- ملحوظة أحب إنك تعرفها.. البدانة لها علاقة عكسية بالذكورة.. يعني كل ما دهونك زادت.. هرموناتك الذكورية بتقل.. الدهن يزيد "التوستيستيرون Testosterone" بيقل و العكس.. لما الهرمون دا يقل عندنا كرجالة رغبتنا وقدرتنا الجنسية بتقل.. بنكتئب.. بنحس بالخمول والإرهاق و فقدان الحافز.. بنعرق كتير ونفقد قوتنا العضلية.. تظهر لنا أثداء.. وبتحصل لنا مشاكل في الحرق وأورام وأمراض.. عشان كده بتلاقي شاب لسه صغير و بيكلمك عن "الفياجرا"..

- نفس الموضوع عند الستات.. البدانة عدو لدود لهرمون "البروجسترون progesterone".. حيجيلك صداع باستمرار.. بالذات الصداع النصفي.. قدرتك و رغبتك الجنسية تقل.. تصابي بالقلق و الاكتئاب و مودك يتغير بشكل مباغت عنيف طول الوقت.. شعر راسك يتساقط و شعر جسمك يزيد مع مشكل صحية أخرى..

- دلوقتي خلاص بطلت تخسّ.. جسمك اتوقف عن الحرق المرتفع اللي اتعودت عليه من شهرين تقريبا و كانت نتائجه سريعة مبهجة.. و بدأ يدافع عن نفسه ويتأقلم.. و يحرق لك سعرات حرارية أقل مقابل نفس المجهود..

- هنا لازم تغير استراتيجيتك اللي بتتبعها مع جسمك.. فظهر مبدأ مهم في عالم الحمية اسمه "اليوم الحر".. اللي هو اليوم الفري..

اليوم دا يوم كامل.. بتاكل فيه كما تشاء بدون ما تحسب سعرات.. وممكن تكسر حتى عدد سعراتك الحرارية المطلوبة، بشرط يفضل "الأكل نظيف".. ممكن تلخبط شوية.. تاكل محشي.. مكرونة.. شوكولاتاية.. بس ماتنزلش تشتري تورتة و لا صينية بسبوسة بالقشدة و تقول لي "اصله يوم فري"...!

اليوم دا يستحسن يكون "يوم راحة" من أي تدريب أو رياضة بتمارسها.. اللي حيحصل إن جسمك اليوم دا حيلاقي سعرات حرارية داخلة طول اليوم و هو مش مطالب يحرق زيادة..

يعني "الحظر انتهي".. تاني يوم لما بترجع للتدريب و الدايت، جسمك بيرجع يحرق أكتر..

- اليوم الفري لازم يتغير 3 أيام في كل اتجاه.. يعني الأسبوع دا هو الجمعة.. الأسبوع التالي هو الخميس.. بعد كده هو السبت.. بعد كده هو الأربعاء.. استراتيجية اليوم المفتوح حتخلي جسمك طول الوقت متصور إن الحظر انتهي..

في ناس بعد فترة معينة.. متوسطها 6 اسابيع.. جسمها بيتأقلم برضه على الموضوع ده.. و بيتخذ آلية دفاعية ضد الخدعة.. و بيبدأ يحرق أقل..

لازم هنا تهاجم مخزون الدهون اللي عندك بخطة جديدة.. من الأخطاء الشائعة اللي بنشوفها في صالات الحديد ومع الرياضيين.. هو شخص قاعد يمارس تمارين البطن ليل نهار عشان يحرق دهون بطنه.. أو سيدة بتجري علي المشاية بالساعات عشان دهون الأرداف..

حرق الدهون من "بقعة بعينها Spot reduction" أسطورة.. ومالهاش وجود و مابتحصلش.. عمرك شفت حد بدين و جسمه مليان دهون بس وسطه نحيف وعضلات بطنه ظاهرة عشان بيلعب تمارين البطن كتير؟

نوعك كذكر أو أنثى مع جيناتك بتحدد دهونك بتتخزن فين.. و جسمك بيختار يحرق من أنهي مخزون إمتي.. الشائع في الرجال إن الدهون بتتخزن في الكتفين و البطن والوجه والظهر.. و السيدات في الصدر والبطن والأرداف والوجه والفخذين..

