من أهم الأطباء اللي حتتواصل معاها و تزورها وأنت بتعمل ريجيم و تحول جسمك من البدانة للرشاقة هم دكتور التغذية ودكتور الجلد..

- عشرات الأسئلة من امبارح بالذات.. إزاي خسرت وزن؟ طيب أنا باعمل دايت من سنين ودهوني مبتتحرقش.. طيب انا عديت الستين/ السبعين/ الثمانين.. ينفع ألعب رياضة؟ وإلخ.. عشرات الأسئلة نحاول نجاوب عليها "بقواعد عامة".. المنشورات دي ماتغنيش أبدًا عن اللجوء للطبيب المتخصص.. بالذات دكتور القلب لو عندك سمنة أو مدخن شره..

الدهون و مخلفات السجاير بتجري في أوعيتك الدموية طول الوقت.. الأوعية دي هي "الخراطيم" اللي بتنقل الدم لكل مكان في جسمك.. مع الوقت الدهون والقار بيتراكموا على جدرانها من جوا.. و ممكن تتسد.. ممكن مع مجهود عنيف تتقشر قشرة منهم و تجرح معاها جدار الوعاء الدموي.. اللي يحاول يوقف النزيف، فيقدملك مصيبة اسمها "جلطة"..

طيب إيه علاقة دكتور الجلد؟

الجلد أكبر عضو في أجسامنا.. وهو اللي بيبرد جسمنا بالعرق.. و هو خط الدفاع الأول ضد الطفيليات والغزاة، وهو اللي بيحمي أنسجتنا الداخلية، والريجيم والرياضة بيأثروا فيه.. ولازم وقتها يتابعه متخصص جلدية..

لما بتخسر وزن أو عضلاتك بتنمو، بتلاحظ إن جلدك ظهرت عليه خطوط بيضاء أو حمراء.. الحقيقة دي "ندوب Scars".. لو متعالجتش حتسيب أثر دائم..

العلاج مش إننا نروح الصيدلية نشتري أي كريم ونقعد "نلغوص".. العلاج بيوصفه دكتور الجلدية بعدما يفحص جلدك و يعرف طبيعته ويعرف الأدوية التانية اللي ممكن تكون بتاخدها.. إلخ..

- إيه رأيك في كبسولات حرق الدهون و حقن المعرفش ايه؟ طيب ايه رأيك على الريق اشرب ميه سخنة.. طيب أنا بلف جسمي بأكياس.. طيب قريت في منتدى فتكات إن منقوع العرقسوس مع رجل نملة يتيمة بيخسس.. أنا باكل زبادي بالليمون (أسوأ شيء سمعت عنه في حياتي).. الخ

كل دا هجص.. و كذب و كلام فاضي.. مفيش كبسولة سحرية بتحرق الدهن وتحسن الصحة.. في "أسلوب حياة بيتغير"..

أولًا: السؤال الشائع جدا بين الرياضيين اللي بيبنوا عضلات: "أنا خسيت و هدومي وسعت و عضلاتي اتبنت كويس.. ووزني مابيقلش على الميزان"..

- ومش حيقل على الميزان و يحتمل يزيد.. الحقيقة إن العضلات أثقل من الدهن.. كل ما جسمك يبقى مضبوط حيبقى أثقل على الميزان.. مع إنك خسيت و بقيت أفضل كتير.. سلفستر ستالون وزنه 100 كيلوجرام.. و ممكن يكون "بيومي فؤاد" وزنه 100 كيلوجرام.. بس شتان بين الوزن دا و الوزن دا.. عايز تخسر دهون.. إنسي الميزان..

ثانيًا: السكر عدوك الدائم.. معلقة السكر في جسمك بتعمل نفس التأثير اللي ممكن يعمله شمبانزي في معرض خزف صيني.. السكر بيزود الدهن عن طريق إنه بيخلي جسمك يفرز هرمون اسمه "الإنسولين Insulin".. دا دوره يهضم السكر ويفيد الجسم منه.. الإنسولين بيكسر النشويات كمان لسكر.. و بيحاول يحافظ على مستوى السكر في دمك..

بس الإنسولين لما بيرتفع بيخليك "تجوع".. و حيخليك تقوم في نص الليل تعمل بيتزا أو تقلي بطاطس.. دي حاجات فيها سكريات ودهون.. ترفع لك الإنسولين أكتر.. فتجوع أكتر.. و الفائض من السكر و النشويات حيتحول لدهن يتشال لوقت عوزة.. دايرة جهنمية مبتنتهيش..

لازم الإنسولين يفضل في مستوى مقبول.. أول حاجة عشان دا يحصل نوقف السكر والنشويات المصنعة.. زي البسكوت والبقسماط والعجائن دي..

وقف السكر حيخليك تدريجيا توقف الكافيين والمنبهات و الشاي والقهوة و النسكافية و البلاوي اللي بتخليك تسهر كتير او تنام نوم مش مضبوط و بتخلي جسمك جاف مرهق..

