حلقتنا الاخيرة مع قطة شرودنجر.. الحلقات دي مش حتخلينا آينشتاين و لا بور.. بس تخلينا نعرف شيء عن علم غامض.. فضل كهنوت و حكر على المتخصصين وقت طويل.. تساعد كمان الطلبة في ثانوي أو هندسة في نقاط كتير المناهج عجزت عن توضيحها..
الأجزاء الأولى في أول مرجع للي يحب يرجع لها...
"رع" لما ماعرفش يسيطر على "سخمت".. استشار حكيم الكون كله "تحوت".. اللي كان عنده الحل بالفعل..
استدعى "تحوت" إله النوبة "ددون" و هو مختص بالعطور و البخور و الألوان.. "تحوت" يقدر يستدعي أي رب في مصر القديمة وقتما شاء وحيث شاء بما فيهم "رع" نفسه.. و الأرباب المجنحة زي "إيزييس" و "حورس".. كانت بتلم أجنحتها في حضرة "تحوت" احتراماً لعلمه الرهيب اللامحدود..
المهم "تحوت" جاب إله النوبة "ددون" و رمى في النيل خلطة أعشاب حولته لنهر من البيرة.. و طلب من "ددون" يحول النيل للون الدموي الأحمر.. اللي اثار شهية سخمت واتصورته دم و راحت تشرب منه.. و فضلت تشرب لحد ما سكرت و فقدت الوعي..
و فقدت قواها و قدراتها السحرية...
و بعدين نزل مساعد رع.. اسمه "حكا".. و هو السحر نفسه متجسد في هيئة بشرية.. و رجع بيها في سلام..
لما فاقت حزنت حزن شديد على اللي عملته في المصريين و طلبت نفيها إلي مدينة "دندرة".. و من يومها و "دندرة" اسمها عند أهل مصر مرتبط بشيء مخيف يجهلون كنهه.. لأن "سخمت" عايشة فيها.. فتسمع مننا مصطلحات زي "دي ليلة دندرة".. و "حنقلبها دندرة".. يعني ليلة مرعبة أو ماشابه ذلك...
عقدة الذنب بتتعاظم عند "سخمت" مع الوقت و بتطلب من "رع" يفنيها.. و يقضي عليها.. بس مبيرضاش لأنها بنت حبيبته طبعا.. لكن بيحبسها في قلب القطة "باست".. اللي اتكلمنا عنها لما بدأنا الحديث عن "قطة شرودينجر".. "رع" بيقدر يستدعي "سخمت" من قلب "باست" بإنه يثير غضب "باست" في اي وقت...
نرجع لميكانيكا الكم.. و فيلم عالمي اسمه "المقابل Paycheck".. اتعمل سنة 2003...
و "بن أفليك Ben Affleck" مهندس عبقري.. اسمه "مايكل جيننجز Michael Jennings".. بس غير راضي عن دخله و لا راتبه.. فبيصمم آلة عجز عن تصميمها العلماء لسنين..
كمبيوتر كوانتم...
و مع خبرته بالكوانتم بيطور آلته و أبحاثه و بيوصل لنتيجة عجيبة...
بالجسيمات دون الذرية اللي سرعتها بتفوق سرعة الضوء.. بيقدر يخترق حجب الزمن...
و بيقدر الكمبيوتر الهائل دا يجيبله على شاشته لقطات حقيقية من المستقبل...
كل ما عليك انك تحط كفك على ماسح في الكمبيوتر.. و يلتقط بضع ذرات منك و يرسل جيسماته إلي المستقبل يبحث عنها ويستقبلها و يجسمها.. و يرسل لك صور حية من اللي بيحصلك في مستقبلك...
و مع نجاح الآلة المبهر.. بيقرر "مايكل" إنه يبيعها بمليار دولار دفعة واحدة...
بتتوالى الأحداث.. و بعدين حبيبته بتوريله تسجيل التقطته من على شاشة الآلة.. تسجيل للقطات من اللي آلته عملته في المستقبل...
و تعاقبت امامه صور مانشيتات الجرائد.. و الدول بقت تتنبيء بخطوات بعضها مستقبلا.. و بعضها مافهمش تصرفات البعض و نشبت خلافات رهيبة و..
و انتهت اللقطات بسحابة عش الغراب المميزة للإنفجارات النووية.. في قلب نيويورك...
الآلة تسببت في نشوب حرب عالمية ثالثة...
نووية...
و أخيرة...
و هنا، بعدما كان مايكل بيسعى لبيع آلته.. اللي استولت عليها المخابرات المركزية.. انطلق يحاول التسلل لتحطيم الآلة بأي ثمن..
