قررنا نتكلم سوا عن الروبوت صوفيا.. "شبيهة البشر Humanoid".. و من الموضوع دا ابتدينا نعرف ايه هي الروبوتات و تاريخها ووصلنا لـ"ليوناردو دافينشي"..
"دافينشي" كان رسام.. مهندس.. عالم نبات، عالم خرائط، جيولوجي، خبير تشريح.. موسيقي.. نحات.. معماري.. و مخترع..
عكس مخترعين كتير قبله.. "دافينشي" ما صممش اختراعاته، و لا حد فهمها تقريبًا في عصره.. بس فيما بعد العلماء لاحظوا شيء عجيب..
رسوم لطائرة هليكوبتر، اللي موجودة في الرسم رقم 1.. بتعمل بالحبال، عن طريق ان راكبها يشد حبل جواها باستمرار كأنه بيقرع جرس كنيسة، فالمراوح تلف، و ترتفع به..
هنا العلماء درسوا الفكرة دي و قالوا إنها مستحيلة.. و غير قابلة للتنفيذ، لأن القوة العضلية مستحيل تتواصل لدرجة إنها تحافظ على ثبات التصميم دا في الجو..
بس الفضل في ظهور فكرة الطيران العمودي هنا، يرجع لـ"دافنشي".. الفكرة اقتبسها بعد كده الأديب "جول فيرن Jules Gabriel Verne " في قصته اللي اسمها "مقص السحاب Clipper of the Clouds".. و القصة دي بدورها كانت الهام لشاب روسي اسمه "إيجور سيكورسكي Igor Ivanovich Sikorsky" بفكرة "المروحية اللي بتطير".. و سنة 1909 صنع للإتحاد السوفيتي أول هليكوبتر في التاريخ...
فكرة غريبة إن رجل من القرن الرابع عشر يبتكر هليكوبتر، بس دافنشي ماوقفش هنا، صمم "دبابة" كاملة.. اللي في الرسم 2.. مدرعة و مصفحة ضد القذائف، و بتدور حول محورها في مكانها بآالية من التروس و الجنازير، عشان تطلق قذائفها في كل اتجاه..
محدش أيام دافنشي فهم إيه دا بالضبط.. و محدش فكر يصممه..
الباراشوت.. صممه دافنشي و رسمه.. و كان عامله "مثلث" الشكل.. و دا صممه العلماء بالفعل، و جربوه، و اتضح لهم انه ناجح.. جدا..
المترليوز.. مدفع الميدان الرشاش اللي بيطلق قذائف ورا بعض.. ترجع فكرته لدافنشي.. و رسمه زي ما هو واضح في صورة 3..
دافنشي و هو بيصمم رسوم الهليكوبتر بتاعته.. حط فيها رسم لاختراع بسيط، عشان أجزاءها متتآكلش من الدوران السريع.. ولولا اختراع دافنشي دا مكانش بقى في صناعة من الأصل.. و كانت كل آلات المصانع بقت بتتآكل باستمرار، و دا يخلي سعر البضائع المنتجة غالية جدا..
صمم "الرولمان بلي ball bearings".. اللي في الصورة الرابعة.. دا موجود النهاردة في كل شيء تقريبًا.. من مروحة الهواء اللي في سقف حجرتك.. للابتوب اللي انت بتستعمله.. مرورا بالسيارات و آلات و مكن المصانع.. للصواريخ و سفن الفضاء..
عمل جسور متحركة.. و صمم الجسر اللي في صورة 7...
صمم الدراجة ذات البدال.. العجلة اللي بنركبها قبل ما يعملها الحداد الأسكتلندي "كيرباتريك ماكميلان Kirkpatrick Macmillan" بقرون..
عمل بدلة غوص.. مزودة بخرطومين.. واصلين لسطح مركب.. و بيضخوا الهواء للغواص.. البدلة دي اتعملت فعلا.. بس بعد وفاة دافنشي برضه بقرون..
صمم المشغل الميكانيكي، و صمم آلة موسيقية تجمع بين القانون و البيانو.. و صمم روبوت حقيقي ذاتي الحركة من بدلة معدنية لفارس من فرسان القرون الوسطى.. اللي في الصورة 5 دا..
و برضه العلماء صمموا الروبوت الأخير دا.. و اتحرك و اشتغل بنجاح..
الروبوت دا كان "هيومانويد Humanoid" يعني "شبيه بالبشر".. يعني دا يعتبر أول جد لـ"صوفيا" في التاريخ.. كان اسمه "الفارس الميكانيكي".. و العلماء سموه بعدين "روبوت ليوناردو Leonardo's robot"..
لما تبص على رسوم دافنشي و أفكاره و تعرف إنه مات سنة 1519.. تحس إنه كان شايف المستقبل و هو بيرسم ابتكاراته دي..
بعد كده ظهر سنة 1815 شاب ياباني اسمه "هيساتجي تاناكا Tanaka Hisashige".. و دا كان بيعمل ألعاب ميكانيكية معقدة ذاتية الحركة.. و فضلت المحاولات مستمرة.. لحد ما تضطرنا الحكاية اننا نقفز قفزة واسعة.. للعام 1956..
في السنة دي الأمريكي "جورج ديفول George Devol" بيصمم أول روبوت حقيقي يقدر يتعامل مع الأدوات و المواد.. و بيسميه "يونيميت Unimate"..
بيتركن ورق الروبوت في الأدراج، لحد ما أحد أصدقائه بيقدم الفكرة لعدة شركات، و هنا.. بتشتريه "جنرال موتورز General Motors" سنة 1961، و بتستخدمه في لحام قطع السيارات و رش الدوكو.. و التعامل مع الأجزاء المعدنية الساخنة و الملتهبة..
بتحاول جنرال موتورز بدورها تبيع الاختراع و بتعمل خط لإنتاج الروبوت "يونيميت".. بس محدش بيشتريه و لا بيهتم.. لحد سنة 1975، لما بيتطور "يونيميت" و يبقي "روبوت قابل لأعمال التفكيك و التركيب و البرمجة Programmable Universal Machine for Assembly".. و ساعتها بتنهال الأرباح بسببه.. و بيبدأ يتعرف عالميا و يبقى لا غنى عنه في الصناعة..
"يونيميت" في الصورة رقم 6.. اللي هو الدراع الآلي اللي بيعمل وظايف معينة و كلنا بنشوفه في مصانع السيارات بالذات..
بس خلال فترة تصنيع و تسويق "يونيميت"، كان ظهر للعالم أول روبوت، الناس يقروا عنه و يشوفوه بيصطدم بالبشر و يخالف القانون و يتحدى الجميع بشكل مباشر، و دا نواصل الكلام عنه لاحقًا..
و يبقى للحديث بقية..
-----------------
مراجع:
-----------------
1 - منشورات سابقة: https://goo.gl/LqU7kG
2 - Liana Bortolon, The Life and Times of Leonardo, Paul Hamlyn, 1967..
3 - PUMA Robot Becomes Part of American History at the Smithsonian Robotics Online -
4 - https://goo.gl/acS2u1
5 - Rosheim; Mark Elling. Leonardo's Lost Robots. Springer, 2006...