صوفيا.. الروبوت شبيه البشر، و فكرة الذكاء الصناعي.. واستخداماته وتطبيقاته..
في علم النفس في فوبيا خاصة، للناس اللي بتخاف من الروبوتيكس، الروبوتات، أو الذكاء الصناعي، تلاقي الناس دي بتهاجم أي موضوع أو كتب أو مقال أو آلة من النوع دا أو أي حد بيشتغل في الموضوع دا بدون سبب..
الفوبيا دي اسمها "فوبيا الرجل الآلي Robotaphobia".. و لها علاج نفسي لحسن الحظ..
من تطبيقات الذكاء الصناعي اللي انت شايفه في الفيديو.. الجراح الآلي.. الجراح الآلي مش بيغني عن الجراح البشري.. بس بينفذ أوامره من مسافة بعيدة.. زي سفينة بتستكشف القطب و احتاج حد من طاقمها لجراحة.. سفينة فضاء و رائد فضاء بحاجة لجراحة عاجلة.. بحار على متن غواصة نووية في القطب الشمالي و الزائدة الدودية عنده على وشك الإنفجار..
الجراح الآلي بيخلينا نستفيد من خبرة الجراح الشاطر اللي كبر جدا في السن و مبقاش قادر يعمل عمليات جراحية، أو أصيب بمرض خلا إيده بترتجف مثلا.. الجراح الآلي بينفذ أوامر الجراح البشري و ساعات بيقرا حركات عينيه و يطبقها، و ممكن عن طريق جهاز معين يقرا افكاره، و ينفذها..
في تاني مرجع حتلاقي فيديو لروبوت على شكل تعبان، و روبوت على شكل فراشة.. وغيرها.. وتتساءل "إيه فايدة الروبوتات دي بالضبط"؟
الروبوتس دي بتساعد البشر في مجالات و مشاكل كتير.. بتزحف من خلال الأنقاض و تتوصل لضحايا الزلازل الأحياء و تحدد مكانها لرجال الإنقاذ.. بتوصل للمحتجزين في مبنى محترق و تنبه رجل الإطفاء.. و بتتسلل لوكر إرهابيين أو مجرمين و تنقل صور تسليحهم و عتادهم لرجال الأمن..
تخليك تكشف ألغام.. تدرس الحيوانات و سلوكها.. تستكشف أماكن جديدة موصلهاش إنسان من قبل زي كهوف منسية أو فوهات براكين..
الأمريكيين مرة صمموا روبوت على شكل فأر، كان مفروض يتسلل للمخابرات الروسية، و ينقل بعينين عبارة عن كاميرات متقنة اللي بيدور جوا، و بذكاء صناعي يهرب و يختبيء زي الفار لو واجه مشكلات معينة..
بس قبل ما الروبوت الصغير دا يوصل لمبني "الكي جي بي KGB".. عدا عليه تاكسي ماشي قدام المبنى بالصدفة و سحقه.. ووقعت بقاياه في إيد رجال المخابرات الروسية نفسهم..
في تاني فيديو بنشوف روبوتات صغيرة جدا.. ميكروسكوبية.. "نانوروبوتس Nano-robots" و دي بتتحقن جوا الجسم و تدور على الخلايا السرطانية و تقتلها.. أو تحقن البنكرياس مثلا بمنشط.. أو تزيل ورم معين.. أو تعالج شريان مقطوع، أو غيرها..
بس العلم دائما سلاح ذو حدين، و لو استخدم استخدام خاطيء بيؤدي لنتائج مخيفة..
زي الطاقة النووية مثلا.. ممكن تخليك تنور آلاف البيوت و المستشفيات و المدارس و تعالج آلاف المرضى.. و ممكن تتحول لسلاح يبيد عدة مدن في لحظة، ويقتل الملايين من غير ما يفرق بين مقاتل و طفل رضيع..
"إيلوك ماسك" المدير التنفيذي لشركة "تسلا Tesla".. كان من مؤيدي الذكاء الصناعي، لحد ما حضر تجربة لروبوت اسمه "أطلس Atlas" في شركة رائدة في الروبوتيكس اسمها "بوسطون ديناميكس Boston Dynamics"...
"أطلس" اللي في الفيديو الثالث دا زي صوفيا.. شبه بشري.. ذكاء صوفيا الصناعي متطور عن "أطلس" بمراحل.. بس بينما صوفيا بتمشي علي عجلات بمعاونة بشرية و تكوينها العام ضعيف.. قدرات "أطلس" أعلى من صوفيا بكتير..
"اطلس في الاساطير الإغريقية" كان بيحمل السموات على كتفيه.. و ضحك على "هرقل Hercules" و خلاه يشيلها بداله، و قرر يهرب من المسؤولية دي.. بس هرقل خدعه بدوره خدعة ذكية و خلاه يشيلها تاني و سابه و مشي..
دا بالضبط هدف "بوسطون ديناميك".. إن أطلس يشيل مسؤوليات ثقيلة في كل نواحي الحياة.. يبقى شرطي.. مقاتل جيش.. عامل بناء.. مهندس.. طبيب.. مترجم.. إلخ...
