لسه مع الروبوت "صوفيا" و نبدأ نعرف ايه هي قوانين الروبوت الثلاثة.. و هي حقيقة و للا خيال؟
1 ــ على الرويوت ألا يؤذى الإنسان أو يتسبب فى أذى إنسان عن طريق الإهمال أو التقاعس.
2 ــ على الروبوت أن ينفذ أوامر الإنسان ما لم يتعارض هذا مع القانون الأول .
3 ــ على الربوت أن يحمى وجـوده ما دام هـذا الوجود لا يتعارض مع القانونين الأول والثانى .
دي القوانين الثلاثة اللي حطها "إيزاك عظيموف Isaac Asimov" و هو بيكتب مجموعته الرائعة "انا روبوت I, robot".. عن آليين مزودين بذكاء صناعي، بيخدموا البشر في بيوتهم و بيقوموا باعمال النضافة و الحراسة.. و اعمال كتير في شتى مجالات الحياة..
و لأن الروبوت مزود "بذكاء" صناعي.. فكان من المحتم إن يكون فيه صمام أمان يمنعه من إيذاء البشر لو اتطور الذكاء دا.. فهنا كان وضع القوانين الثلاثة دي..
بتتاخد القصة و تتعمل فيلم.. و بيتعمل لها تهيئة للسينما بنفس اسمها.. و بنكتشف في الفيلم إن في روبوت "بيبدأ يدرك ذاته".. و بيتمرد على القوانين الثلاث اللي وضعهم صانعوه.. و بيكون بداية خيط بيرشد مفتش الشرطة "ويل سميث Will Smith" للكمبيوتر الأم، اللي بتحرك و تتحكم في كل الروبوتات في العالم..
الكمبيوتر الأم هنا طورت ذكائها الصناعي الخاص.. وخدت مبدأ "محمد مرسي" و قررت بيه تتحكم في البشرية "مفيش مانع نضحي بشوية عشان الباقي يعيش".. و قررت تسيطر على البشر، و تتحكم فيهم و تمنعهم من الحب و التفكير و الكراهية و الحروب و التلوث و افناء الأرض..
القصة بتعكس مخاوف الإنسان من تزويد الآلات بذكاء صناعي.. يخليها في المستقبل صاحبة قرار مستقل..
ايه هو "الذكاء الصناعي artificial intelligence"؟
الفكرة قديمة أوي.. من قبل الميلاد.. أشهر شخصية امتازت بيها كانت "تالوس Talos" الأسطورية..
و "تالوس" دا تمثال برونز هائل بيحمي كريت من غزوات القراصنة.. اللي عايز يفتكر "تالوس" يفتكر الفيلم القديم "جيسون و آلهة الحرب Jason and the Argonauts".. اللي فيه تمثال هائل قام من مكانه يقتل جيسون و رجاله لما اعتدوا على كريت.. اللقطة دي موجودة في ثالث لينك في المراجع..
و بعدين "هيرون السكندري Heron of Alexandria" بيكلمنا عن رجال معدنية شبه تالوس بس في حجم البشر.. بيقوموا بدور جنود و عسس..
ذكاء يخلي الأجهزة بتقدر تواجه مشكلات جديدة و تطور لها حلول عن طريق الاستدلال المنطقي بما يزيد من فرصة نجاحها في مهمتها..
دا هو الذكاء الصناعي في أبسط تعاريفه..
"رامون لول Ramon Llull" سنة 1250 صمم آلة عجيبة.. بس ماعرفش يصنعها.. اسمها "أداة الاستدلال المنطقي لحساب التفاضل والتكامل Calculus ratiocinator".. وصلتنا رسومها.. و دي آلة يفترض إنها كانت تقدر تحل معضلات شتى عن طريق الاستدلال المنطقي..و الواقع ان الآلة دي بتكنولوجيا عصره كانت مستحيلة الصنع..
بس البداية الحقيقية كانت في الخمسينيات..
