لسه مع الدايت و الرياضة.. و نرجع سوا إلى كام سنة فاتوا.. الأعوام ما بين 2012 إلي 2013، عز فترة الاضطرابات، و شعور الواحد إن مصر ضاعت خلاص.. كنت مابتحركش من مقعدي تقريبًا.. جنبي علب التبغ.. و باتصل اشتري برميل كنتاكي العائلي و 4 لتر كولا.. يفضلوا جنبي طول اليوم لحد ما يخلصوا مع 9 - 10 أقداح قهوة.. قاعد قدام التليفزيون و الانترنت اتابع اخبار الاعتصامات و المشاكل و الإضرابات.. ودا حرق عسكري حي فبقى بطل.. و دا ولع في المجمع العلمي فأصبح نجم من نجوم العصر..
ضغط عصبي متواصل.. و آخر اليوم أدخل أنام.. مابقتش مهتم بنفسي و مع تدخيني و قلة شرب الماء و الحياة المروعة الغير صحية وزني زاد جدا وجلدي بدأ يضعف و يقشر و يتغير لونه.. ولو شفتني وقتها لوليت مني فرارًا و لملئت مني رعبًا.. كل يوم على نفس الوضع.. و غدا يوم جديد..
وزني وصل لأكتر من 140 كيلوجرام.. و صحتي تدهورت.. لحد 12 أغسطس 2012.. ومش فاكر خبر مهبب إيه شفته في التليفزيون أيقنت خلاص بعده إن البلد دي راحت.. بدأ الأمر بنوبات ضيق تنفس و سعال مستمر و كفاح من أجل الهواء..
فضلت على المنوال دا.. و أضفنا للأمر آلام مش اعتيادية في القفص الصدري.. كأن قطع من جمر ملتهب بتزحف بين عظامك.. لحد ما ربنا تمم بخير ووصلت لحالة خطرة.. وشخصت نفسي في أواخر فبراير 2013 بجلطة رئوية.. وكان التشخيص صحيح.. 20 يوم في العناية المركزة.. بيني و بين المرضى جواري في السراير المختلفة ستائر.. بنكلم بعض أحيانا - الواعين منا - ونودع كل يوم واحد آخر، و نتراهن.. يا ترى مين فينا حيموت بكرة.. و نضحك كأنه ليس هناك غد.. لأن فعلا بالنسبة لنا مكانش في غد..
لما خرجت من العناية المركزة مكانش في هدوم من متعلقاتي على مقاسي.. و اضطرت أمي تشتري لي هدوم جديدة لبستها و رجعت حجرتي القديمة في بيتها لفترة نقاهة.. بعدها رجعت بيتي و قررت أبدأ من جديد..
مسكت كل زجاجات الكولا أفرغتها في المرحاض.. و حطيت السكر على الرصيف أمام باب العمارة للنمل.. و فضيت التلاجة و قررت أملاها أكل صحي نظيف.. بس دا مش كافي عشان أرجع لوزني الطبيعي اللي فقدته في سنتين بعد 28 سنة مارست فيهم رياضة عنيفة..
قررت أبدأ بالكاليستنيكس في البيت.. كنت قبلها ممكن أعمل 70 ضغطة تقريبا.. اليوم دا عملت 3.. و ذراعاي مشالونيش ووقعت بعدها.. شيء محبط جدًا.. بس مش ليا.. مش المرة دي..
بقيت بعمل الـ3 اللي أقدر عليهم كل شوية.. 3 ضغط و أنا رايح الحمام.. 3 وأنا راجع.. 3 ضغط مع 3 سكوات.. 3 وأنا رايح أفتح الباب 3 وأنا راجع.. الـ3 أصبحوا 4، و بعدين بقوا 6 و 10 و 15 و 100.. ووصلت لـ114 كجم.. وقررت ساعتها إني أقدر أنزل صالة الحديد..
حصلت لي انتكاسات في الوزن مرتين أو ثلاثة بعدها بس عمرها ما وصلت للمأساة القديمة.. وكنت دايمًا باعرف أعمل ترانسفورميشن وأرجع بما فيها المرة دي.. مع قراري إني افضل على الوضع دا مادمت حيًا..
كنت بجري من فترة قريبة على كورنيش اسكندرية لما قابلت طبيبي المحترم د. حمدي اللي عالجني في العناية المركزة.. ماعرفنيش لأول وهلة.. ولما افتكر.. قال لي إنه مذهول لأنه كان متوقع إني أمشي بعكاز بقية حياتي..
أوعى تقف وأوعى تستلم.. مهما كان سنك أو حالتك.. تحب ابنك يشوفك بدين مريض متهالك و يمشي علي دربك؟ و للا يتعلم منك إزاي يحيا حياة صحية؟.
بالمناسبة لو عندك ابن صغير وحابب انه يتمرن بأوزان وكان 18 سنة فما أقل.. فلازم يدخل صالة الحديد تحت إشراف مدرب ومايدخلهاش لوحده أبدًا.. عشان الأجهزة اللي هناك حضرتك دي مش مراجيح.. دي أجهزة خطيرة ممكن تسبب إصابات عنيفة أو تقتل أي شاب صغير مابيعرفش يتعامل معاها صح..
لو تجاوزت السبعين وقررت تمارس رياضة وحمية للمرة الأولى، لابد إن دا يكون تحت إشراف الطبيب.. عامة حتى لو كنت صغير في السن و بتاخد أي أدوية أو بتعاني من أي حالة، لازم تستشير الطبيب حتى لو حتاخد إسبرين.. حتى في أكلك العادي اللي متصور إن مفيش منه ضرر..