"إيلون" شاف أطلس و هو بيعمل قفزة مبهرة.. مايقدرش يعملها من البشر إلا شخص مدرب تدريب خاص.. و أدرك إن "أطلس" ممكن يتسلح.. و بالذكاء الصناعي ممكن يطور قراراته أو يتخذ بنفسه قرارات جديدة، و هنا.. أصابه هلع من الفكرة.. و بدأ يحارب الذكاء الصناعي..
فكرة إنك تحارب الذكاء الصناعي النهاردة يعني كأنك بتقف أمام قطار مندفع مسرع.. بالإضافة إلي إن "إيلون" بالرغم من كونه مخترع عظيم ورجل أعمال ناجح و ملياردير.. إلا إنه بشكل ما متقمص شخصية "توني ستارك Tony Stark" في "الرجل الحديدي Iron man".. مغرور أناني متغطرس متعالي خالي من المشاعر.. لدرجة إن ناس كتير لاحظت إن "إيلون" بيقلد شخصية "ستارك" الخيالية في طريقته وتصرفاته..
الحكاية دي خلت العلماء تنفر من "إيلون" وتتجنب الحوار معاه بأي شكل إلا للضرورة القصوى.. و بالتالي هو النهاردة تقريبا بيأذن في مالطة.. و محدش بيلتفت له..
لكن لو شفت الفيديو الرابع تعرف إن مخاوف "إيلون" إلي حد كبير.. لها أساس من الصحة..
في الفيديو دا في مقطع لدرون.. كلمة "درون Drone" في الأصل تعني "روبوت".. بس لأن ذكر النحلة اللي خرج من بويضة غير مخصبة اسمه "درون Drone" فبقت بتطلق على الروبوتات الطائرة أو "الأنظمة الجوية الغير مأهولة Unmanned aerial vehicle" أكتر..
الدرون اللي في الفيديو صغيرة و شايلة بضعة جرامات من مادة متفجرة.. بتطير في "سرب Swarm".. و بتتعرف على وجوه ضحاياها بنوع من الذكاء الصناعي.. و تقتلها..
الأسوأ إن الدرون دي متاحة للجمهور.. حضرتك تقدر تشتريها.. بتبيعها شركة اسمها "ستارتو إينرجيتكس Strato Energetics".. و العالم كله بيتكلم عنها دلوقتي..
ليه محدش بيستعمل الدرون دي حاليا؟ لأنها هشة جدا.. و لازم تبقى قريب من الضحية جدا قبل ما تطيرها لأن بطاريتها بتديلها دقيقتين و شوية طيران.. و لأن أي موجات بتشوش عليها و توقعها، حتى لو موجات الواي فاي أو جهازم المحمول، لو وقعت في نطاقه بشكل مناسب..
بس دي إشارة مخيفة للي حيكون موجود "بكرة".. لما صناع الدرون يتلافوا الأخطاء دي..
"إيلون" دلوقتي بيدعو لإلغاء الذكاء الصناعي من عالم التسليح تماما.. بس إزاي تقدر تعمل دا؟ الوقت فات بالفعل..
حتمنع المقاتلة إنها ترصد صاروخ و تطلق له نظام دفاعي من تلقاء نفسها؟ حتمنع الأقمار الصناعية العسكرية؟ كل دي تطبيقات ذكاء صناعي..
في كوكب كامل في المجموعة الشمسية سكانه من الآليين فقط لحد لحظتنا دي.. آليين بتشتغل بالذكاء الصناعي..
المريخ..
حد خد باله من الملحوظة دي؟ كل اللي عايشين على المريخ آليين.. زي "مستكشفة المريخ Mars Rover".. بياخدوا عينات من التربة و يصوروا و يبعتوا بيانات و يخاطبوا الأرض بيها..
ايه حدود المشكلة دي و حلها؟
دا نتكلم عنه لاحقًا و يبقى للحديث بقية..
---------
مراجع:
---------
1 - منشورات سابقة:
- https://goo.gl/LqU7kG
- https://goo.gl/xBDsQw
- https://goo.gl/gphjpT
- https://goo.gl/F4NXQo
2 - https://goo.gl/HrvrHK
3 - John Haugeland: Artificial Intelligence: The Very Idea.
4 - Derek Partridge: A New Guide to Artificial Intelligence..
5 - Michael C. Harris; Artificial Intelligence.
Sorry, we're having trouble playing this video. Learn more (https://www.facebook.com/100000083042193/videos/pcb.1811631552182929/1811629318849819?)
Sorry, we're having trouble playing this video. Learn more (https://www.facebook.com/100000083042193/videos/pcb.1811631552182929/1811629078849843?)
Sorry, we're having trouble playing this video. Learn more (https://www.facebook.com/100000083042193/videos/pcb.1811631552182929/1811629522183132?)
Sorry, we're having trouble playing this video. Learn more (https://www.facebook.com/100000083042193/videos/pcb.1811631552182929/1811626905516727?)