تدريب".. ويعني إنك تتعامل معاه بجدية.. 25 - 30 دقيقة جد، أحسن من ساعة ونص دلع..
صالات الحديد و الفعاليات الرياضية بتتحول في عالمنا العربي كله من الخليج للمحيط إلي قعدات دردشة.. و في الجيم الموضوع بيتحول إلي "أهلاااًا عباس.. شفت امبارح فيلم كذا؟ مش زكي ضرب مراته امبارح فقتلته بالليل و عبته في أكياس؟ شفت الـ... إلخ"..
ناهيك عن الشخص العبقري اللي بيدخل صالة الحديد و أنت رافع وزن ثقيل و ييجي يمد لك إيده مصافحًا..! والمطلوب إنك تسيب الوزن يقع يهشم جمجمتك و تصافحه و إلا تبقى وقح قليل الذوق..
وقت الرياضة للرياضة.. حاول ما تصاحبش حد في الجيم لو من مرتاديه.. و دا حيهدم لك حجة "أصل مكسل أروح لوحدي".. لأ.. روح لوحدك أحسن.. و أعمل قائمة موسيقي كويسة تشجعك و حط سماعات في ودنك.. و خلي علاقتك بالأعضاء والمتدربين الآخرين علاقة "هز الرأس" و "صباح/ مساء الخير".. و دمتم..
الشخص المتطوع كمان اللي بينط لك في كل تدريب يحاول يثبتلك إنك حمار و إنه عبقري.. حاول تتجنبه تمامًا.. لو عندك سؤال اسأل المدرب نفسه.. وحاول تكون مختصر دقيق وعارف أنت بتسأل عن ايه وعايز ايه.. يعني "كابتن لو سمحت وريني تكنيك كذا".. من غير رغي.. لأن الكابتن دا راجل شقيان منهك بيتكلم مع مئات يوميًا و بيقضي 8 - 9 ساعات يوميا في خزعبلات من طراز "أنا عايز أطول.. أنا عايز أصغر صدري و أكبر حواجبي.." إلخ..
إيه افضل نوع رياضة؟ الحقيقة أفضل الأنواع هو المزيج بين الثلاثة.. الكارديو يوم أو يومين أسبوعيا و الأوزان ممتزجة بالكاليسنتيكس باقي الايام..
لازم تستريح يوم كامل ماتعملش فيه حاجة.. إلا أنشطتك اليومية العادية.. التدريبات في حقيقتها بتنهك خلاياك العضلية و تسببلك تمزقات دقيقة.. عشان كده تمرين الأوزان ممكن يسببلك ألم بعده.. الألم دا بيحبه الجماعة بتوع كمال الأجسام و بيرددوا عبارة "لا فائدة بدون ألم No pain.. no gain".. مع إن الجملة دي في الكنافة علميًا..
عضلاتك ممكن تستفيد من التمرين و متتألمش.. لو خرجت من الجيم مرهق و حسيت بالتوتر و الانقباض في عضلاتك بدون ألم فأنت استفدت برضه عادي.. دا يعني إنك شربت مياه كافية.. خدت بوتاسيوم وصوديوم و عناصر نادرة كافية..
مع تمزيق طبقة رقيقة من أليافك العضلية وقت التدريب.. عضلاتك بتبني ألياف عضلية أكبر وأقوى عشان تواجه الضغط.. كل خلية من خلايا العضلات بتتكون هي مصنع صغير بيحرق دهون..
دا بيحصل في أيام الراحة.. من غير الراحة جسمك حيتحط تحت ضغط عنيف.. وعضلاتك مش حتلحق تشفى.. و حتبدأ تصاب و الكورتيزول من التوتر يتراكم في جسمك و تلاقي نفسك بتمارس رياضة و بتحوش دهون..
التمرين مش بس بينهك عضلاتك.. بينهك الجهاز العصبي البشري.. و دا بالتالي لازم يرتاح..
بالنسبة للشباب اللي بتذاكر و مواعيدها ضيقة.. وربات البيوت.. فأفضل الأنواع هو الكاليستنيكس.. رياضة بوزن الجسم نفسه، و ممكن تتلعب في أي مكان.. في البيت تقدر تعمل ضغط وبطن وسكوات.. طبيب الطواريء الساهر في نبطشية وعنده عشر دقايق يقدر يعمل شوية كاليستنكس .. المهندس في الموقع.. المحامي في مكتبه.. الكاليستنيكس ميزتها الكبرى إنها ممكن تتأدى في أي مكان.. أول فيديو في المراجع فيه تمارين كاليستنيكس للمبتدئين..