طيب العيش؟ العيش الأفضل هو العيش البلدي أبو ردّة بتاعنا.. دا العيش الصحي اللي ممكن تاكله.. ابعد عن الأبيض الشامي واللبناني و القصص دي..

طيب الرز الأبيض؟ 100 - 150 جرام رز كفاية يوميا.. دول مش شوية على فكرة.. دي كوباية رز.. يعني بعد الطهي طبق كبير..

- الهرمون الثاني اللي لازم تتحكم فيه اسمه "كورتيزول Cortisol" دا أصلا بيكافح الإلتهاب وينظم ضغط الدم.. ويديك شحنة طاقة في المواقف اللي فيها توتر عشان تدافع عن نفسك..

مع التوتر المستمر والشكوى الدائمة والكآبة مستويات الكورتيزول بتعلى في جسمك.. عشان الكورتيزول مصمم لأنه يديلك طاقة وقت الخطر، فهو بيرفع الجلوكوز في دمك.. بالتالي بيرفع الإنسولين..

كلنا جسمنا بيفرز كوريتزول يوميا.. وعشان يفضل عند معدلاته السليمة لازم تنام كويس و تخفف توتر.. مش كل حاجة بسيطة تعملها أزمة.. بطل نشر طاقة سلبية وابعد عن الناس اللي بتنشرها.. بطل دراما.. أي حد "مدمن دراما Drama queen" في حياته اليومية وبيعمل من الحبة قبة.. حتلاقيه عنده سمنة وضغط و سكر و غيرهم..

لازم عشان دورة الكورتيزول تتضبط تبقى هادي.. تنام نوم كافي مريح مش متقطع.. على الأقل 8 - 9 ساعات للكبار و10 - 11 ساعة للأطفال.. الساعات دي لازم تكون متواصلة..

باختصار.. نام بدري و اصحى بدري..

- جسمك محتاج عدد سعرات حرارية معينة يوميا عشان يفضل شغال.. حتى لو فضلت طول اليوم مبتتحركش.. دي السعرات اللي جسمك محتاج ينفق منها "وقت الراحة Basal metabolic rate" لمجرد إنه يفضل شغال..

دكتور التغذية حيقولك بالنسبة لوزنك وسنك وطبيعة جسمك كمية السعرات الأساسية اللي انت محتاجها يوميا.. في ناس بتحتاج 1500، و ناس 1650.. و ناس 2000.. و إلخ.. في السيدات المتوسط بتاعها من 1300 - 1600 سعر حراري يوميا..

طيب لو السيدة اللي محتاجة 1600 سعر حراري يوميا دي.. خدت 1200 بس و فضلت قاعدة علي الكنبة؟ جسمها حيضطر يكسر الدهون و يحرقها عشان يحصل علي باقي الـ400.. و بكده هي بتخسر دهن و تخس.. كل 7000 سعر حراري بيتحرقوا بيحرقوا معاهم كيلوجرام كامل من الدهن..

طيب لو خدت 1200 سعر حراري بس من الأكل و عملت مجهود بسيط يحرق لها 400 سعر كمان؟ حتخسر دهون اسرع و تخس أسرع..

يعني لو أكلت 2000 سعر حراري - أكتر من احتياجها، و مارست رياضة صح، زي الجري أو الأيربوكس أو دخلت الكاليستنيكس أو الأوزان.. و حرقت 500 سعر يوميًا؟ حتبقى بتاكل كويس و مش جعانة من الريجيم المستمر و بتخسر دهن!! و الأهم.. حتحافظ علي عضلاتها و جسمها مايضعفش.. لأن الريجيم بدون رياضة المخ بيفكك فيه جزء من العضلات عشان يتغذى عليها و يحافظ على وجوده..

ثالثًا: لازم تاكل أكل نضيف.. ولازم تعرف إيه الصح وإيه الغلط في الأكل.. وقف المقليات تمامًا.. اتجه للمشويات.. كل خضار و فاكهة كتير.. الألياف بتفيد صحتك أكتر مما تتصور..

مع أكل البسكوت و العيش الأبيض والشيتوس و الكاراتيه و الغلب الأزلي.. الحاجات دي بتعجن في أمعائك و تسيب وراها طبقة.. بتعفن و تتحلل و تتحول لمخاط.. مرتع للبكتيريا اللي بتجيبلك حزمة أمراض متبقاش عارف جت منين.. و ضغط بطنك يزيد و قولونك يتمدد و تلاقي نفسك بكرش و بطن مترهل..

الألياف اللي في الخضار و الفاكهة هي "الليفة" اللي بتنضف أمعاء الإنسان من الرواسب دي.. غير إن هضمها بيبقي صعب فبتستهلك طاقة.. بتحرق سعرات حرارية.. فتخليك تخس أكتر..

