من أهم أسباب الاكتئاب مع الحمية إن الشخص مابيراعيش التوازن المطلوب في الحمية.. فبيمتنع عن أطعمة بعينها أو بيقلل كميات وخلاص.. و دا ممكن يسبب له نقص في بعض "العناصر النادرة trace elements"..
العناصر دي بالرغم من إننا محتاجينها بكميات بسيطة، إلا أن أي خلل فيها ممكن يخل بوظائف حيوية في الجسم.. من العناصر دي الحديد والنحاس والمنجنيز والمغنسيوم والكالسيوم والسلينيام، الفلورايد، و الزنك إلخ..
تخيل لو حميتك اللي بتعملها وكويسة و بتجيب معاك نتيجة سببت لك نقص في المغنسيوم.. هنا جسمك حيقل إفرازه من "السيروتونين Serotonin" و دا مسؤول عن إنه يحسسك بالارتياح والسعادة، ويخفف الضغط والتوتر.. لأن انتاج ووظيفة السيروتونين بتعتمد على توافر المغنسيوم.. بالتالي حتكتئب بدون سبب واضح لك..
لازم الدايت يبقى فيه فاكهة وخضار طازج كتير لأن معظم العناصر دي موجودة فيها.. في عناصر أشخاص بتحتاجها أكتر من غيرها.. ممارسي الرياضات العنيفة المرهقة حيحتاجوا "بوتاسيوم" أكتر من الرجل العادي..
في عناصر من وظايفها تساعدك علي الاستفادة من عناصر أخرى.. مثلا "فيتامين ج Vitamin C" نقصه حيمنعك من إمتصاص الحديد.. نقص الزنك كارثة.. بس زيادته عن الجرعة المسموح بها حتتعارض مع امتصاص الكالسيوم..
الموضوع ميزان رباني دقيق.. لازم تراعيه وماتهملوش..
لو مارست الدايت بالطريقة دي.. و إديت جسمك كل العناصر، صعب جدا تصاب بالاكتئاب..
الرياضة ضرورية زي الأكل والشرب.. الرياضة هي الحركة اللي بتدفع الدم في عروقك و تخلي قلبك ينبض بقوة و جسمك يعرق.. يعني ماتقوليش"اصل أنا بلعب بولينج" و ""الشطرنج رياضة ذهنية".. و "انا بانزل أمشي".. المشي اللي يعتبر رياضة هو المشي السريع - اللي في الصورة ده ..
إنما "تعالى نتمشى على الكورنيش.." دي مش رياضة إلا لو مريض أو سنك تجاوز الثمانين و ممارستش أي رياضة في حياتك.. والناس دي من أهلنا واساتذتنا وأصحابنا حنرجع لهم لاحقًا.. و نقول لهم إزاي ممكن يمارسوا الرياضة بشكل معين يأثر إيجابًا على صحتهم وحياتهم..
الرياضة بتحط جسمك تحت ضغط لوقت محدود.. وعشان جسمك يخفف الضغط دا بيفرز هرمونات خاصة بتحسسك بالسعادة و الراحة.. و تضيع الاكتئاب..
الرياضة المنشطة للقلب والجسم بدون أثقال وبحركات عادية لكن متسارعة، بيبقي اسمها "التمارين الهوائية Aerobic exercises" أو "كارديو Cardio".. لأنها منشطة زي ما قلنا و بتستخدم الأكسجين بشكل رئيسي في الحرق والحصول علي الطاقة..
سيّد تمارين الكارديو وأفضلها هو الجري.. يليه مباشرة السباحة.. دي بتختلف عن تمارين القوة أو التحمل اللي بيدخل فيها الأوزان في صالة الحديد.. و الاتنين بيختلفوا عن "الكاليستنيكس Calisthenics"..
الكاليستنيكس هي نوع من رياضات التحمل والقوة.. لكن بوزن الجسم نفسه.. مش بأثقال إلا بشكل عرضي.. زي الصورة التانية.. دا ضرب من الكاليستنيكس..
طيب عرفنا إن الرياضة ضرورة عشان تضبط المزاج مع الدايت و مندخلش في اكتئاب..
أنهي أفضل؟ حديد؟ كارديو؟ كاليستنيكس؟
عشان نخس محتاجين حرق لساعات طويلة.. أنهي افضل رياضة تأمن لنا الحرق المستمر ده؟ واقدر العب رياضة يوميا؟ و محتاج وقت أد إيه يوميا؟
إيه رأيك في المكملات الغذائية زي البروتينات وحقن "الستيرويدز steroids" اللي بتخلينا نخس و عضلاتنا تقوى بأقل مجهود وبعدين تقتلنا بعد كام سنة؟
طيب أنا كبير في السن.. متجاوز الثمانين.. أقدر ألعب رياضة تحسن صحتي؟
أنا بلعب رياضة و ببطل.. أعمل ايه؟
ينفع ألعب رياضة في البيت؟
دا نجاوب عنه لاحقًا، ويبقى للحديث بقية..
---------------
منشورات سابقة:
--------------
1 - https://bit.ly/2KbIV2G
2 - https://bit.ly/2BgpGT3
0:00 / 0:00