لسه مع القطة الغلبانة اللي محبوسة في الصندوق من سنة 1937.. اللي فاته المنشورات السابقة حيلاقيها في أول مرجع...
القطة "باست" ربة مصر القديمة اسمها "باست" مش "باستيت".. "باستيت" دا بيبقى اسمها لما تغضب و تتحول للبؤة.. لأن "رع" حبس في صدرها روح اللبؤة بنته "سخمت".. فبقى الاسم مزيج من "باست" و "سخمت".. و في نطقه آخر حرفين مبيتنطقوش.. "سايلنت silent".. فبيفضل اسمها "باست"...
كنا بنقول "باست" و هي قطة نونو كانت بتلعب في مركب الشمس و تتنطط على حجر ابوها "رع".. فوقعت في الميه.. نزل فورا "حكا" مساعد "رع" عشان ينقذها.. "حكا" دا كان هو السحر نفسه متجسد في هيئة بشرية.. بس باست من خوفها من الميه خربشته و طلعت عينه.. فابوها "رع" مد إيده و شالها "من قفاها".. و بالطريقة دي أنقذها و طلعها المركب تاني..
و من يومها و كل القطط بتشيل ولادها كده.. علشان دول المفروض أحفاد "باست".. العلم بيقول لنا النهاردة إنه في المنطقة دي عند القطط حزمة أعصاب لو مسكت القطة منها تتوقف عن الحركة و تستكين...
"باست" هي الربة الوحيدة جنب "رع" اللي "تحوت" سامح لها تدخل مكتبته اي وقت بدون إذن.. زي ما قلنا "تحوت" عقله كان فيه كل علوم و فنون و آداب و حكمة الكون.. و دوره إنه بيعلم الناس و يحافظ على التوازن.. لأن لو الكون بقى شر و قبح و جهل خالصين أو خير و علم و جمال مطلقين .. تعم الفوضي، و.. و ينهار...
القطط لما بتصاب او تبقي مبسوطة مطمئنة بتعمل صوت قرقرة.. اللي مسمعش الصوت دا قبل كده فهو موجود في ثاني مرجع.. الصوت دا ذبذبة طييعية من 25 إلي 150 هرتز.. بيشفي العظام المكسورة و يساعد على نمو نسيج العضم و التئام الجروح بسرعة.. و بيخفف التوتر ويحسن أداء الجهاز العصبي و يرفع من أداء الجهاز المناعي.. الذبذبة دي زي ما بتعالج القطة بتعالج كمان المخلوقات القريبة منها أو عايشة حواليها..
العلماء كمان اكتشفوا إن القرقرة دي بتحمي العضلات و تمنع فقد الكتلة العضلية.. يعني الجماعة الرياضيين اللي بيلعبوا رياضة لو عايشين مع قطة.. يخسروا دهون و عضلاتهم مايفقدوهاش.. في معلومات أكتر عن الموضوع دا في تالت مرجع..
نسيبنا من "باست" و تحوت".. و نروح نشوف قطة شرودنجر.. اللي قال لنا إنها "حية و ميتة في نفس الوقت".. و بعدين راح قايل لنا كمان "انها حية عندنا و ميتة في كون آخر موازي..
البروفسيور "شرودينجر" قال لنا: "أي شيء قابل للحدوث.. يحدث بالفعل..."
بيحدث فين؟ في عالم موازي.. دايما عند أي خيار بين احتمالين قابلين للحدوث.. الكون ساعتها بينقسم و يحصل كل خيار من دول في كون..
و لو الاحتمالات أكتر من 2؟ 3 مثلا..؟ ينقسم الكون لثلاث أكوان.. في كل كون حصل احتمال من الثلاثة..
و دا يدينا احتمالا مشوقة جدا.. و مفزعة في نفس الوقت.. للي ممكن يكون بيحصل في عوالم تانية أقل حظاً مننا...
مرة أول ما اتخرجت.. مكانش عندي غير بدلة واحدة.. و جالي مقابلة عمل "إنترفيو" في شركة أدوية.. فلبست البدلة دي.. و ركبت تاكسي.. و نزلت.. و ماشي أدور على المكان اللي فيه المقابلة..
و بعدين قلت - بذكاء - "الدنيا بتنقط وشكلها حاتمطر.. انا أمشي تحت البلكونات أفضل بدل المطر ما ينزل عليا"..
مشيت حوالي عشرين متر.. و باصص في الورق اللي معايا و ببص على أرقام العقارات.. لقيت نفسي فجأة خدت دوش ميه شبة مية المجاري كده.. ماعرفش جالي منين..
ببص فوق لقيت ست كبيرة في دور أول علوي بتقولي: "حقك عليا يابني أصل الدنيا بتنقط و انا قلت فرصة أغسل الشيش"....!
قلتلها: "حصل خير يا حاجة".. و رجعت أدراجي زي مانا.. لحد ماروحت.. و اتصلت بالناس بتوع الإنترفيو و قالولي: "لأ خلاص اخترنا مرشح غيرك"...