- إعرف إيه الأخطاء الشائعة في الموضوع.. الناس بتشرب لبن خالي الدسم عشان "الدهون بتزود الوزن".. الحقيقة إن علميًا دا اسمه "طرش".. دهن اللبن، دهن اللحم.. دهن الدجاج.. فيهم "دهن صحي اسمه Conjugated linoleic acid".. الدهن دا "بيحرق" الدهون اللي في جسمك!

يعني متطبخيش بالسمنة والزيت و الدهون المصنعة.. شيلي دهن اللحم والدجاج من الشوربة و اطبخي به.. و اشربي اللبن كامل/ نص دسم.. كل صفار البيض ماترميهوش.. برضه دا دهن صحي حيوي مهم..

بس الدهن الصحي الموجود في اللبن و اللحوم و الدجاج و الأسماك ده.. بالرغم من إنه صحي.. فهو سعراته الحرارية زي أي دهن.. مرتفعة.. فدا الإفراط فيه حيزود الدهن في الجسم برضه..

لازم الإعتدال.. و تعد السعرات بتاعتك و تحسبها..

البطاطس و البطاطا.. مش أكل بيزود الوزن.. دا أكل صحي وسعراته قليلة جدا.. الـ 100جرام بطاطا فيهم 50 سعر حراري.. يعني الربع كيلو فيه تقريبا 120 سعر.. و حيشبعوك مدة طويلة و كلهم أليف صحية.. "كل بطاطا مشوية عشان تتخن" دي خزعبلات.. البطاطا أليف و نشويات صحية وسعرات قليلة و حتى السكر الي فيها مبيعليش الإنسولين و بيحافظ على مستوى سكر الدم.. إنسى الأسطير القديمة ووصفات العطارين بتاعت "بطاطا عشان تتخن"..

- طيب معلش انا حعيش في الغلب دا طول عمري و أمشي أحسب السعرات الحرارية؟ لا.. عبر الوقت شهيتك بتتحور و معدتك بتصغر.. شهرين و تلاتة و حتلاقي نفسك لوحدك من غير حسابات.. بتاكل الكميات اللي جسمك محتاجها.. لوحدك.. حتى لو حبيت تاكل أكتر و تفتري.. مش حتعرف..

نفس الموضوع لما تبطل السكر و العصير الصناعي و تبدأ تعصر عصير في البيت.. أو بدل البسكوتة بالشوكولاتة تاكل تفاحة..

بعد فترة حتلاقي نفسك شهيتك اتحورت.. وقتما حتحتاج سكر، فتروح تلقائيا تاكل تفاحة، جزرة.. خوخة.. و حتستطعمها أكتر من معلقة السكر.. و تبقى مبسوط..

يعني الموضوع عايز بس تعب شهرين تلاتة في الأول.. لحد ما تتعود على "اسلوب الحياة" الصحي الجديد...

- في سؤال آخر.. "أنا رياضي وبعمل رياضة عنيفة وجسمي فيه دهون كتير؟".. الأجسام بتتعمل في المطبخ مش في صالة الحديد.. الموضوع 70% تنظيم أكل وأسلوب حياة صحي.. و 30% رياضة..

- "طيب أنا مدخن.. يا ترى ينفع".. ايوه ينفع.. الأكل الصحي و الرياضة عبر الوقت حيكونوا مساعد لك أنك تقلع عن التدخين..

وأرجوك.. بلاش الحجة المملة بتاعت "مفيش وقت للرياضة".. أنزل اجري نص ساعة.. "بوتين" بيلعب رياضة.. أنت مشغولياتك أكتر منه يعني؟؟

- الجسم البشري مش سهل.. دا أعقد آلة في الكون كله.. الآلة الوحيدة في الكون اللي بتكيف نفسها بسرعة مذهلة عشان تحمي نفسها من أي تغيير.. حتشوف دا في حاجات بسيطة مبتلاحظهاش إلا لو درستها أو فكرت فيها.. دي الآلة الوحيدة اللي بتصلح نفسها..

لو اتجرحت و انت بتقشر برتقالة.. جسمك بيوقف النزف ويسد الجرح و يعالج الجلد و يرجع نفسه زي ما كان!!

و بما إن جسمك بيتفاجيء بخطتك لأنك تديله سعرات حرارية أقل يصرف منها.. فهو بيفهم إنك بتجبره على حرق الدهون.. المخزون الاستراتيجي عنده اللي شايله لوقت عوزة..

و لأنه آلة الخالق وضع فيها قدرة رهيبة على التكيف.. فجسمك حيبدأ يقاومك..

و يقلل الحرق..!

مش بتديني سعرات حرارية أقل؟ أنا بقى حكيف نفسي.. و ابدأ اتأقلم على إني أمارس نفس المجهود العنيف بس بسعرات أقل..

و فجأة تلاقي نفسك سنين مرت وانت بتلعب رياضة و عامل دايت و بطلت تحرق دهون...!

طيب إيه الحل هنا؟

الحل نكمل كلام عنه لاحقًا.. و يبقى للحديث بقية..

#gethealthy