الحرق لما بيتم.. الجسم بيختار حيحرق منين أولا.. المعتاد في الرجال مثلا إنه بيبدأ بالوجه.. و بعدين الكتفين.. و منطقة البطن بتبقى هي الأخيرة.. وفي السيدات بيبدأ بالصدر والوجه و الذراعين.. زي ما قلنا الموضوع بتتحكم فيه جيناتك.. و مش ثابت..

بس المقصود إنه مفيش تدريب للذراعين حيحرق دهون الذراعين!! الحرق بيكون في الجسم كله و الجسم نفسه بيختار يفتح أي مخازن و يحرق منها أولا..

هات شريحة لحم عادية من الجزار و اتفرج علي الدهن فيها.. الدهن دا مادة صلبة وخلايا.. و بيتفكك بعملية بيوكيميائية شديدة التعقيد..

مابيتفكش بالحرارة زي علبة الزبدة.. يعني موضوع "انا بتدرب و أنا لابس أكياس أو بدلة حرارية" دا أسطورة.. دا كل اللي حيعمله إنه حيزود خروج الماء من جسمك بالعرق و يجفف جسمك بسرعة..

بالعكس.. لما بتتمرن في جو بارد.. أو تتحدى البرد بملابس اقل.. جسمك بيحتاج يدفي نفسه.. بالتالي بيحرق وقود.. اللي هو الدهن..

عشان كده ممكن تلاقي إفريقي عند خط الاستواء في الحر بدين جدا.. بس شبه مستحيل إنك تلاقي إسكيمو عايش في الجليد طول عمره بدين كده..

- أول ما جسمك يبدأ يدافع عن نفسه ضد آلية اليوم المفتوح.. الفري.. بتتخذ استراتيجية جديدة اسمها "حمية أكثر تدريب أكثر أو Eat more, Excercise more - EMEM"..

هنا بدل ما تاخد 1600 سعر حراري و تحرق 500.. لا.. خد 1800 سعر حراري و احرق 700.. هي هي.. بس جسمك مع السعرات الزيادة اللي داخلة بيبدأ كذلك يحرق أكتر من جديد.. الاستراتيجية دي عمرها شهر.. بعدها الجسم حيحمي نفسه منها مرة أخرى..

ساعتها بتنفذ هجوم مضاد اسمه "أكل أقل، تدريب أقل ELEL".. بتاخد 1300 سعر و تحرق 200 مثلا..

الخطط دي بما فيها اليوم الفري لازم تتبدل و تتغير و تحل محل بعض طول الوقت.. ما تثبتش على واحدة منها.. و يبقى جسمك طول الوقت متصور إن الحظر انتهى.. أو الظروف الشاقة بتاعت التدريب اللي محتاجة حرق مستمر انتهت..

الجسم بالمناسبة زي ما بيتأقلم على الدايت بيتأقلم على التدريبات الشاقة برضه.. و بيقابلك رياضي يقولك "انا بشيل اوزان كبيرة و عضلات ذراعي بطلت تكبر.." دا جسمه اتأقلم خلاص و دي مشكلة حنتكلم عن حلها لاحقًا..

- الدهن عشان يتفكك محتاج ماء.. حيتحرق إزاي و هو في صورة صلبة؟ لازم تشرب على مدار اليوم 3 إلي 4 لترات ماء منهم نصف لتر بعدما تغسل أسنانك الصبح قبل أكل أو شرب أي شيء.. 3 - 4 لتر غير أي عصائر أو مشروبات أخرى.. دا كويس جدا لجسمك عامة و له أثر حيلاحظه السيدات بالذات.. حينتزع من آثار الزمن عليكي 10 سنين أو أكثر بعد شهرين إلى 3 شهور.. حتباني أصغر 10 سنين..

- طيب بخصوص الإنسولين اللي اتكلمنا عليه امبارح.. في ناس من فرط السكر و النشويات المصنعة اللي كانت باكلها طول الوقت.. حصل لها حاجة اسمها "مقاومة الإنسولين insulin resistance"..

مقاومة الإنسولين بتعني إن الخلايا من فرط الإنسولين بقت بتقاومه و مبتستخدموش الاستخدام الصحيح.. و بالتالي سكر الدم بيرتفع..

