قطة شرودينجر في مكيانيكا الكم.. جرتنا للحديث عن الربة المصرية القديمة.. القطة "باست".. و منها دخلنا على "تحوت".. رب الحكمة و المعرفة.. اللي بيحوي عقله كل علوم و فنون و آداب الكون..
الحلقات السابقة في آخر مرجع للي يحب يرجع لها..
كانت باست الوحيدة زي ما قلنا اللي بتدخل مكتبة "تحوت" من غير استئذان.. كان في رب وقتها اسمه "أنوبيس Anubis".. دا كان إنسان برأس "الذئب المصري Egyptian jackal" أو "ابن آوى المصري"..
"أنوبيس" كان بيدخل اي مكان في الكون بدون إذن.. لأنه كان مسئول عن الموت.. و بيصطحب أرواح الموتى و يرشدها في العالم الآخر.. و بيحنط الجثث.. و يوزن يوم الحساب أعمال الإنسان على الميزان.. و يشوف أنهي كفة بترجح.. الخير أو الشر.. و بعدها إما يبقى من نصيبك خلود و نعيم أبدي.. او عذاب أبدي مع الرب التمساح "سوبيك Sobek"..
"أنوبيس" الرهيب دا مكانش يقدر يدخل مكتبة "تحوت" من غير إذن منه.. المكتبة دي مكانتش فيها الكتب اللي بيقراها تحوت.. لأن عقله زي ما قلنا فيه كل العلوم في الكون.. كان فيها الكتب اللي بيدونها.. و منها بيعلم البشر و يسجل أقدارهم...
"تحوت" عمل مكتبته بنفسه.. و كان بابها مبيتفتحش من تلقاء نفسه إلا له و لـ"باست".. و كانت ضخمة هائلة فيها ملايين المخطوطات و الكتب.. و بالرغم من ذلك مرتفعة عن الأرض بمقدار عدة أقدام ضد الجاذبية.. على نحو تعجز عنه أي علوم.. باستثناء علوم "تحوت" اللي صنعها...
آينشتاين كلمنا عن الطبيعة المزدوجة للمادة.. و قال لنا إنه تفسير كويس و ممتاز.. بس مش كافي.. و مخرج مؤقت من المأزق اللي واجهه علماء ميكانيكا الكم...
آينشتاين رفض قصة قطة شرودنجر دي.. و قال لهم.. يعني حضراتكم عايزين تقولولي إن لو الجسيمات اللي جوا الصندوق دي جسيمات بارود.. تبقى مشتعلة و مطفية في نفس الوقت لحد ما ألاحظها.. فتتطفي و ترجع مش محترقة.. أو تفضل مشتعلة؟؟
و لو افترضنا إن القطة اللي جوا الصندوق معاها طبق اكل.. تبقى القطة بتاكل و نايمة مع بعض.. لحد ما ألاحظها و تثبت على موقف؟
و بعدين كل ما نختار اختيار الكون يتقسم؟؟ دا ازاي يعني؟ و قال هنا جملته الشهيرة.. "إن الله لا يلعب بالنرد مع الكون"..
الكلام دا مش عاجبني.. و قصة "الحقيقة لا سبيل لإدراكها" دي مش عاجباني.. و حكاية "هايزنبرج" بتاعت الجسيم تقيس مكانه فتتغير سرعته و تحاول تقرا سرعته فيتغير مكانه دي مش عاجباني.. و لابد إن في مطلق و طريقة نقدر نقيس بيها الجسيمات متناهية الصغر دي...
بالنسبة لشرودينجر كانت القطة.. أو الجسيم.. بتتحرك في في الصندوق في عدة أماكن أو أحوال.. طول عرض ارتفاع فوق تحت.. حية ميتة.. بس بالنسبة لآينشتاين كان في بعد رابع القطة دي بتتحرك فيه..
الزمن...
في أي وقت من الزمن انا رصدت القطة دي؟
من هنا بدأ آينشتاين يشتغل على نظرية جديدة.. يحاول يوصل بيا لقانون يرصد بيه الجسيمات الدون الذرية متناهية الصغر دي..
و كانت النظرية اللي بيشتغل عليها دي اسمها "نظرية الحقل الموحد Unified field theory"..
النظرية دي بتقول إن كل القوى الاساسية و العوامل الخاصة بالجسيمات الأولية دي.. ممكن تتكتب في شكل حقل وحيد.. و يبقى لها قانون واحد يفسرها...
من الناس اللي معجبهاش رأي آينشتاين كان عالم اسمه "نيلس بور Niels Bohr".. اللي في الصورة دا مع آينشتاين...
دخل "بور" في مناظرة شرسة شهيرة مع آينشتاين اسمها "سلسلة مناظرات بور-أينيشتاين Bohr–Einstein debates".. و بالرغم من الخلاف دا استمروا أصدقاء لآخر حياتهم..
مناظرات بور آينشتاين كانت مكسب حقيقي لفلسفة العلم.. و "فلسفة العلم Philosophy of science" دي فرع من فروع الفلسفة.. بيعني بدراسة الأسس الفلسفية والافتراضات و التطبيقات في العلوم المختلفة.. زي الكيمياء و الفيزياء والسياسة غيرهم..
و جزء كبير من نسبية آينشتاين.. بدأ و فضل فلسفي لحد النهاية.. زي السفر عبر الزمن...
او "الزمكان"...
المهم آينشتاين مكانش عاجبه كلام ميكانيكا الكم.. و مع ذلك بحثه بدقة..
تناقضات عجيبة...
ممكن الظل يتواجد من غير ضوء؟
ممكن فعلا تكون على حالتين في وقت واحد؟
ممكن تتواجد في مكانين في وقت واحد؟
آينشتاين آمن بالفكرة دي و بدأ يبحثها.. و بعدين بعد شوية رفضها.. و مكملش بحث فيها.. و الحقيقة إنه لو كمل.. كان خد جايزة نوبل مرة ثانية...
ممكن تطبق نظرية الكوانتم فعلا و تتواجد في مكانين في آن واحد؟
دا حوار شرحه يطول.. و يبقى للحديث بقية...
------------------
مراجع
------------------
1 - Niels Bohr in Albert Einstein: Philosopher-Scientist (P.Schilpp, Editor), p.199. Tudor, New York, 1949...
2 - Abraham Pais, "Subtle is the Lord...", The Science and the Life of Albert Einstein, Oxford University Press, p.447-8...
3 - Donati, O; Missiroli, G F; Pozzi, G (1973). "An Experiment on Electron Interference". American Journal of Physics. 41: 639–644...
4 - https://goo.gl/t20j6q : Einstein kills Schrödinger’s cat: Relativity ruins quantum world...
5 - منشورات سابقة:
-https://goo.gl/2GfWC2
- https://goo.gl/8QyXaq
- https://goo.gl/qAedCr
- https://goo.gl/RVlbjH