إستريحنا شوية من قطة "شرودينجر" اللي الناس بدأت تكرهها بجنون.. و مع ذلك لما غابت يومين بدأوا يسألوا عنها...

المنشورات السابقة في أول مرجع للي يحب يراجعها...

الحوار عن "قطة شرودنجر" ودانا للربة المصرية القديمة "باست" اللي بتحوي في صدرها روح اللبؤة "سخمت".. اللي لها قصة غريبة بدورها..

كان مرة "رع Ra".. كبير الآلهة.. صحا في يوم و جسمه كله بدأ يتحول إلي ذهب.. و عظامه كلها متحولة إلي فضة (كناية على إنه كبر و شاخ).. و لما نزل إلي معبده بمنظره دا سخر منه المصريين.. و استخفوا به.. فغضب على المصريين غضب شديد.. وصعد إلي مركب الشمس.. و أطلق عليهم بنته المدللة سخمت Sekhmet".. محبوبة بتاح، عين رع، وسيدة الحرب، و ملكة الأرضين (مصر العليا والسفلى)، و سيدة الأرض الليبية.. و كانت سخمت ربة محاربة.. برأس و أنياب و مخالب لبؤة.. مبتأثرش فيها السيوف و لا الرماح.. و يرتجف أمامها أشجع المحاربين...

حاول المصريين يتصدوا لسخمت.. بس الأسلحة مأثرتش فيها إطلاقا.. و اتحطمت الرماح على صدرها.. سرعتها زي الرياح و قفزاتها في ارتفاع الجبال.. و أنيابها و مخالبها قاتلة.. و منطلقة تمزق الناس في كل اتجاه و تفترسهم..

إزاي ممكن تنتصر على كائن زي دا؟؟

بالصلاة.. بدأ المصريين يتضرعوا لرع إنه يسامحهم و يرفع عنهم العذاب دا.. و في النهاية رق قلب رع.. و أمر سخمت إنها تتوقف و ترجع...

و هنا حصل شيء غريب..

"سخمت".. و لأول مرة في التاريخ.. رفضت الأمر الصادر من أبوها.. لأنها كانت تذوقت الدم البشري.. و استساغت مذاقه، و قررت تستمر.. حتى لو دا أفنى الحياة البشرية من على الأرض كلها...

بعد مغامرات و اجتماع مع باقي الآلهة بيلاقي "رع" الحل عند "تحوت أو توت Thoth" برضه.. رب العلم و الحكمة و الجبر و الهندسة.. اللي بيحوي عقله كل علوم و آداب و فنون الكون.. واللي بيسيطر على سخمت بحيلة بارعة و بسيطة في نفس الوقت.. ممكن نحكيها بكرة..

كان آينشتاين رفض قصة "شرودينجر" و قطته دي و مبدأ عدم اليقين.. و قرر إنه لازم يكون في ثغرات في النظرية دي.. و حاول يفند مبدأ عدم اليقين بتاع هايزنبرج، عن طريق عدة تجارب فكرية.. دخل فيها السرعة و كمية الحركة و الزمن..

آينشتاين كان عينه على الكون كوحدة هائلة بتشمل وحدات أصغر.. و مكانش عارف ينطلق يقيس و يدرس قواعد الكون بنظريات الكم.. دا لأن زي ما قلنا أول مرة.. ميكانيكا الكم مبتنطبقش على الأجسام الكبيرة..

حاول آينشتاين يوفق النظريات دي مع النسبية. و يشوف تطبيقات الكوانتم على الكون.. و بدأ يدرس.. ممكن الظل يتواجد من غير ضوء.. ممكن فعلا تكون على حالتين في وقت واحد.. ممكن تتواجد في مكانين في وقت واحد؟ و بعدين تراجع عن أبحاثه و انطلق في اتجاه آخر..

و ياريته كان استمر..!

لأنه من أقل من سنتين تقريبا.. في بروفسير فيزياء اسمه "تيم كوسلوفيسكي Tim Koslowski" حط نظرية غريبة.. و درسها.. و عمل عنها بحث موسع مع فريقه.. و توصل فيها لنتيجة كاد أن يتوصل لها آينشتاين...

قال لنا ميكانيكا الكم صح.. والظل موجود لوحده من غير ضوء.. و الزمن ممكن يمشي بالعكس..

الظل هو "حجب الضوء بجسم معتم" في أبسط تعريفاته.. تحط جسم مش شفاف قدام أي شعاع ضوء.. تلاقي ظل للجسم دا بما حجبت من ضوء.. و بياخد غالبا نفس الشكل..

بس "كوسلوفيسكي" ضرب شعاع ليزر قوي.. في وسط غازي.. و سلط علي الليزر شعاع ضوء قوي..

و مع إن الليزر هو نفسه ضوء.. لكن في التجربة ظهر لشعاع الليزر ظل...

يعني الضوء نفسه بقي له ظل، بسبب تداخل فوتوناته و قال لنا ممكن نحسب الموضوع دي باحصاء "آينشتاين- بور Bose–Einstein statistics"...

راح بينا من التجربة على حتة تانية و قال لنا إن في طاقة افتراضية مجهولة بتملأ الفضاء اسمها "الطاقة المظلمة dark energy"..

