مجموعة من الأصدقاء بعتت تسأل عن موضوع الحرب النفسية و الحيوانات، بعدما اتكلمنا عن القط "سايمون" و بلدياته "توجو" و الدب "فويتك" قبل كده.. الكلام دا موجود فعلا؟ و يا ترى في حد لسه بيستخدم الحيوانات في الحروب؟
قصة "فويتك" و "سايمون" و القط "توجو".. موجودين في اول و تاني مرجع للي يحب يقراهم..
الحيوانات اللي استخدمت في الحروب كتير جدا.. نفتكر منها قصة شهيرة للماعز الكندي "الرقيب بيل SGT. BILL" اللي احتفظ بيه الجنود كتميمة حظ، في الحرب العالمية الأولى.. و اصيب معاهم بجروح و عشرات الشظايا و فضل حي.. و فقد مرة.. و رجع القاعدة لوحده.. و دخل الحبس مرة بتهمة إتلاف معدات عسكرية.. لأنه التهم بنطلون قائد الوحدة...
"بيل" أنقذ مرة أرواح 4 جنود دفعة واحدة.. لما نطحهم فجأة بدون سبب و ألقاهم في خندق و قفز وراهم.. قبلما تنفجر قذيفة في المكان اللي كانوا فيه من ثواني.. و دا خلاه خد وسام "نجمة 1914 - 1914 Star" ووسام النصر.. و اتعمل له فيلم مخصوص اسمه "الرقيب بيل الذي لا يقهر The Invincible Sgt. Bill" يعرض مايو القادم..
أما البطة "سيواش Siwash" فدي كسبها جندي بحرية في لعبة بوكر في نيوزيلاندا.. و سافر بيها علي المركب المتجهة إلي "جزر مارشال Gilbert Islands" في بداية "معركة تاراوا Battle of Tarawa".. و قبيل الرسو كان الجنود محبطين للغاية و روحهم المعنوية منخفضة.. لكن "سيواش" نزلت معاهم و مجرد ما وصلت للشط.. دخلت فجأة في صراع عنيف مش مفهوم مع ديك ياباني.. و قتلته..
المعركة الصغيرة دي رفعت معنويات الجنود.. و اترفع بيها للقيادة تقرير رصين للغاية.. اتكرمت على إثره "سيواش" و اتعمل لها بيت مخصوص في حديقة الحيوان.. و اتقرر صرف حصة من البيرة لها طول حياتها.. نظراً لأنها كانت مدمنة بيرة.. لحد ما ماتت سنة 1954 بفشل كبدي بسبب الكحول...
أما الرقيب "ريكليس Reckless".. فدي كانت فرسة شابة.. باعها ولد كوري لقوات المارينز سنة 1952، عشان يجيب بثمنها طرف صناعي لأخته الصغيرة اللي فقدت ساقها بسبب لغم أرضي...
و في مارس 1953، خلال معركة "نقطة فيجاس Battle for Outpost Vegas".. "ريكليس" قامت بـ51 رحلة للجبهة، بإجمالي 90 كيلومتر تقريبا.. شالت خلالهم أكتر من 4 أطنان من الذخيرة للجنود بلا مرافق.. و بالرغم من إنها أصيبت و اتضربت بالرصاص.. بس فضلت تؤدي مهمتها..
بعد المعركة اتعمل احتفال لريكليس و جابوالها ورد و عملولها تورتة عيد ميلاد.. و احتفلت "ريكليس" و أكلت التورتة و.. و الورد...
"ريكليس" تقاعدت و ماتت في سلام سنة 1968 في معسكر من معسكرات الجيش...
و بينما الفيل الهندي " لين وانج Lin Wang".. حارب في صفوف اليابانيين و الصينيين معاً و كان بيبيع مجهوده لأي حد من الفريقين يلوح له بلبشة قصب، في "الحرب اليابانية الصينية الثانية Second Sino-Japanese War".. باعتباره لا صيني و لا ياباني.. فعلى العكس.. كان الكلب الوولف "نيمو Nemo A534".. اللي دافع بحياته عن شفرة الإتصال الأمريكية في فيتنام.. لما كان مع الجندي اللي بيعتني به، و كان جندي إشارة.. و حاصرهم مجموعة من الأعداء عشان يحصلوا على اللاسلكي.. وصديق "نيمو" اصيب و فقد الوعي.. و زميله هرب عشان يستدعي مساندة.. و نيمو وقف فوق جسد رفيقه يدافع عنه و عن اللاسلكي...
فقد نيمو عينه اليسري.. و اتكسر فخده و أصيب بعشرات الجروح بس فضل يدافع عن اللاسلكي لمدة ساعة تقريبا.. لحد ما وصلت النجدة..
لما وصلت النجدة اعتبرهم "نيمو" من الأعداء برضه... و رفض يسلمهم اللاسلكي أو يسمحلهم بالاقتراب.. لدرجة إنهم اضطروا يخدروه عشان يعالجوا صاحبه.. "نيمو" لما أحيل للتقاعد بدأ يكتئب و يمتنع عن الأكل.. فاضطروا يرجعوه للخدمة.. و كان مبسوط و استرد صحته.. وفضل يشتغل طول حياته...
و في عصرنا الحالي في "برنامج البحرية الأمريكية للثدييات البحرية United States Navy Marine Mammal Program".. اللي بدأ من الستينات.. و دا بيدرب الدرافيل و كلاب البحر عشان تبقى جنود مقاتلة أو قوات استطلاع بحرية.. بيستعملوها لمهاجمة الضفادع البشرية المعادية، لأن الدولفين ذكي مش بهيم زي القرش.. و فرصة إنك تنجو من قرش بيهاجمك أضعاف فرصة إنك تنجو من دولفين بيعمل الشيء ذاته...
بيستخدموها كمان لمراقبة الغواصات و مرافقة القوات الخاصة و الكشف عن الألغام و انقاذ الغواصين وغيرها.. روسيا عندها برنامج شبيه بالمناسبة اسمه "دلافين القرم Dolphins of Crimea"...
قصص الحيوانات اللي ساعدت الجيوش كتير.. معظم الحيوانات دي اتكرمت.. كرمتها بلادها و عملت لها تماثيل و منحتها نياشين.. بينما ماكرموش أي حد من جواسيسهم اللي خان بلاده من أجلهم.. بيعتبروه خائن و قبض الثمن.. و خلاص...
الموضوع بيخليك تتساءل عن موضوع ذكاء الحيوانات بشكل أكبر.. أو عن غباء بعض البشر اللي بيخونوا أوطانهم أو يسعوا إلي خرابها.. و تديهم مكانتهم الحقيقية.. كمخلوقات أدنى من الحيوان...
مش حتلاقي تمثال لـ"حسن البنا" و لا "أبو بكر البغدادي" و لا "أردوغان" في الولايات المتحدة.. بس حتلاقي كذا تمثال للكلب "نيمو"...
---------
مراجع
---------
1 - https://goo.gl/rx49IT
2 - https://goo.gl/kXxGl5
3 - https://goo.gl/QCiQ3W
4 - https://goo.gl/jPX2wn
5 - https://goo.gl/O0WLYQ
6 - https://goo.gl/7qpMm9
7 - Animals in War: Jilly Cooper: https://goo.gl/nPndvS
8 - https://goo.gl/nYuWsL