الحلقة الأخيرة من الذكاء الصناعي و الروبوتس.. و النهارة أعمل بنفسي بالفيديو روبوت سهل جدا.. ممكن أي حد يعمله لو حابب الموضوع..
الروبوتس دي بدون ذكاء صناعي.. انا مابفهمش فيه.. قريت عنه بس..
روبوت منهم بدائي بسيط جدا بموتور وتروس بس.. و التاني متطور شوية بسنسورات أشعة دون حمراء و سماعات و بروسيسور صغير..
ممكن تبتدي بقطع سابقة التجهيز.. في ناس حتقولك "لأ.. لازم تصنع المواتير بنفسك!" الناس دي بمنطقها لو قدمتلها صينية بطاطس حتقولك "لأ.. لازم تكون زارع البطاطس بنفسك.."...!
و عموما في اللينكات في فعلا طريقة عمل موتور بسيط تقدر تعمله بنفسك.. بس مش في المرحلة دي.. انت لسه في البداية..
في الفيديو حتلاقيني بتكلم عن موتور أكبر ممكن تعمل بيه قارب صغير.. خد بالك انا كل كلامي في نطاق "صغير الحجم".. يعني مش قارب حيركبه افراد.. قارب صغير زي الدرونز بريموت كونترول..
الروبوت الصغير دا اتعمل بحجمه و مواصفاته دي بالضبط في "معهد ماساتشوستس للتكنولوجيا MIT" و بعدين عملوا واحد أكبر في حجم صندوق الأحذية.. وواحد أكبر في حجم كارتونة مياه فارغة.. و بعدين عملوا "جوالة المريخ Mars Rover" اللي اتكلمنا عنها..
الروبوت اللي في الفيديو التاني الصغير أكثر تعقيدًا و خد مني 24 ساعة كاملة مش دقايق زي اللي في الفيديو الأول..
بيشتغل بالأوامر الصوتية.. بجمل معينة.. ممكن تخليها بصوتك لوحدك أو بأي صوت يقول الجمل دي..
الروبوت دا بيتشحن مرة واحدة.. فيه بطاريات قابلة للشحن "بكابل DV" زي الكاميرا، و بعدين كل ما يمشي، العجل بتاعه بيحرك معاه "محرك تيار مستمر DC Motor".. اللي احنا قلنا أول فيديو "ينفع يشتغل مولد".. المحرك دا بيشحن البطاريات.. و هكذا..
يعني طول ما هو بيتحرك بيشحن نفسه..
ممكن تعمله لما تتعمق في الموضوع أكتر و تشتغل بإيدك كتير.. ممكن يعمله طلبة هندسة.. ممكن يعمله طلبة الفنية العسكرية..
الروبوت دا مش مسجل كبراءة اختراع.. و محدش يعرف يسجله لأني دلوقتي نشرته أونلاين أهو خلاص.. شرط التسجيل دايما هو إن الإختراع أو الإبتكار مايتنشرش قبل التسجيل..
و خلال كام يوم أخلص الرسوم و التصميم بتاعه و حانشره برضه مفتوح المصدر.. أي حد يقلده و يعمل زيه و يغير فيه..
الفكرة على بساطتها لها آلاف التطبيقات.. تخيل ترابيزة أدوات طبية بتتحرك بأوامر الدكتور أو الجراح و تروح لحد عنده..
تخيل كومودينو للمقعدين و كبار السن.. علبة الأدوية بتاعتهم.. تخيل صندوق عدّة للعامل.. و عربية أطفال لأم بتشتغل في البيت.. كرسي متحرك.. صندوق ذخيرة.. حامل محاليل في مستشفي.. يتحرك بأوامرك و يجيلك لما تناديه و يرجع مكانه لما تأمره..
أي حد يقدر يستعمل الفكرة و ينفذ التطبيق اللي يعجبه.. بشرط إنه يكون برضه مفتوح المصدر..
جرب و اشتغل..
لو اتعثرت مرة أو 2 أو 10 و انت بتشتغل دا طبيعي و عادي في الأول..
الشغل دا ممكن تعلمه لابنك الصغير.. زي أطفال اليابان.. بدل ما تقعد تمصمص شفايفك علي عبقريتهم و أنت قاعد.. ممكن تقلدهم.. و تعلم ابنك.. في جميع الأحوال ابنك لما يلاقيك هاوي المجال دا حيحاول يقلدك بالتالي..