آينشتاين في مغامرته العلمية أول من اعتنق نظرية الكوانتم و اقتنع بها.. و بعدين رجع و رفضها زي ما شفنا و دخل في مناظرة أبدية مع "بور".. و رفض إن الجسم يوجد في مكانين في وقت واحد.. او هيئتين في وقت واحد..
الكوانتم بتقول لنا إن الجسيمات الدقيقة بتمتص الطاقة بمقدار معلوم.. و عمرها ما تثبت و تكون في حالة سكون "عشان كده قالوا القطة حية و ميتة مع بعض لحد ما نشوفها.. لأنه مايقدرش يقول بحالة واحدة و إلا يبقى حكم بثباتها".. و قالت انها حرفيا ممكن تبقى في مكانين في وقت واحد...
التقط طرف الخيط دا إتنين دكاترة فيزياء أمريكيين.. هم "أندرو كليلاند Andrew Cleland" و "جون مارتينيز John Martinis"...
الاتنن دول سنة 2010.. عملوا آلة عجيبة..
جابوا مادة شبه موصلة "يعني مادة صلبة بيحكموا في قدرتها على توصيل الكهربا عن طريق انهم يضيفوا لها عناصر اخرى"..
و عملوا من المادة دي مضرب دقيق أوي.. شبه المجداف.. المفروض يقدر يتذبذب زي الهزاز بتاع التليفون و هم بيتحكموا في تردد الذبذبة دي...
و بعدين بردوا المجداف دا إلي 273 درجة مئوية تحت الصفر.. و بعدين رفعوا طاقته بمقدار "كوانتم واحد single quantum"...
و بدأوا يخلوه يتذبذب بسرعة 6 مليون مرة في الثانية..
و أطلق المضرب شحنتين كهربائتين مختلفتين.. طاقتين في آن واحد.. طاقة ضعيفة و طاقة كبيرة في نفس الوقت...
و دي من الظواهر اللي اتكلمت عنها ميكانيكا الكم و رفضها آينشتاين..
يعني كأنك بالضبط بتجري.. و ماشي على مهلك في نفس اللحظة!
طبعا دا مستحيل يحصل معاك لأننا قلنا من قبل.. نظرية ميكانيكا الكم مبتنطبقش ببساطة كده على الأجسام الكبيرة.. هي ملعبها الجسيمات الذرية..
و دون الذرية...
طيب ايه فايدة الآلة دي؟ الآلة دي غير انها أثبتت صحة نظريات ميكانيكا الكم.. ممكن تبقى اللبنة الأولى لصنع كمبيوتر كوانتم..
كمبيوتر في حجم اصغر اظافرك.. شايل كل المعلومات عن كل شيء في الوجود.. كمبيوتر مينفعش يتقرصن ابدا لأن المعلومات اللي عليه متشفرة بكل الشفرات الممكنة في نفس اللحظة و بتتغير في نفس اللحظة...
و كان لازم الكوانتم تجرنا لحضن النسبية بتاعت آينشتاين.. و ينشأ فرع جديد اسمه "ميكانيكا الكم-النسبية Relativistic quantum mechanics".. و تحاول تسد الفجوة بين النظريتين..
الجسيمات لو زادت سرعتها تزيد كتلتها.. يعني تكبر (ماعدا الجسيمات معدومة الكتلة زي فوتون الضوء).. و تخرج بالتالي من مدار الكوانتم.. و تدخل في النسبية العامة...
ولو المجال الزمني اتغير تدخل في النسبية العامة كذلك..
تخيل إنك بتكنولوجيا معينة.. بلمح البصر سافرت لكوكب "عطارد Mercury" و قضيت هناك يوم واحد.. و رجعت الأرض بانتقال آني برضه.. بلمح البصر...
يعني ايه يوم واحد؟ يعني تقضي ليل و نهار.. زي الارض.. حركة الارض بتجري الزمن اللي نعرفه.. ليل و نهار...
الحقيقة لما ترجع الأرض بعد يوم.. حتلاقي إنه مر على الأرض شهرين تقريبا..
طيب ليه؟
لأن دورة عطارد حول محوره بتتم في 58 يوم تقريبا.. بينما الأرض دورتها بتتم في 24 ساعة...
لو سبت ابنك لسه مولود على الأرض و رحت قعدت يوم واحد في "كوكب الزهرة Venus".. و رجعت.. حترجع تلاقي الولد بقى عنده 8 شهور.. لأن يوم الزهرة يساوي 243 يوم أرضي...
الناس اللي سافرت برا لدول صناعية زي اليابان أو الصين أو أمريكا تلاحظ المسألة دي بشكل أبسط و أوضح...
