والنهاردة مع الخاتمة.
انطلقنا لرحلة طويلة عبر العصور نشوف نظام "الخلافة".. وإيه هو.. تعريفه إيه وحصل فيه إيه.. وزي كل مرة وصلنا للنهاية.
والنهاردة عايز اسأل الشباب اللي بينضم للإخوان أو بيروح داعش أو بيدور على حلم الخلافة.. "يعني إيه خلافة بالضبط؟". أنت عاوز إيه؟
شفنا الصحابة واحد واحد.. و"أبو بكر الصديق" وإزاي اتقسمت "الأمراء منا والوزراء منكم".. وإزاي دخل الحروب اللي اتسمت بحروب الردة.. وكان بيحارب فيها ضد مسلمين موحدين.. بس "خرجوا على نظام الدولة".. زي ما انت بتعمل.
وشفنا "عمر" وهو بيقرب منه أهل الكفاءة.. وجريمة القتل اللي ارتكبها ابنه في لحظة غضب. وشفنا "عثمان بن عفان" بيستبدل العقوبة الشرعية هنا بالدية.. وعكس "عمر".. بيقرب منه أهل الثقة.. وشفنا شباب زيكم.. اللي بيحلموا بالخلافة.. بيخرجوا عليه للسببين دول.. ويقتلوه فوق مصحفه. وبعدين شفناهم بيخرجوا على "علي بن أبي طالب" رضي الله عنهم جميعًا.. وشفناه بيعمل ايه مع المعتصمين ضد نظام الدولة في "حروراء".. وبعدين شفناهم بيقتلوه مع عبارة "الحكم لله وليس لك يا علي".
وشفنا "الحسن" بن "علي" رضي الله عنهم.. بيحقن الدم ويسيب الخلافة في هدوء.. فبيغتيل بالسم. وشفنا "معاوية".. بيخرج بجيشه رافع عصا الشريعة.. وعايز ينفذ حكم الله في الدم وبيطالب بالقصاص.. وشفنا "عمار بن ياسر" بيموت على يد رجال "معاوية".. ثم بيتولى "معاوية" الخلافة.. فبيقفل الملف دا ويتجاهل الموضوع تمامًا عكس ما تقرر الشريعة.. وعكس ما هو ألزم نفسه. فبيخرج عليه برضه شباب زيكم يقولوا له "إن الحكم إلا لله".. فبيسلط عليهم قائده القوي "عمرو بن العاص".. يمزقهم إربًا.
وشفنا "الحسين" رضي الله عنه بيتدبح على يد "بن زياد" وبعدين بيتدبح "بن زياد" نفسه على يد "إبراهيم بن الأشتر النخعي".
وشفنا "عمر بن عبد العزيز" رضي الله عنه.. وهو بيعطل الجزية على مواطني الدولة.. وبيوقف الغزو والفتوحات اللي بتناموا تحلموا بيهم.. وبيتجه للزراعة والصيد والصناعة كمصدر دخل.. وشفناه بيتقتل تحت شعار "الحكم لله".. بينما الموضوع كان الكرسي مش أكتر.
يا ترى "أبو بكر" لما حارب مانعي الزكاة وهم مسلمين.. و"عمر" لما أضاف إلى مسائل الميراث "المسألة العمرية".. و"عثمان" لما استبدل القصاص بالدية.. و"علي" لما أرجأ القصاص.. و"عمر بن عبد العزيز" لما أوقف الغزو.. و"معاوية" لما خالف الكتاب وعطّل الشورى.. ولجأ للتوريث.. كانوا مابيفهموش في الشريعة.. وأنت بتفهم أكتر منهم؟
لو قلت آه مكانوش فاهمين.. يبقى بتهدم فكرة الخلافة من أساسها.. أممال أنت عايز تحكم زي مين وخلافة إيه اللي حترجعها؟ خلافة ناس مش فاهمة بتحكم غلط؟
ولو قلت لأ دول صحابة أكابر وكانوا فاهمين وكانت بس عصور فتنة.. يبقى بتعترف أن نموذج الحكم مش ثابت سياسيًا.. كل واحد يحكم حسبما يتراءى له. وحسب ظروف فترته.
هو ليه دا حصل.. وليه ربنا سمح به؟ عشان ربنا يفهمنا عدة أشياء.. أولًا.. أن محدش كبير على الفتنة والخطأ.. فدايمًا تحاسب وتتحرى الدقة وتحذر من أنك تقع في الفتنة.. بالذات فتنة الدم.
وثانيًا.. علشان ربنا يقولنا إن الحكم مش نظام ثابت ولا له طرق ثابتة.. ومينفعش تجيب نظام حكم من كام سنة فاتوا تطبقه النهاردة.. وأهو "ابو بكر" قسم السلطات "الأمراء من قريش والوزراء من المدينة".. و"عمر" اختار أهل الكفاءة.. و"عثمان" عكسه.. استبعدهم واختار أهل الثقة.. و"علي" مزج بين الإثنين.. و"معاوية" لغى الشورى وحط نظام التوريث.