على سبيل المثال الناس اللي بتعاني من التجلط وبتاخد "أدوية سيولة Blood thinners" معينة، ممكن لما تاكل خضروات غنية "بفيتامين K" زي البروكلي.. تأثر على الدواء.. و تعرض نفسها للخطر..
لأهلنا كبار السن، انسي قصص "أنا عجزت وخلايا جسمي مش بتستجيب".. خلايانا بتموت و تظهر خلايا جديدة زيرو غيرها طول الوقت.. الرياضة والأكل الصحي حيحسنوا حياتك بما لا يقاس..
مش حتبقى عداء أوليمبي طبعا.. و لا أنا.. ولا أي حد فينا من الناس العادية، لكن تقدر تستغنى عن العكاز.. تقدر تضبط سكرك وضغطك.. تقدر تنام كويس وتتنفس كويس و ضهرك يبطل يوجعك.. و ركبتيك تبطل توجعك.. و تمشي وتخرج و تتحرك زي زمان..
أول فيديو في المراجع فيه تدريبات لو سنك من 70 سنة وطالع وعمرك ما مارست رياضة في حياتك.. أو توقفت لعشرات السنين.. الأوزان اللي في الفيديو دا بالكتير 3 كجم.. و في ناس زي ما حضراتكم شايفين بتشيل بدالها زجاجة مياه لتر.. اللي تقدر عليه..
الفيديو التاني فيه نفس الموضوع.. بس تمارين للمرونة والتمدد.. نفس الكلام اللي اتقال للشباب موجه لأهلنا الكبار.. كن جاد.. ولازم ترتاح ماينفعش تتمرن كل يوم.. لازم تشرب مياه كفاية.. لازم تاكل أكل صحي.. لو صعب تبطل تدخين.. امتنع على الأقل عن السيجارة الشرطية.. المرتبطة بموقف معين.. زي "سيجارة بعد الأكل".. أو أخرها نص ساعة..
اللينك الثالثة فيها تدريبات من موقع وزارة الصحة البريطانية.. بعد 3 أسابيع إلي شهر من ممارسة التدريبات دي بانتظام.. حتلاقي نفسك بتتنفس أفضل.. مزاجك أحسن.. بتنام كويس.. و حتلاقي نفسك قادر تمشي أكتر أو تطلع السلم ولو مستند إلى عصا أو عكاز ممكن تحس إنك خلاص مش عايزها..
النصيحة هنا.. ماتستعجلش.. خليك هادي وكمل تدريب بالراحة.. امشي مسافات أطول يوميا لو قدرت.. وتابع مع طبيبك الخاص، عن الوقت المناسب اللي تقدر تاخد فيه التمارين لمرحلة أعلى.. تدريجيا حتلاقي نفسك فعلا مش محتاج عجاز.. و صغرت عشرين سنة..
تقدر تعمل كل التمارين دي في البيت.. لكن لو حابب تنزل صالة حديد.. فدا حيكون تحت إشراف ومتابعة طبيب و مدرب معًا..
إذا رأي طبيبك اتعارض مع رأي مدربك، رجّح الكفة الي فيها رأي الطبيب..
للشباب و كبار السن سواء، قبل أي وزن أو تمرين لازم تسخن و تعمل احماء شوية.. ادفع بالدم الغني بالأكسجين للعضلات قبل ما تشغلها..
نوّع التمارين و بدلها وغيرها طول الوقت.. عشان الجسم يستجيب.. في شباب في صالة الحديد بتروح تلعب تمرين معين لعضلة الكتف مثلا.. بتلعب التمرين دا بقوة و بتزود الوزن كل مرة.. بس العضلة مش بتكبر.. لأنها اتعودت على التمرين دا خلاص..
اللي بيحصل هنا إن مع كل توتر بتحط فيه عضلة ما، بتكافح عشان تقوى وتتحمله.. وبيحصل فعلا وبتتعود عليه و بتحمي نفسها منه.. لازم التمارين تتغير طول الوقت..
الكبار والشباب المفروض مايقعدوش طول الوقت.. الجلوس معظم الوقت عادة قاتلة حتى لو بتتمرن.. لو شغلك بيتطلب دا.. لازم كل ساعة تقوم تقف وتمشي وتتحرك خمس إلي عشر دقائق..
الكبار و الشباب قبل النوم المفروض يعملوا سترتشات بسيطة لأجسامهم قبل النوم.. دا حيساعدهم يناموا أفضل و يخليهم يحصلوا علي اقصى فائدة من التدريبات اللي بيعملوها بالنهار.. مش أكتر من بضع دقائق قبل النوم..
آخر فيديو موجود فيه طريقة عمل الاسترتشات دي..
كده يبقى مش فاضل غير إننا نلخص كل اللي قلناه قبل كده مع شوية نصائح عابرة.. ويبقى عندنا زي برنامج عام للحمية والتدريب.. نكمل المرة الجاية.. و يبقى وقتها؛ للحديث ختام..
----------
مراجع:
---------
1 - https://youtu.be/Ev6yE55kYGw
2 - https://youtu.be/YGRje8p5gbc
3 - https://www.nhs.uk/.../NHS_ExercisesForOlderPeople.pdf
4 - https://www.youtube.com/watch?v=tpbZn3EiW5s
منشورات سابقة:
1 - https://bit.ly/2KbIV2G
2 - https://bit.ly/2BgpGT3
3 - https://bit.ly/2qSrcET
4 - https://bit.ly/2S5rwM4
#gethealthy