لما تنجح مرة لازم تقرا باستمرار و ايدك تشتغل على طول.. سواء محترف أو هاوي..
احرص على الأطفال اللي اقل من 8 سنين.. عشان في قطع و مسامير صغيرة جدا حتتراكم عندك عبر الوقت..
العبقرية دايما في البساطة و السهولة و المباشرة في التنفيذ.. لما تجيلك فكرة ابحث وراها و اقرا عنها وحاول تنفذها.. حتى لو بدت لك غريبة..
إذا لم تكن الفكرة غريبة منذ البداية، فلا أمل يرجى منها..
ماتقولش "أنا محاسب طيب ازاي" و "انا دكتور ماليش علاقة بالهندسة".. لو هاوي.. مارس هوايتك و ممكن بالفعل تعمل حاجة مفيدة جديدة..
الأخوان رايت كانوا "عجلاتية" و عملوا أول طيارة..
علشان تسجل براءة اختراع لشيء جديد.. لازم تكون كاتب البراءة بتاعته بمعادلاته بوزنه بكل خصائصه مع الرسوم الهندسية..
مينفعش تسجل "مجرد فكرة".. دا ممنوع.. و يفضّل دايما لما تروح مكتب التسجيل يكون معاك نموذج صممته بنفسك... إلا لو الإختراع شيء غير قابل لكده زي "مفاعل" مثلا.. هنا بيكتفوا بالرسوم و الأوراق و المعادلات النظرية..
سيبك من الناس اللزجة اللي حتحاول تحبطك.. في ناس فشلت في كل حاجة في حياتها تقريبا.. فمش عايزة حد ينجح.. لو دققت حتلاقيه مش فاضي غير إنه يجيب في سيرة الناس و يضيع وقته في هبل.. سيبك منه و اشتغل..
افتكر.. في كتير سخروا من الأخوان رايت.. لكن دلوقتي.. محدش يجروء يسخر من البوينج و الرافال و الإيرباص و الإف 16..
في المراجع المرة دي.. في لينكات مختلفة.. الفرق بين محرك التيار المستمر ومحرك التيار المتردد..
إزاي تعمل روبوت صغير بأي حاجة.. و تعلم ابنك يعمله..
إزاي تعمل جهاز كشف معادن بنفسك..
و غيرها...
لو عملت روبوت و صورته.. ابعتلي الفيديو انشرهولك.. و لو احتجت تسأل أي سؤال راسلني اي وقت.. حاديلك كل اللي اعرفه كهاوي.. و اللي ماعرفوش.. حابحث عنه معاك و نتعلم شيء جديد سوا..
في العصر الجاي البلاد اللي مش حتربي جيل من المبدعين يخرج من الأطفال الصغيرين بتوع النهاردة.. جيل يخترع و يطور و يعمل جديد.. حتبقى بتوقع شهادة وفاتها..
آخر لينك في المراجع كورس روبوتيكس مجاني..
استمتعوا..
ملحوظة: اللي حيقولي انت اسكندراني و بتنطق "نزَلت" بدل "نِزِلت" حعمله بلوك !
-------
مراجع
-----
1 - الفرق بين محرك التيار المتردد و التيار المستمر:
- https://goo.gl/3n91Fu
- https://goo.gl/uQDskF
2 - عمل روبوت من علبة مشروب غازي: https://goo.gl/uciQA8
3 - روبوت للأطفال من علبة البيبسي الفارغة:
- https://goo.gl/pZi7Rn
4 - عمل جهاز كشف معادن بسيط "قطع سابقة التجهيز":
- https://goo.gl/hrQZDB - https://goo.gl/Lj4fsw
5 - إزاي تعمل موتور كهربي بنفسك: https://goo.gl/LZc8Gg
6 - إزاي تلحم الاسلاك في موتور: https://goo.gl/gLb7PB
7 - إزاي تعمل روبوت بسيط بيمشي علي قدمين مش عجلات:
https://goo.gl/Va3PXw
9 - روبوت حصالة في خمس دقائق:
https://goo.gl/rqQsdy
10 - Begin Robotics:
https://goo.gl/B8UpCo
0:00 / 0:00
0:00 / 0:00