الدولة العثمانية أول ما نشأت كانت حوالي 200 كم.. وفيها مدينتين فقط.. هم سكود ودومانتش.. يعني أصغر من المسافة بين القاهرة والإسكندرية عبر الطريق الصحراوي.
اللي نعرفه من التاريخ إن العثمانيين لاحقًا.. هزموا المماليك واحتلوا مصر.. لكن الحقيقة إن مصر هزمت أجداد العثمانيين قبل كده بكثير.
ففي أول العام 1277 ميلادية.. كانت القوات المصرية بتطارد المغول في فلسطين بعد انتصار "عين جالوت".. تحت قيادة "الظاهر بيبرس"، بعد وفاة "ٍيف الدين قطز".. وبعدين بتحرر الشام منهم.. وبعدين بتحرر العراق.. وبعدين بتدخل وراهم الأناضول.. وبتدور بينهم "معركة البستان".
معركة البستان مكانتش بين المصريين والمغول فحسب. لأنه ضم على المغول ساعتها "سلاجقة الأناضول".
خمّن مين كان عامل سلاجقة الأناضول وقتها سنة 1277.. ومتجوز بنت السلجوقي "غياث الدين مسعود" زي ما قلنا قبل كده؟
برافو عليك.. أبو "عثمان".. "أرطغرل غازي".
وفي معركة "البستان" بينسحق عمال السلاجقة ورجال قبيلة قايي على يد القوات المصرية.. وبيهربوا وبيتهزم المغول هزيمة منكرة وبيستسلم حفيد "هولاكو" "بركة خان" ويعلن إسلامه مقابل أنه "بيبرس" يتركه حي. وبالفعل بيتم الصلح.
بانتصاره.. بيدخل الظاهر "بيبرس" أنطاكية.. وبيفتح مدينة "قيصرية Kayseri" التركية.. مقر وعاصمة السلاجقة.. وبيجلس على عرش السلطنة.. وبيتسابق أمراء وعمال السلاجقة في تقديم الولاء والطاعة لسلطان مصر.
خمن كمان مرة مين كان منهم راكع ذليل قدام "الظاهر بيبرس"؟ بالضبط.. برضه "أرطغرل" غازي.. الأتراك العثمانيين مش ناسيين دا تاريخيًا أبدًا.
للأسف "بيبرس" بيرجع مصر.. وكان عازم على الرجوع للأناضول لتثبيت حكمه.. لكن القدر لم يمهله.. فلقى ربه في شهر مايو من العام نفسه.. 1277 ميلادية.. وجلس ابنه "السعيد ناصر الدين محمد" على عرش مصر.
إحنا في لحظة التأسيس الأولى للدولة العثمانية.. و"عثمان" بيغزو "دومانيتش" أو "دومانيج" زي ما بيسموها.. عشان يضمها لسكود وتبقى دي إمارته ودولته الصغيرة.
وفي نفس الوقت، بيجدها "عثمان" فرصة ذهبية للتخلص من أخيه "سارو باطو صاووجي بك".. اللي بدأت العشائر تتفق عليه.. وتفكر في أنه يحل محل "عثمان" الفظ القاسي.. وبقى تهديد لعرشه وحكمه.
وفي خضم معركة "دومانيتش"، وأثناء صهيل الخيول وصليل السيوف والغبار.. بتنطلق فرقة خاصة، من رجال عثمان.. للفتك بـ""سارو باطو صاووجي".
وكانت مفاجأة حقيقية لـ"سارو باطو صاووجي".. اللي فوجيء برجال بتحارب في صفه جاية تقتله.. لكن حرس "سارو باطو صاووجي" انتبهوا للموقف بسرعة.. واشتبكوا مع رجال عثمان.
وبقينا أمام مشهد عجيب...
رجلين في جيش واحد.. فجأة في وسط معركة ضد عدو.. وقفوا وبيحاربوا بعضهما البعض!
وكان ""سارو باطو صاووجي بك" ماهر في استعمال السيف.. وأدرك "عثمان" أن النصر مش حيكون حليف رجاله.. وإن "سارو باطو صاووجي بك" لو نجا.. حيمزقه إربًا.. وكان "عثمان" ضعيف للغاية في المواجهة المباشرة وفاشل في استعمال السيف.. لكنه كان رامي شاطر.. ماهر جدًا بالقوس والسهم.. فانتزع قوسه وزوده بسهم من جعبته.. وأطلقه على قلب "سارو باطو صاووجي" فلقى مصرعه في الحال.
واستتب الأمر لعثمان في حكمه للقبيلة.
بس الموقف دا حضره شهود كتير.. وتناقلته الأفواه.. والكل عرف أن "عثمان" قتل أخوه.. بينما كان "عثمان" عايز يبين أنه مات في المعركة بالصدفة.. عشان كده المؤرخين سموا المعركة بـ"معركة التوأم". "عثمان" و"سارو".
وبعدين "عثمان" حب يمحو المأساة دي من الأذهان فخلا مؤرخيه كتبوا أنها اتسمت "معركة التوأم".. عشان دارت في قرية تركية اسمها "إيكيزجا İkizce" والكلمة دي بالتركية بتعني "التوأم".. الحقيقة "إيكيزجا İkizce" اسم علم.. ومالوش معنى.. ومش معناه "توأم" في التركية.
كان كل ما "عثمان" ينتصر في معركة ويحتل قرية أو بلدة.. يفرض على أهلها جزية كبيرة.. ويبعت معظمها للسلطان السلجوقي.. فكان الأخير يكافئه باراضي جديدة.. ويدعمه في مزيد من الغزو.. وهكذا.