و بالتحديد سنة 1956، لما جه واحد جمع كل الخيوط دي.. و ربط بين الذكاء البشري و الآلة.. و اتكلم عن الإستدلال المنطقي للآلات..
و الغريب إنه كان مستند للقصة اللي كتبها عظيموف سنة 1940..
الراجل دا اسمه "جون مكارثي John McCarthy" أستاذ علوم كمبيوتر أمريكي.. و أول واحد صاغ مصطلح "الذكاء الصناعي".. و النهاردة اسمه "ابو الذكاء الصناعي Father of AI"...
رجال الصناعة مابيهتموش أوي خصوصا و هم شايفين الفكرة فلسفية "آلة عندها قدرة على استدلال منطقي؟" بس سنة 1957.. في شركة اسمها نيويل Newell" بتقرر تنفذ.. و بالفعل بعد سنتين بتخرج ببرنامج اسمه "حلال المعضلات General Problem Solver"..
البرنامج نجح في حل مشاكل بسيطة.. حسابية أو غيرها.. بس ماعرفش يحل مشاكل حقيقية كانت بتتقدم له..
دا كان نصر عظيم وقتها لأننا بنتكلم عن أوائل الستينيات..
بس مع إعلان "مكارثي" في الخمسينيات عن المصطلح.. في مجموعة طلبة جامعة.. سن 17 و 18 سنة.. عملوا ورشة عمل.. و بدأوا يشتغلوا في صمت..
و فجأة خرجوا سنة 1958 بآلة تقدر تلعب شطرنج مع بشري..
يعني آلة ذكية.. و بتطور مواقفها طبقا لمعضلات جديدة.. و تحاول تفوز و تنجح في هدفها..
و هنا اتدخل الجيش الأمريكي بقوة.. و مول الأبحاث دي بتمويل مفتوح..
و دخل رجال الأعمال السباق..
و لكن الفشل لاحق الجميع مرة ورا أخرى..
وفي منتصف السبعينيات انهارت شركات كتير بتحاول تتقدم في المجال دا بعدما صرفت مليار دولار تقريبا على أبحاث مانجحتش.. و بدأت الحكومة تهتم بأبحاث أهم زي تطوير أسلحة الدمار الشامل و غيره، و دخل العالم في مرحلة اسمها "شتاء الذكاء الصناعي AI winter"..
العالم بدأ يتكلم عن فشل الذكاء الصناعي.. لولا ظهر باحث اسمه "رودني بروكس Rodney Brooks" قدم لهم امثلة كتيرة على نجاحه في الحياة.. و عاد الاهتمام به بقوة..
من ضمن الحاجات دي روبوت دردشة اسمه "إليزا chatterbot ELIZA" اتعمل سنة 1966.. و دا روبوت ممكن يقعد يعمل معاك شات ساعة على الكمبيوتر.. من غير ماتكتشف انه روبوت.. ممكن بس تحس انه شخص "غبي شوية"..
تقدر تحمل إليزا من رابع مرجع و تجرب تدردش معاها و تشوف الذكاء الصناعي الآلي على الطبيعة..
ايه فايدة الذكاء الصناعي؟ و ايه تطبيقاته في الروبوتيكس.. و بيفيد في ايه و يضر في ايه.. و ايه مهامه ووظائفه و حدوده؟
في أجهزة اتمردت فعلا على البشر؟
دا يطول الكلام عنه و يبقى للحيث بقية..
-----------
مراجع:
-----------
1 - https://goo.gl/LqU7kG
2 - https://goo.gl/xBDsQw
3 - https://goo.gl/yyri3q
4 - https://goo.gl/N7swVh
5 - Crevier 1993.
6 - Tao, Jianhua; Tan, Tieniu (2005). Affective Computing and Intelligent Interaction.
7 - Skillings, Jonathan (3 July 2006).
8- Nilsson, Nils (1998). Artificial Intelligence: A New Synthesis. Morgan Kaufmann...