في سياق الحرب النفسية.. و عن إيه اللي يرفع معنويات الجنود.. و إيه اللي ينزل بيها للحضيض.. النهاردة عايزين نتكلم عن قط...

القط اللي في الصورة دا قط بلدي اسمه "سايمون Simon".. كان عنده سنة لما اتسلل في الميناء لفرقاطة عسكرية تابعة للبحرية الملكية اسمها "أميثس HMS Amethyst"..

لقاه بحار اسمه " جورج George Hickinbottom".. عنده 17 سنة.. أخد القط و لاحظ انه هزيل جدا و صحته مش كويسة.. و خباه عنده في الكابينة.. و بدأ يقسم معاه الأكل و يعتني بيه لحد ما استرد قوته...

بدأ خبر وجود سايمون علي الفرقاطة يتسرب.. ووصل الخبر للقبطان اللي طلب استدعاء جورج و معاه القط.. و لما وصل جورج لقمرة الربان الغاضب.. قفز فجأة من يد جورج و انقض علي كومة أوراق في الركن.. و انتزع منها فأر ضخم.. و قتله علي الفور...

ووقع القبطان في غرام سايمون.. و سمح له بالبقاء علي الفرقاطة...

و كان سايمون ودود جدا و لطيف.. و الطاقم كله حبه.. و كان مش سايب فأر واحد علي الفرقاطة.. الفئران اللي أرقت نوم البحارة و ضايقتهم شهور.. بقت نادرة للغاية.. و كان من المعتاد إنهم يقدموا من طعامهم لسايمون و يلعبوا معاه.. وكان في المقابل بيقتل الفئران و يجيبها لحد مقاعدهم أو يحطها أمام فراشهم كهدايا..

و اتعود البحارة مع الوقت علي وجود سايمون و اعتبروه تميمة حظ..

حتى لما أتغير ربان الفرقاطة و حل محله "الربان سكينر Lieutenant Commander Bernard Skinner".. وقع في هوى سايمون بمجرد ما شافه...

كان سكينر عنده مهمة انه يتحرك لمدينة صينية اسمها "نانجينج Nanjing" اثناء الحرب الأهلية الصينية.. عشان يبدل مع مركب الخدمة هناك.. و بدأ فعلا يتحرك.. و اثناء عبوره لنهر "يانتزي Yangtze River".. القوات الصينية فتحت عليه مدفعيتها...

كان سايمون في كابينة الربان.. لما انهالت القذائف و اصيب القبطان.. و اصابت سايمون رصاصة من مدفع رشاش و عشرت الشظايا.. و بينما القبطان مات متأثرا بجراحه.. زحف سايمون لحد ما وصل لجورج.. رفيق عمره القديم...

خده جورج للقسم الطبي.. و بدأوا ينظفوا جراحه.. بس الطبيب قال لجورج ان سايمون مش حايعيش لغاية شمس الغد...

و الغريب ان سايمون عاش...

عاش و كان راقد علي جانبه في العيادة بيلهث طول الوقت.. و جسمه ممزق تقريبا.. و كان جورج بيطعمه قطرات من اللبن أو الحساء عن طريق قماشة مبتلة بيعصرها في فمه...

كانت الفرقاطة اتحاصرت و رست في النهر.. مش عارفة تتقدم و لا تتراجع بسبب نيران القوات الصينية.. و بالرغم من إنها كانت مسلحة.. بس معنويات جنودها انخفضت للغاية خصوصا مع موت القبطان...

و كان جورج بيراعي سايمون اللي فضل عايش بمعجزة ما.. بالرغم من تأكيد الطبيب يوميا ان القط مش حيعيش...

و بدأت المفاوضات مع الصينيين.. مفاوضات شوية و تبادل اطلاق نار شوية.. و كانت التعليمات لدى ضابط السفينة اللي حل محل القبطان سكينر.. حسبما قالهاله علي فراش الموت.. هي ألا يستسلم طاقم الفرقاطة.. مهما كان الثمن...

حتى لو كان الثمن حياتهم نفسها...

و كانت الجثث ملأت السفينة.. و بدأت الفئران ترجع من جديد.. و رائحة الموت في كل مكان.. و اجتمع الربان مع البحارة اليائسين.. و كان بعضهم قد قرر الاستسلام فعلا.. و بعضهم بيعارض.. و حصل انشقاق مروع علي الفرقاطة...

و بينما كان الجميع بيتباحث.. فوجئوا بسايمون بيدخل المكان في هدوء.. و بيتأمل الموقف للحظات.. و بعدين بيطارد فأر عملاق.. قبل ما يمسكه و يقتله...

بمعجزة ما.. بشكل مش مفهوم.. القط شفى...

و هتف البحارة فجأة.. بعدما اخيرا لقوا حاجة تفرحهم و لو بسيطة.. وسط كل الرعب و القتل و اصوات الرصاص..

كان سايمون في الحظة دي مش مجرد قط.. بل إشارة لهم إنهم يقدروا يهزموا الموت و إن "أميثس HMS Amethyst" لم تسقط...

و مع ارتفاع معنويات البحارة.. عادوا لتبادل اطلاق النيران مع الصينيين.. و فضلت المعركة مشتعلة بين الطرفين.. و اطلاق النار لا يتوقف..

و ظل سايمون يقوم بدوره و يصطاد الفئران.. لحد فجر 31 يوليو 1949 لما لاحت في الأفق المدمرة البريطانية "كونكورد Concord".. اللي اطلقت قذائفها علي القوات الصينية.. و قدرت تنقذ الفرقاطة المحاصرة و ترافقها إلي الوطن...

بعد عودة الفرقاطة.. اصبح سايمون شخصية عامة.. و حصل علي العديد من الأوسمة و النياشين.. من بينها "صليب الملكة فيكتوريا Victoria Cross"..

اتعين ملازم مخصوص لخدمة سايمون و تلقي الأوسمة و النياشين على شرفه و الحفاظ عليها.. كان اسمه "ستيورات هت Stewart Hett" و كان لقبه العسكري "ضابط القط cat officer"..

مع العودة للوطن.. دخل سايمون الحجر الصحي زي باقي الحيوانات عشان يتم فحصه.. بس للأسف في الحجر الصحي أصيب بعدوى فيروسية.. و تفاقمت مع انهيار مناعته بسبب جراح المعركة..

و في 28 نوفمبر 1949 غمض سايمون عينيه للمرة الأخيرة.. و مات في الحجر الصحي في هدوء..

اتعمل لسايمون جنازة عسكرية حضرها كل طاقم الفرقاطة أميثس...

سنة 1950 أهدي الكاتب الإيطالي "بول جاليكو Paul Gallico" روايته "جيني Jennie" للقط سايمون...

الإبتسامة و التحية و التقدير والأشياء البسيطة جدا اللي بتبدو لك بلا قيمة.. بترفع معنويات الجنود و تدعمهم...

ما تبخلش علي جنودك بيها..

-------------

مراجع:

-------------

1 - http://www.purr-n-fur.org.uk/famous/simon.html

2 - http://goo.gl/u7LsVf

3 - Heroic Royal Navy ship's cat remembered in new book". Staffordshire Newsletter. 12 December 2014.

4 - https://books.google.ae/books?id=Y_pHGfV-xAwC&pg=PA173...