آخر حاجة في موضوع الريجيم والرياضة..

بالمناسبة لو شفت حد نحيف و بياكل كتير و قال لك "باعمل ريجيم".. ماتسخرش منه.. الريجيم مش يعني "تخسيس".. كلمة "ريجيم Regime".. يعني "نظام".. أيا كان هو إيه..

نلخص كل ما سبق مع شوية ملاحظات جديدة أخيرة:

- أنت مش عايز تخسر "وزن".. أنت عايز تخسر "دهن".. إنسى الميزان وراقب جسمك و قياسات ملابسك..

- تابع مع طبيب أي تغيرات تقلقك تحصل في جلدك أو صحتك.. استشر الطبيب لو سنك معدي الأربعين وأول مرة تمارس رياضة.. استشر الطبيب لو بتاخد أي أدوية أو بتعاني من أي أمراض..

- إصابات الرياضة الخفيفة، زي الشد والإلتهابات والتمزقات البسيطة وغيره، ممكن تلجأ فيها للصيدلي.. مشكلتنا مع الصيدلي اللي بتخليه يدينا أدوية تضرنا، هي إننا بنعتقد إنه نوستراداموس.. أو منجّم بيفتح المندل.. فبتجيله طلبات من طراز "لو سمحت اديني حاجة للصداع".. و ترجع تشتكي إنه هيج لك قرحة معدتك..

الصيدلي مايعرفش تاريخك المرضي.. فلازم تشرح له "إديني حاجة للصداع يا دكتور بس خد بالك انا عندي قرحة/ سيولة/ مرض كلوي".. إديني دوا حساسية بس من فضلك يا دكتور أنا حسوق العربية دلوقتي.. مش عايز حاجة تنيمني.. إلخ.. كده يقدر يساعدك صح..

- ابعد عن الأقراص والحقن و الهرمونات اللي بيتعاطاها البعض عشان يبنوا أجسامهم بدون جهد.. إلا لو حابب تضحي بصحتك وحياتك.. أرنولد شوارتزينيجر لسه بيتعالج لحد النهاردة.. و في ناس بالفعل ماتت..

- نام كويس نوم متواصل عميق.. نام بدري و اصحى بدري..

- قلل التدخين و ابعد عن السيجارة الشرطية المرتبطة بشيء.. سيجارة القهوة.. سيجارة بعد الأكل.. الخ.. رئتيك بتخلصك من الدهون الزايدة.. لازم يكونوا شغالين بكفاءة..

- اعرف بتاكل ايه و كل بتوازن و اعتدال.. افتكر إن المغنسيوم مثلا مهم عشان تمتص الكالسيوم.. بس في نفس الوقت كتر الكالسيوم بيعطل المغنسيوم! بلاش الإفراط في شيء بعينه..

- ماتقعدش كتير ولو حتى بتمارس الرياضة بشكل منتظم.. الجلوس المستمر قاتل..

- لو متزوج شجع شريكتك على انها تمارس الرياضة معاك.. وإلا حتدخل في قصص وجودية من طراز "أنت ناوي تتجوز عليا.. الرياضة أهم مني.. وطبيخي المسبك بطل يعجبك".. و ينتهي بيكوا الأمر قاعدين سوا على كنبة تتفرجوا على مهند وهو بيجري ورا نور و بينكم حلة محشي و صينية كنافة وتتسد شرايينكم التاجية وتقابلوا وجه كريم بعد السهرة دي..

- الوقت مفاتش لممارسة الرياضة و الحمية الصحية حتى لو كنت عندك 90 سنة.. لكن تحت إشراف الطبيب..

- نصيحة للإخوة الأطباء و الصيادلة والمدربين.. أوعى تسخر من حد كبير في السن بيلعب رياضة ويمارس حمية.. و امتنع عن الدعابات على غرار "يا راجل يا عجوز" و الكلام دا.. وأوعى تحسس حد إنه بقي "كبير ومايقدرش"..

- شجع ابنك على الرياضة من صغره..

- افضل انواع الرياضة هي مزيج من الكارديو والأوزان والكاليسنتيكس.. حتى أبطال الكرة زي محمد صلاح بيروحوا صالة الحديد..

- في صالة الحديد اذا احترت في أمر ما.. استشر المدرب..

- تعالى على نفسك و كافح أول اسبوعين و اغصب علي نفسك ومارس الرياضة.. بعد كده حتدمنها بسبب هرمونات سعادة ومخدرات ربانية مخك بيدي أوامر لجسمك يفرزها..

- في نص ساعة يوميا تمارس فيهم الرياضة.. أنت مش مشغول أكتر من بوتين ورئيس وزراء اليابان.. الناس دي بتمارس رياضة و دا بيخلي ذهنها أصفى و قراراتها أفضل..

- احتفظ بصور لتطورك والإنجاز اللي حققته و كافئ نفسك..

- أعمل يوم مفتوح كل فيه ما تشاء بس ابعد عن السكر.. السكر عدو مدمر..

- الكحوليات فيها سكر و سعرات حرارية "خاوية" بدون اي فائدة..

- حاول تبدل مشروباتك المنبهة زي الشاي و القهوة بالقرفة والزنجبيل والعصير الطبيعي "اللي معصور في البيت" أو محل العصير.. مش المعلب الجاهز..

- اعمل قايمة موسيقية للتدريب و حط سماعات في ودنك و اسمع موسيقى.. قايمتي المفضلة هي موسيقى "بيل كونتي Bill Conti".. غير ونوّع عشان ماتزهقش..

- بدل تمارينك باستمرار و غيرها و طورها عشان جسمك مايتعودش عليها..

- شارك تجربتك و محاولاتك مع ناس بتعمل نفس الشيء.. و ابعد عن البهايم بتوع "بعدما شاب ودوه الكتاب" و "يا عم سيبك"..

- تقدر تمارس رياضة ولو كنت قعيد..

- اطلع السلم ماتركبش الأسانسير.. امشي المشاوير اللي ممكن تمشيها ماتركبش عربية.. اركب دراجة لو دا متاح.. اتحرك.. ربنا ماخلقش في جسمك أكتر من 350 مفصل عشان تقعد بيهم ع القهوة..

- جوعك الدائم ناتج عن مشكلة في الإنسولين في جسمك.. تقدر تحلها بالصيام.. بعد الصيام تاكل خضار و فاكهة و لحوم أو سمك أو دجاج بعيد عن المقليات و بعيد عن السكر..

- منطقة دهون البطن صعبة.. و بتتحرق ببطء و الجسم بيسيب بعضها للنهاية.. أوعي تتوقف و تيأس.. كمل..

- كمل و غير حياتك وانجح.. حتتنفس أفضل و تنام أفضل و مزاجك يتحسن وولادك يقلدوك.. حتشتغل أحسن وتبقى أهدا و أكثر راحة..

- في المراجع في البوستات السابقة.. في مراجعها في فيديوهات لتمارين تناسب كل الناس..

- اتفرج على الصور دي.. مفيش حجة..

ابدأ من النهاردة.. ماتستسلمش للمرض والكسل.. سيب دا للكسالى و المهملين.. انت لا..

انت تقدر..

-----------------

منشورات سابقة:

----------------

1 - https://bit.ly/2KbIV2G

2 - https://bit.ly/2BgpGT3

3 - https://bit.ly/2qSrcET

4 - https://bit.ly/2S5rwM4

5 - https://bit.ly/2zjyzd7