الحلقة قبل الأخيرة مع الذكاء الصناعي و صوفيا.. و إيلون ماسك.. و أطلس و جوجل..
وقفنا عند سؤال حيوي في المنشورات اللي قبل كده.. المنشورات في أول مرجع للي يحب يرجع لها....
إزاي نمنع الروبوتس إنها تنقلب علينا؟
إزاي نمنعها إنها تقتلنا؟ إمتي الآلات ذات الذكاء الصناعي تنقلب علينا؟
في علماء ذكاء صناعي متحمسين، قالوا "قريب".. لأ وحددوا التاريخ كمان.. سنة 2029.. مش 2028 و لا 2030.. 2029 بالذات..
التصريح دا مستند إلي "قانون مور Moore's law".. و قانون مور باختصار هو قانون بيقول إن عدد الترانزستورات على أي الدارة المتكاملة أو "شريحة إليكترونية Chip" بيتضاعف كل 18 شهر تقريبا..
عشان كده من الكمبيوتر اللي حجمه قد البوتجاز قاعدة مور و التطور السريع دا.. خلا بقى في كمبيوتر بتلبسه كساعة يد.. و كمبيوتر قد راس الدبوس.. اللي موجود في الصورة دا و محطوط على قطعة عملة نقدية..
اسمه "ذرة ميشيجان الدقيقة Michigan Micro Mote" .. الجهاز دا بيصور.. ويقيس درجة الحرارة و الضغط.. ملوش ماوس و لا كيبورد.. بتتعامل معاه عن طريق كمبيوتر آخر يبعتله الداتا و يستقبل منه الداتا عن طريق الأشعة..
قانون مور إذن صالح للتطبيق من حوالي 100 سنة في الماضي لحد الآن.. من أيام الآلات الحاسبة البدائية لحد دلوقتي..
عالم الفيزياء الياباني الأمريكي "ميتشيو كاكو Michio Kaku" بيجاوب على السؤال دا..
يا ترى إمتي حييجي يوم و "يصحى" روبوت" في المعمل و يقول "إيه دا؟ أنا ذكي.. أنا واعي".. دا أكتر من كده "ممكن أبقى أكثر ذكاء لو حطيت شوية رقائق إليكترونية زيادة في دماغي.."
"ميتشيو" عالم في "المستقبليات Futurist" كذلك.. يعني بيدرس المعطيات و يحط توقعات لما سيحدث في المستقبل من احتمالات..
في علماء قالوا مستحيل.. مش حيحصل أبدا.. لأن "قانون مور Moore's law" على وشك إنه ينكسر..
"ميتشيو كاكو" بيوضح الرأي دا.. و بيقول قانون مور في الحقيقة غير قادر على الإستمرار للأبد.. لأن في النهاية.. علم الفيزياء بيلتقط الزمام.. و اللي بتقوله لنا الفيزياء إن "السيليكون" مادة غير مستقرة على المستوى الذري..
الأجهزة بتصغر جدا.. و بتبقى قوية جدا.. بس بتولد كل مرة التطور دا بيحصل.. حرارة عالية جدا..
فاللي حيحصل إن السيليكون في مرحلة حينصهر.. و تتسرب منه الإليكترونات.. و يخضع هنا "لمبدأ الريبة Uncertainty principle" بتاع هاينزنبرج.. ماتبقاش عارف الإليكترون فين بالضبط..
العلماء دلوقتي بحاولوا يدرسوا عصر "ما بعد السليكيون".. و دا محتاج حوالي 15 - 20 سنة عشان يوصلوا له..
يعني باختصار بعد كام سنة.. حيبقي معاك جهاز كمبيوتر مالوش تحديث.. مفيش جهاز أقوى بينزل.. حيبقوا زي بعض بالضبط..
دلوقتي بيدرسوا أفكار زي الكمبيوترات المعتمدة على الحمض النووي.. أجهزة الكوانتم.. أو كمبيوتر الكم.. الخ..
بس ولا جهاز من دول جاهز للإنطلاق في القريب العاجل.. أقوى كمبيوتر كوانتم في العالم حاليا بيجري عملية حسابية أقصاها 5×3 = 15.
طيب دا غباء مع كل المصاريف و الأبحاث دي؟ لا طبعا دا نصر عظيم.. هي حسبة سهلة لو عملتها بعقلك.. و أسهل لو عملتها على آلة حاسبة..
بس جرب تعملها على خمس جسيمات دون ذرية.. تمسكهم و تخليهم يحسبوا الحسبة دي.. يا ريت كمان تحافظ على الجسيمات دي من "تفكك الترابط الكمي Quantum decoherence".. لأن أي اهتزازات.. ذبذبة.. حرارة.. أو غيره.. حتخلي الذرات دي تتشتت و ماتعرفش تعمل بيها أي شيء..
عشان كده هو صعب في فهمه.. صعب في برمجته.. و صعب في التعامل معاه.. و لسه قدامه كتير..
بالتالي "ميتشيو" بيقول: على أول القرن الجديد.. ممكن لو حلينا المشكلات دي.. نصنع آلات لها ذكاء زي ذكاء البشر.. لأن الآلات المزودة بالذكاء الصناعي حاليا في ذكاء الحشرات..