فربنا أراد يقول لنا أن "مائدة السياسة" متنوعة مختلطة.. لك أنك تنتقي منها ما تشاء. ويورينا أن الوحيد.. اللي رفع شعار "إن الحكم إلا لله" بشكل جامد غير مرن.. كانوا خوارج قتلة.
دخلنا الفتنة الكبرى والله من وراء القصد.. وعرضناها بأسلوب محايد عادل مع تحري الدقة قدر الإمكان.. ومشينا منها لحد "أبو المسك كافور الإخشيدي" اللي معظمنا مكانش يسمع عنه وظلمه التاريخ.
وكانت الفتن دي رقيقة لطيفة مقارنة بما بعدها.. شفنا إزاي في البلاطين الأموي والعباسي.. السمّ كان عامل زي الكازوزة.. وكل شوية واحد يقتل أخوه ويغتال أبوه وتغتاله أمه. وبعدين ييجي القاتل فيحكم بنفس طريقة القتيل تحت شعار "الخلافة". لو حكينا كل قصة من دول بالتفصيل بمؤامراتها ودسائسها ومغامراتها.. كانت السلسلة دي بقت أكتر من 100 حلقة.. عشان كده آخر 3 حلقات كانت متسارعة تتلاحق لها الأنفاس.. وفي نفس الوقت بتفتح مجال للي يحب يتعمق ويبحث.
كمان ربنا أراد يورينا.. إن تكرار نفس الأمر بنفس المقدمات بيؤدي لنفس النتائج.. وشفنا الخليفة "الوليد بن يزيد"، بيسير في أروقة قصره المحاصر ذاهلًا مرتاعًا.. وبعدين يجلس أمام مصحفه ويقول لزوجته بنفسه في مرارة "يوم كيوم عثمان".. وبالفعل.. بينتهي اليوم بنفس النهاية الدامية.
يبدو لي إن الخلافة الحقيقية هي نفسها الخلافة اللي قصدها الله لما قرر يجعل في الأرض خليفة.. خلافة البناء.. التعمير.. القضاء على الفقر والمرض والعوز والجهل والجوع.. ومش الخلافة بمعنى نظام سياسي معين.. قدام عينينا أهه.. كل صحابي كان له نظام حكم مختلف.. وكل خليفة حكم بطريقة وشكل ولون.
موقفي من كل ما سبق أعلنته من قبل.. أنا لا أدين أحد.. ولا أي عهد من العهود دي.. دي ناس من القرن السادس واللي عملوه والأخطاء اللي وقعوا فيها وقع فيها العالم أجمع. ودا كان اسلوب العصر ولغة العصر حتى في أوروبا.. قتل.. دسائس.. سم.. غزو يعقبه فتح.. إلخ.. فماينفعش اقيس على طريقة حياتهم بطريقة حياتي في القرن الواحد والعشرين.. ولا العكس.. ماينفعش أجيب حياتهم من القرن السادس أطبقها على الناس النهاردة...
عدينا بعصور كتير.. وقامت دول وسقطت دول.. وقامت الخلافة الفاطمية.. وسقطت الخلافة الفاطمية.. وقامت الخلافة العباسية.. وسقطت الخلافة العباسية.. حتى الشرفية اللي عملها "الظاهر بيبرس" في القاهرة.
ولكن الدهر كان قدر أنه بعد ميلاد "الظاهر بيبرس" بسبع سنوات يتولد طفل في آسيا من قبائل مجهولة الأصل.. مغول على هنود على فرس على عرب على بربر.. والطفل دا في صغره بيتقتل أبوه في رحلة صيد غامضة مع عمه.. وبعدين ذات ليلة بيشاهد أمه بين أحضان عمه.. وبعدين بتحاول أمه تخبره أنه في الأصل مكانش ابن المرحوم.. وانه في الحقيقة ابن الراجل اللي بيعتقد أنه عمه.. فالولد بيجيله تخلف وبيصاب بهلع وعقدة نفسية ويهرب.. ويبدأ يكون عصابة صغيرة، للسرقات الخفيفة.. وبعدين بيكبر شوية ويكتشف أن القبائل اللي بيحيا وسطها ما بتتوقفش عن حاجتين.. الأكل والجنس.. فبيبدأ يتحرك كوسيط بين القبائل دي.. يجيب لهم بائعات الهوى والعاهرات مقابل سمسرة.. وبيحترف القوادة.. فبتدخل له دخل كبير ويبقى ثري.. وبيبدأ على أساس ثروته الكبيرة يكون عشيرة ويبقى له جنود وأتباع.
والطفل دا كان اسمه "أرطغرل".
"أرطغرل" اللي حينجب ولد اسمه "عثمان".. وحيكبر الولد دا ويقرر يغزو ما حوله تحت ستار الدين.. فحيعيد إحياء الخلافة من جديد.. وحتحمل اسم "الخلافة العثمانية".
وقصة "أرطغرل" وابنه والخلافة اللي عملها الحديث عنهم يطول وحيوصل بينا مرة أخرى إلى "محمد علي" باشا.. بس بتفاصيل أكبر .. فنرجئها لوقت لاحق مع سلسلة جديدة.
ويبقى للحديث وقتئذ بإذن الله.. بداية.
-------
المنشورات السابقة والمراجع أول تعليق
-------