انتصر عثمان في معركة "دومانيتش".. على الصعيد الشخصي والفعلي.. لكنه بيعجز عن التمدد.. لأن كان في خطر في الأنحاء.
مماليك مصر.. قوة لا يستهان بيها ومغول فارس اللي ضم عليهم فلول المغول المهزومين نفسهم.. بيعملوا لهم ألف حساب.
طيب يعمل ايه؟ اي أراضي حياخدها دلوقتي خيرها حيبقى له لوحده.. السلاجقة في انهيار خلاص.
مصر كانت بتحارب الصليبيين.. ومشغولة في صراعاتها معاهم.. لكن لازالت قوية.. وحتيجي الأناضول تديله بالجزمة لو فكر يتوسع.
لكن الفرصة بتيجي لـ"عثمان" على طبق من ذهب...
فبعد وفاة "الناصر سعيد".. بيجي "العادل بدر الدين سلامش" على عرش مصر.. وبعده بييجي "المنصور سيف الدين قلاوون" وبعدهم "الأشرف صلاح الدين خليل".. وبعدهم "محمد بن قلاوون".
وخلينا نقف لدقائق عند "الأشرف صلاح الدين".. لأنه ارتكب خطأ قاتل غير مقصود.. هو السبب في ضعف بالغ أصاب مصر في مرحلة معينة وخلاها تفقد سيطرتها على الأناضول.
في جندي فارسي مغولي.. كان أسره "بيبرس" أثناء حربه ضد المغول.. الجندي دا اشتراه "المنصور قلاوون".. ودي أول غلطة.. وبعدين لقاه بتاع مشاكل فألقاه في السجن.
لما جاء "الأشرف صلاح الدين خليل" أفرج عن الجندي دا.. ورجعه للحياة السياسية باعتباره ذو خبرة في التعامل مع المغول بني قومه.. وبدأ يكبر ويترقى ويبقى ذو نفوذ واصبح أمير.. ودا كان خطأ قاتل.
الراجل دا كان اسمه "كتبغا".. ودا غير "كتبغا" قائد المغول ومندوب "هولاكو" الشهير.
وفي العام 1293 ميلادية.. بيموت السلطان "الأشرف خليل".. فبينصبوا بداله أخوه الصغير "محمد بن قلاوون".. وكان عنده تسع سنين.. ولصغر سنه.. بينتهز "كتبغا" الفرصة.. ويخليه يوقع على مرسوم.. بتعيينه نائب السلطنة ومدبر الدولة.
ومع صغر "محمد بن قلاوون" أصبح "كتبغا" هو الحاكم الفعلي.
وبقى على عرش مصر سلطان جديد.
سلطان مغولي...
"العادل زين الدين كتبغا"....!!
اللي ماعرفش المغول يعملوه بالسيف والجيوش.. حصل بخطأ واحد من رجل واحد.. قرّب عدو، من سلطان مصر ومركز صنع القرار.
ولكن الموضوع دا ماعجبش الوزير "سنجر الشجاعى".. فبيبدأ يتفاوض مع "كتبغا" على أنه لا يجوز له أنه يحكم مصر.. وبيرفض "كتبغا".. فبيفكر "سنجر" في عزله بالقوة.
وهنا بيحشد له "كتبغا" الأكراد الشهرزورية ورفاقه من المغول المقيمين بالقاهرة.
وبيحشد "سنجر" له المماليك البرجية.
وبتنعطف مصر نحو منعطف مخيف.. بيضعفها جدًا.. وبيكون فرصة سانحة للوغد الأناضولي.. أنه يتوسع.. في ظل المنعطف الجديد ده.
منعطف الحرب الأهلية.
تحس إن التاريخ بالفعل بيكرر نفسه.
عدو للدولة في السجن.. يخرج من السجن لسبب ما.. ويدخل لعبة السياسة.. وبعد فترة يجلس على عرشها وهو ولائه مش لها أصلًا.. ويشرع في الدفع بها نحو الحرب الأهلية!!
بيفكرك بحاجة الموضوع ده؟
لاحظ كمان تاريخنا مع الأناضول.. عبارة عن سلسلة تتكرر طيلة الوقت.. واحد يطلع يفرد نفسه وينتهز فترات ضعفنا أو جلوس خائن على عرش مصر - يبلطج ما شاء الله له أن يفعل - مصر تنهض وتفوق وتقرر تضربه بالجزمة - ويوصل الجيش المصري لقلب الأناضول ويحاصر العاصمة - ونروح نجيبه من هناك ونقول له معلش عيل وغلط وحقك علينا...!
المهم أن مصر دخلت على يد "كتبغا" لمنعطف الحرب الأهلية.. ودا كفيل يضعف أي دولة.
والموضوع دا الحديث عنه يطول.. فنكمل كلام عنه لاحقًا.. ونشوف "عثمان" قاتل أخيه.. عمل ايه بعدها.
ويبقى للحديث.. بقية.
----------
منشورات سابقة
----------
1 - http://bit.ly/32Q5W4t
2 - http://bit.ly/2SJESze
3 - http://bit.ly/2YmsINT
4 - http://bit.ly/2KekUZo
5 - http://bit.ly/31c7XWU
6 - http://bit.ly/2Zv9iaL
7 - http://bit.ly/2GNIyee
الصورة لتمثال "سيف الدين قطز".
#الخلافة_العثمانية 8