محتاجين نرفع الذكاء دا و نخليها في ذكاء الفئران.. و بعد عمر طويل تبقى ذكية زي القطط و الكلاب.. آخر القرن الحالي ممكن يبقوا في ذكاء القرود.. وهنا ممكن بالفعل يكونوا مصدر خطر..
هنا "ميتشيو" بيقول لنا ببساطة.. عند المستوى دا.. حيتحط شريحة في عقولهم الإليكترونية.. تفصلهم و تحولهم إلي قطع حديدية عديمة النفع.. لو جالهم أي أفكار مؤذية أو قاتلة.. طوروها من تلقاء نفسهم أو خططولها أو فكروا فيها.. ورصدتها الشريحة دي..
حتى محاولاتهم لتدمير الشريحة أو فصلها لو حصلت بشكل ما.. تؤدي لتشغيل الشريحة.. و فصلهم عن العمل..
شريحة مبرمجة طبقا للقوانين الثلاث اللي وضعها "إسحق عظيموف" في قصته و اتكلمنا عنها من قبل..
بالتالي فكرة الذكاء الصناعي اللي ممكن يتمرد علينا لسه بعيدة جدا.. و لها صمامات أمان عديدة.. قيد التطوير جنبًا إلي جنب.. مع تطوير الذكاء الصناعي نفسه..
يعني مفيش خطورة حقيقية طبقا للكلام دا في الوقت الراهن..
البوست الجاي حنعمل روبوت سوا.. روبوت بسيط بيأدي وظيفة بسيطة هي "الكشف عن المعادن".. و حيكون له نفس شكل "مركبة المريخ Mars Rover" اللي في الصورة دي.. بس في حجم الكف..
نموذج لكاشف ألغام في حجم الكف..
الروبوت دا سهل انت تعمله وتعلم أولادك تعمله.. بدل ما تقعد تتحسر على كوكب اليابان.. علم أولادك تفكر زي أولادهم هناك..
الحجم الصغير لمركبة المريخ دا اتعمل كمشروع تخرج في "معهد ماساتشوستس للتكنولوجيا MIT".. و الروبوت دا بالذات بيتدرس في كورسات المعهد "مقدمة الروبوتيكس Introduction to robotics"..
حنشوف إزاي الفكرة بسيطة و لها تطبيقات لا تنتهي وممكن ينطلق منها آلاف الإختراعات و الابتكارات الجديدة الي بتستند على المبدأ الحقيقي اللي الآلات اتعملت عشانه "تيسير حياة البشر"..
في محاسب هندي عنده 22 سنة التقط الفكرة و عمل موديل زيها بيتحرك بإشارات اليد.. طيب ايه الفايدة؟ ايه يعني الإختراع في موديل صغير بيتحرك باشارات اليد؟؟
يعني الموديل دا ممكن يتحرك ويناول الريموت كونترول و علبة الدواء للمقعدين و كبار السن..
يعني فكرة على بساطتها.. بالفعل عظيمة و مريحة للبشر..
الفيديو موجود في آخر لينك في المراجع..
تقدر تخلي أولادك يعملوا روبوت بزجاجة فارغة.. بعلبة صفيح.. الفكرة هنا مش في قيمته نفسها.. قدر ما هي في إنهم اشتغلوا بإيديهم و يتعلموا.. و يبدأوا يهتموا بالعلم دا.. يبدأوا يفكروا.. و لما يفكروا أكيد.. حيطوروا..
أتمنى أشوف الأستاذة في الجامعات و هي بتطلق مشاريع تخرج مشتركة بين الطلبة في الكليات المختلفة.. طلبة هندسة مع طلبة طب أسنان يعملوا جهاز جديد ينفع في طب الأسنان.. و هكذا..
كل أسبوع طلبة المدارس تاخد مشروع أو مشكلة تحلها في حصة العلوم.. كل 10 طلبة يشتغلوا على حل لمشكلة.. و ييجوا بالحل في الأسبوع التالي..
دا حيفرق كتير..
المرة الجاية كمان حنعرف كمان حاجات بسيطة تيسر علينا الموضوع لو حد بيهوي الموضوع.. زي الفارق بين "محرك التيار المتردد AC motor" و "محرك التيار المستمر DC motor"..
نعرف روبوت زي مركبة المريخ و باقي الآليين على المريخ بيجيبوا طاقتهم منين و إزاي..
دا يخلينا على لقاء قريب.. ويبقى للحديث ختام..
--------------
مراجع:
--------------
1 - منشورات سابقة:
- https://goo.gl/LqU7kG
- https://goo.gl/xBDsQw
- https://goo.gl/gphjpT
- https://goo.gl/KT1J1K
- https://goo.gl/WCSeDh
2 - Robots Learn to Say "No" to Humans: https://goo.gl/Ly1wgH
3 - Facebook abandoned an experiment after two artificially intelligent programs appeared to be chatting to each other in a strange language only they understood: https://goo.gl/ubbYud
4 - Problem solving, puzzle solving, game playing and deduction: - Russell & Norvig 2003, chpt. 3–9, - Poole, Mackworth & Goebel 1998, chpt. 2,3,7,9, - Luger & Stubblefield 2004, chpt. 3,4,6,8, - Nilsson 1998, chpt. 7–12..
5 - Russell, Stuart J.; Norvig, Peter (2003), Artificial Intelligence: A Modern Approach..
6 - https://goo.gl/PWHH77
7 - https://www.youtube.com/watch?v=rejZmqRrKMc