أول ما بتخرج من المطار بتلاقي الحياة سريعة.. ناس مستعجلة.. و كله منطلق.. و محدش فاضي.. المترو فيه جحافل بتمشي بسرعة و بتتحرك بسرعة و ليها هدف و عارفة هي رايحة فين و بتتحرك لأيه.. و حاتسمع كلمات زي "أنا مشغول".. "انا وقتي ضيق".. "يجب أن نسرع".. و بتحس لفترة بعدم اتزان.. ايه السرعة دي و كله مستعجل.. إيه الموضوع...؟
بعد فترة.. بتلاقي نفسك بقيت زيهم.. بتتحرك بسرعة و مستعجل و مواعيدك مهمة و الوقت عندك له ثمن...
لما ترجع بقى بلدك العربي المبارك.. حاتحس لأيام إنك عايش في فيلم ماشي بالسرعة البطيئة.. و تلاقي و أنت مستعجل لو دكتور و رايح تنقذ حالة أو عندك ميعاد امتحان أو مقابلة مهمة.. تلاقي الناس عاملة مجموعات و شلة و ماشيين علي الرصيف بالعرض و على مهلهم..
و تلاقي واحد سايق عربيته مش عارف هو رايح فين.. و يدي إشارة يمين و بعدين يكسر عليك شمال (و يشتمك انت في الآخر عشان معندكش موهبة إنك تقرا افكاره).. وواحد ماسك الطريق السريع شمال على سرعة 8 كيلو.. و تسمع بقى "يعني أنت وراك الديوان".. و إلخ...
بعد فترة حتتأقلم تبقى زيهم برضه...
منظومة الزمن اتغيرت و الزمن اللي بتتحرك فيه اتغير.. و انت بتلاحظ دا لفترة لأنك "مراقب جاي من منظومة أخرى".. بس بعد فترة.. تلاقي نفسك كأنك ملاحظتش حاجة و بقيت زيهم..
إذن الزمن بيتغير بتغير المنظومة.. حسب سرعة المنظومة بيبطيء أو يسرع.. و انت مش بتحس.. مايحسش إلا اللي بيراقبك من منظومة أخرى ...
السرعات و الأحجام و الكتل بتتغير مع السرعة.. و لو زادت الكتلة.. و مابقتش جسيم دون ذري صغير.. نخرج برا الكوانتم...
و دي فجوة بين النسبية و الكوانتم..
يحصل ايه لو سديت الفجوة دي؟
تقدر تمسك "الجرافيتون".. الوحدة معدومة الكتلة.. اللي ماسكة عمارة الكون بأكمله.. و رابطة الكواكب و النجوم و المجرات ببعض..
يعني تخليك تصنع قفاز بسيط.. تشاور بيه لسرب دبابات فترفعه عن الأرض و ترزعه من ارتفاع 30 الف قدم تحوله لعجين...
تنتقل بدون وقود..
توقف الصواريخ النووية في الهواء.. و تعيدها إلي مرسلها.. و تنتقل من بلد إلي بلد بلمح البصر...
تجيب الضوء ينحني عندك زي ما بيعمل مع الثقوب السوداء.. و يخضع لأوامرك و إشاراتك...
يخليك تنتزع الفيروسات و السرطانات من جسم الإنسان.. زي ما قطعة المغناطيس بتجذب برادة الحديد عبر شبكة صياد...
تبني منشأة مرتفعة اصلا عن سطح الأرض و معلقة في الهواء بدون محركات و لا وقود.. زي "مكتبة تحوت" اللي صنعها بنفسه في حكايات مصر القديمة..
الموضوع شبه السحر..
و تطبيقات الكوانتم مش بتنتهي...
بكده نبقى خدنا عنها فكرة.. و عرفنا ليه "قطة شرودينجر" حية و ميتة في آن واحد..
القطط لها سبع ارواح على كل حال...
---------
مراجع
--------
1 - منشورات سابقة:
-https://goo.gl/2GfWC2
- https://goo.gl/8QyXaq
- https://goo.gl/qAedCr
- https://goo.gl/RVlbjH
- https://goo.gl/PZRU12
- https://goo.gl/K0cUGF
2 - Relativistic Quantum Mechanics, an Introduction: https://goo.gl/uxDLiL
3 - Einstein was right, you can be in two places at once: https://goo.gl/HOi81r
4 - F. Coester; W. N. Polyzou (1982). Relativistic quantum mechanics of particles with direct interactions...
5 - E. Abers (2004). Quantum Mechanics. Addison Wesley.
6 - Y. Aharonov; D. Bohm (1959). "Significance of electromagnetic potentials in quantum theory"....
7 - B. R. Martin, G.Shaw. Particle Physics. Manchester Physics Series (3rd ed.). John Wiley & Sons....
#كوانتم#quantum