الأوزان بتقدم ميزة عن الكاليستنيكس والكارديو.. وهي حاجة اسمها "الحرق المستمر Afterburn ".. أنت في المعتاد بتحرق وقت التمرين سعرات حرارية.. بس بموجب الحرق المستمر.. فأنت بتحرق بعد التمرين كمان.. و أنت قاعد علي مكتبك تذاكر أو في كرسيك المفضل بتقرا.. و حتى أثناء النوم..
الكارديو بيمنحك التأثير دا لساعة إلي ساعتين بعد التمرين.. و الكاليستنيكس بتوصل لست ساعات.. بينما الأوزان.. ممكن توصل معاك لـ 14 ساعة من الحرق بعد التمرين..
بس ماتقفش.. مارس الأيسر لك و اللي يناسب وقتك.. بالإضافة للتدريب؛ اتعلم ماتركبش الأسانسير و اطلع وانزل على السلالم.. اركب دراجة.. امشي مشاويرك القريبة.. حتوفر صحتك ووقودك وفلوسك..
في ناس متصورة إنها كبرت على إنها تبدأ في الكلام دا.. عامر خان، "الشاب" اللي في الصورة رقم 1 دا.. عنده 54 سنة.. ولو عامر خان "كان كده زمان ورجع".. فاللي في صورة 2 عنده 59 سنة.. و ابتدا في سن 55.. و اللي جنبه في صورة 3.. 61 سنة.. و ابتدا في سن 57.. في نماذج لناس بدأت في سن الستين و السبعين.. لأول مرة..
السيدة اللي في صورة 4 دي عندها 65 سنة.. و بدأت في سن 63.. وشكلها بقى أفضل وأجمل و أصغر و صحتها تبدلت تماما للأحسن..
حتسمع "يعني بعدما شاب ودوه الكتّاب".. والأمثال الخايبة بقى اللي بتحرض على الكسل و الاستسلام والعجز والرمامة.. آه بعدما شاب ودوه الكتاب يا سيدي.. ندفنه حي يعني عشان شعره شاب؟؟ السيدة في صورة 5 خدت شهادة هندسة وطب و فلسفة بعدما تجاوزت السبعين..
كن جاد.. كن صبور.. قاتل واتحدى نفسك.. بلاش تستعجل.. في ناس بتستعجل و تلجأ لحقن الستيرويدز والهرمونات و الأقراص إياها.. في تاني فيديو حتلاقي "جريج فالنتينو".. دا كاد إنه يفقد ذراعيه ونجا من البتر بمعجزة بسبب الحقن دي.. " تريفور سميث" بطل كمال الأجسام مات في سن 33 سنة.. "دانيلي سيراسي" زيه.. ومات في نفس السن.. "أندريس منذر" مات عن 31 سنة.. "ناصر السنباطي" و"جريج كوفاكس" ماتوا في أول الأربعينات..
أنت مش بتمارس رياضة عشان تبقى زي الشخص اللي في صورة 6.. و متبقاش عارف تهرش في ضهرك.. أنت بتمارسها عشان صحتك تتحسن وحياتك تتحسن.. وتبقى قوي رشيق سريع نشيط.. الهدف مش إنك تتحول لخرتيت بشري إطلاقا..
قلوبنا مش مصممة عشان تتحمل الشكل اللي في صورة 6 ده.. بالتالي القلب بيتضخم.. و جسم زي دا محتاج 7 - 8 آلاف سعر حراري يوميًا و دا بينهك كل أجهزته وغدده و بيعمل ضغط متواصل على الجهاز العصبي.. دا قاتل و"مالوش أي لازمة"..
طبعًا لازم نفتكر دايما إنك لو بتاخد أي دواء أو بتعاني أي مشاكل صحية أو كسرت حاجز الخمسين سنة، يفضل يكون نظامك الغذائي و رياضتك تحت إشراف طبيب..
في تالت ورابع فيديو في نتدريبات خاصة لأصدقائنا و اخواتنا الغير قادرين على الحركة لسمنة مفرطة أو إصابة أو مرض ما.. جعل الشخص قعيد.. تقدر لازلت تتدرب.. و تحسن صحتك وحياتك..
أما أهالينا وساداتنا و أساتذتنا الكبار اللي تجاوزوا السبعين والثمانين.. فدول برضه القطار مفاتهمش.. ونتكلم عنهم لاحقًا.. و يبقى لحديثنا بقية..
------------------
مراجع:
------------------
1 - https://bit.ly/2QU2VJX
2 - https://bit.ly/2A3KB9U - https://www.youtube.com/watch?v=ITG-IbHEYEE
3 - https://youtu.be/tywMKg1vPMo
4 - https://youtu.be/S7xIUv50o7o
منشورات سابقة:
1 - https://bit.ly/2KbIV2G
2 - https://bit.ly/2BgpGT3
3 - https://bit.ly/2qSrcET