بالتالي "الخلايا بيتا Beta cells" في "البنكرياس Pancreas" بتفرز الإنسولين أكتر عشان تضبط سكر الدم.. و الإنسولين بيخزن السكر دا كدهون.. وبيبقى الإنسولين مرتفع طول الوقت وعشان يضبط مستوى السكر بالتالي الناس دي بتجوع طول الوقت و بتاكل كتير و دهونها تتراكم.. دايرة مفرغة جهنمية.. آخرها المرض وأحيانًا الوفاة..

إزاي نرجع مستويات الإنسولين تبقى طبيعية صحية؟

بالصيام.. الصيام لمدة 12 إلي 16 ساعة لفترة من 28 إلى 40 يوم.. تقضي لك على مقاومة الإنسولين تماما.. بالمناسبة الصيام دا هو صيام المسيحيين و المسلمين سواء.. المسيحيين في صيام معين بيمتنعوا عن الأكل 12 ساعة و بعدين ياكلوا "منتجات نباتية".. دا ممتاز عشان يضبط دورة الإنسولين.. بس هنا بيغلطوا غلطة فادحة.. فبيبدأوا ياكلوا "مقليات".. و دا بيقضي علي الفايدة اللي كانت حيحصلوها من الصيام..

المفروض الأكل النباتي وقتئذ يكون جبن نباتي.. ودا من غير لبن.. فواكه.. خضار طازج أخضر.. بطاطا/ بطاطس مشوية أو مسلوقة.. ممكن تدخل على الإنترنت و تجيب وصفات شهية للغاية لخضار مطبوخ بعيدًا عن المقليات.. انسى تراث "طبيخ المستشفي الميري" اللي بييجي في ذهنك لما تتذكر كلمة "خضار سوتيه" و "شوربة خضار".. في وصفات فعلا شهية..

تخيل لو صمت كده و أكلت كده لشهر إلي 40 يوم جسمك حيكون شكله ايه و صحتك ايه؟

نفس الغلطة اللي بنرتكبها كمسلمين.. بنصوم من 12 - 16 ساعة لمدة شهر.. فترة مثالية تظبط كل شيء.. بس بنفطر وكأنها آخر وجبة في حياتنا.. وبعدين صينية كنافة بالعسل و القشدة، وبعدين قطايف بالكريمة.. وبسبوسة بالمعرفش إيه.. ويللا نخرج.. جعت؟ نجيب "ماك" و "كنتكي".. و دي لوحدها سموم خالصة..

و ينتهي اليوم بإنك أكلت سموم غير صحية فيها سكريات كتير جدا.. و سعرات حرارية تكفي قبيلة رايحة تحارب.. وتخرج من الصيام نفسه عندك مقاومة إنسولين!

بالتالي الصيام هنا فقد هدفه المتعلق بتنظيم الإنسولين.. كان ممكن جدا تفطر شريحة لحم مشوي، أو دجاج، أو سمك، مع شوية خضروات.. و طبق سلاطة.. و بعدين تحلي بتفاح وبرقوق ورمان أو أي فواكه تحبها.. و تقضي شهر كامل كده.. أنهي صحي أكتر في رأيك؟

غلطة كمان للمسلمين في الصيام.. ماتقومش من النوم قبل الفجر تتسحر و تنام.. اسهر شوية و اتسحر و نام نوم متواصل عميق منتظم عشان تظبط هرمون الكورتيزول.. عشان تنام كويس لازم آخر مشروب منبه تشربه يكون قبل النوم بـ8 ساعات على الأقل..

غلطة بقى بيرتكبها المسلمين و المسيحيين سواء.. اللي يقول لك ينفع تصوم في حالة إيه ولو عندك مرض معين تقدر تصوم و للا لأ.. مش شيخ و لا قس.. الوحيد اللي يقدر يفتيك هنا هو الطبيب.. استشر الطبيب..

- طيب الريجيم ده بيجيب لي اكتئاب.. ايه الحل؟

قبل ما نختم بس نفتكر.. البدانة لها علاقة عكسية بالذكورة.. يعني كل ما دهونك زادت.. هرموناتك الذكورية بتقل كرجل.. و علاقتها عكسية بالأنوثة.. كل ما تزيد كل ما هرموناتك الأنثوية تقل..

موضوع الاكتئاب بقى و ازاي نمنعه مع الدايت نتكلم عنه لاحقًا.. و يبقى للحديث بقية..

------------------

منشورات سابقة:

------------------

1 - https://bit.ly/2KbIV2G

#gethealthy