الطاقة دي عبارة عن "ظل" كائن بذاته..

ظل بلا ضوء..

و الأغرب إن الظل دا مش ثابت.. دا في حالة تمدد..

و إن تمدد الطاقة دي.. هو اللي بيخلي الكون نفسه يتمدد...

و يتسع..

ظل بدون ضوء.. على شكل طاقة صافية.. بيؤدي لتمدد الكون نفسه...

و زي ما وصل آينشتاين و قال لنا في كونين توأمين.. "كوسلوفيسكي" قال لنا.. الكون التاني الموازي دا بقى.. الزمن فيه بيمشي بالعكس..

يعني لو رحت هناك ترجع عقارب ساعتك للخلف..

و الأجسام بدل ما تعجز و تشيخ.. تصغر..

و الجزيئات بدل ما تتحد.. تنفصل..

زي ما كوننا بيتحلل.. الكون الموازي الغريب دا كمان بيتحلل..

و الجبال بتتفكك إلي رمال.. و الرمال بتتفكك لغبار زي مسحوق الدقيق.. و المسحوق بيتفكك لذرات.. و المياه بتتفكك إلي هيدروجين و أكسجين.. لحد ما تحين ساعة الكون دا..

و زي ما كوننا حينهار و ينطوي علي نفسه زي الورقة.. الكون التاني دا حيصغر و يكرمش و ينطوي على نفسه زي الورقة.. و يرجع زي ما بدأ زمان..

جسيم دون ذري...

ثم دفقة من الطاقة...

حالة تحلل عكسية بتحصل طول الوقت.. بتخلي الكون دا يفني بس مش عن طريق الشيخوخة.. بالعكس..

و الكون دا خاضع بالكامل للكوانتم.. لأن طول الوقت بيتفكك إلي جسيمات ذرية و دون ذرية.. و جسيماته بتتفكك و تصغر.. و ميكانيكا الكم بكل فروعها هي مفتاحه..

و الكون الموازي دا فيه خاصية غريبة..

كله ظل...

غارق في الظل.. و عكس اللي بيحصل عندنا هو الصحيح هناك.. لو حجبت الظل اللي بيملأ الكون الغريب دا بجسم معتم.. تلاقي ضوء..!

و مع إن مناظرات بور و آينشتاين، كانت قائمة على رفض آينشتاين لمبدأ هايزنبرج و قطة شرونجر في معظمها.. و كان لها سند علمي.. بس بور بعد وفاة آينشتاين، أعلن هزيمته في المناظرات.. و احتفل بانتصاره على الفيزيائي الرهيب عبقري القرن..

إلا إنه، و بالرغم من دا.. "كوسلوفيسكي" قال لنا إن الكم صح.. و "بور" صح لكن آينشتاين برضه صح...

الاتنين صح.. "بور" مانتصرش على آينشتاين و آينشتاين ماهزمش بور.. كل واحد منهم شاف الأمور من منظور مختلف...

وضع القطة في الصندوق دا مش "غير يقيني".. وضع الجسيم مش غير يقيني.. دي أوضاع قابلة للقياس..

و أكد "كوسلوفيسكي" على فكرة آينشتاين و قال لنا ببساطة.. ممكن نعرف القطة مع الجسم المشع حية و للا ميتة لو ببساطة.. عرفنا عمر الجسم المشع و حيتحلل امتي بالضبط.. في نقطة زمنية معينة.. حنكون متأكدين انه ماتحللش.. و القطة حية.. و بعدها حنكون متيقنين إنه اتحلل و القطة ميتة...

و في نفس الوقت قال لنا "كلوفيسكي" بس إمتي؟ ما يمكن القطة استحملت جرعة الإشعاع بعد تحلل الجسيم المشع.. و مماتتش لحد ما فتحنا الصندوق..

حنلاقيها منهكة.. مريضة.. بس حية..

و التقط طرف الكلام من "كوسلوفيسكي" علماء كوانتم آخرين.. و قرروا يدرسوا تجربة جديدة.. و يشوفوا هل من الممكن إنك تتواجد في مكانين في وقت واحد فعلا؟...

و بناء على الفكرة دي صنعوا آلة عجيبة..

و لنا مرة قادمة نتكلم فيها عن الآلة دي وميكانيكا الكم.. و للحديث ختام...

--------------

مراجع

--------------

1 - منشورات سابقة:

-https://goo.gl/2GfWC2

- https://goo.gl/8QyXaq

- https://goo.gl/qAedCr

- https://goo.gl/RVlbjH

- https://goo.gl/PZRU12

- https://goo.gl/PZRU12

2 - https://goo.gl/yr7Q0V

3 - Walsh, Karen McNulty (February 19, 2015). "Data from RHIC, other experiments nearly rule out role of 'dark photons' as explanation for 'g-2' anomaly"...

4 - D.H. Perkins (2000). Introduction to High Energy Physics. Cambridge University Press....

5 - P. Strange (1998). Relativistic Quantum Mechanics: With Applications in Condensed Matter and Atomic Physics: https://goo.gl/T8wxls

6 - P. J. E. Peebles and Bharat Ratra (2003). "The cosmological constant and dark energy" 75: 559–606...

#quantum

#كوانتم

#Relativistic_quantum_mechanics