في 21 إبريل 2016 قريت خبر بالصدفة عن احتراق شركة الأدوية دي.. و اللي مات.. و اللي اتشوه.. و اللي اصيب...
دا بيحصل لنا كلنا..
بس في عالم موازي.. اتنفذ احتمال إن شركة الأدوية دي قررت تحددلي ميعاد جديد..
و اشتغلت فيها..
و بعد 16 سنة.. مت حرقاً في مقرها..
و في كون ثالث أصبت بس في الحريق..
و في كون رابع مرحتش الشغل اليوم دا..
دا كلام "شرودينجر" في شرحه لقصة القطة الحية و الميتة في وقت واحد...
و بعيد عن الحكايات الشخصية.. في العام 1939.. بدأ برنامج التسليح النووي النازي.. و سموه "نادي اليورانيوم Uranverein".. و ضم علماء اساميها ترهب أي متخصص في الموضوع.. زي البروفسير " إريك شومان Erich Schumann" و "هايزنبرج Werner Karl Heisenberg" اللي اتكلمنا عنه المرة اللي فاتت.. بتاع "مبدأ عدم اليقين"...
البرنامج دا اترشح فيه "البرت آينشتاين" لاحقاً.. و حبوا يستعينوا بيه.. بس الحزب النازي رفض لأنه تحرياتهم قررت إنه من أصول يهودية..
و هنا قدامنا احتمالين.. يقبلوا آينشتاين في نادي اليورانيوم أو يرفضوه..
و اترفض انضمام آينشتاين لنادي اليورانيوم...
هنا طبقا للنظرية اللي بنتكلم عنها.. نظرية "العوالم الموازية Many-worlds interpretation/ theory of the universal wavefunction".. حصل شيء غريب..
الكون في اللحظة دي انقسم لتوأمين.. في الكون التوأم دا.. النازيين وافقوا على انضمام آينشتاين للبرنامج...
و بدأ يحصل عكس كل اللي حصل في عالمنا و آلفناه.. و عرفناه...
المضايقات اللي اتعرض لها آينشتاين من النازيين محصلتش..
و مسافرش أمريكا.. و مقدملهاش معادلته الرهيبة "ط = ك.س² أو E=mc²" اللي ترتب عليها القنبلة الذرية..
و اتوصل الألمان للقنبلة النووية قبل الأمريكيين..
وفي الكون الموازي دا.. في 2 سبتمبر 1945، بدل ما يعلن انتصار الحلفاء.. كانت الطائرات الألمانية بتقصف "واشنطن" و "لندن" و "موسكو" بالقنابل الذرية.. و بتستثني باريس.. لأن مفيش حمار في الوجود بيرمي قنبلة ذرية علي دولة حدودية لازقة فيه...
و استسلم العالم للقوات النازية..
يا ترى العالم دا شكله ايه؟
ايه شكل العالم.. اللي عبد الناصر ماخسرش الحرب فيه في 1967.. و افنى إسرائيل و مبقاش لها وجود؟
كل الإحتمالات ممكنة.. و كل احتمال أو اكثر في كل كون جديد.. بيؤدي لانقسام الكون.. و يتكون كون موازي سابع و ثامن...
يعني كل شوية الكون بينقسم و انقساماته لا نهائية.. و عدد الأكوان الموازية لا نهائي...
يلف بينا الموضوع دا و يقول لنا "هاينزبرج" كلامه اللي قلناه المرة اللي فاتت "زي ما قلتلكم.. كل مرة بتتصرف فيها المادة كطاقة و الطاقة كمادة.. بيدينا احتمالات مختلفة.. و مفيش سبيل لإدارك الحقيقة المطلقة"...
النهاردة إحنا عارفين إن دي هي الطبيعة المزدوجة اللي بيتقال عليها "ازدواجية موجة/ جسيم Wave/particle duality"..
الجسيمات المادية.. زي الإليكترونات.. اللي بتتصرف أحيانا كطاقة.. و مرة تانية بتتصرف كمادة...
الطاقة اللي بتتصرف كمادة.. و مرة تانية بتتصرف كأمواج و حزم من الطاقة...
ممكن الطاقة تتصرف كمادة؟ أيوه ممكن.. الضوء دا مكون من فوتونات صغيرة جدا غير مادية معدومة الكتلة.. و مع ذلك الفوتونات دي أحيانا.. بتتصرف كمادة.. زي الفيديو اللي مع البوست دا ما بيوضح...
و لأنك مستحيل تحكم هو بيتصرف ازاي من غير ما تلاحظه.. فالدكتور شرودينجر قال لنا "انا ماقدرش أحكم بالثبات.. لأن الجسيم في حالة حركة.. طالما مش شايف.. يبقى هو الاتنين مع بعض"..
و كان فيه واحد قرفان جدا من موضوع قصة "قطة شرودنجر" دي و الأكوان اللي كل شوية تتقسم عشان المدام محتارة تطبخ النهاردة كوسة و للا بطاطس.. وقصص "الجسيم مرة بيتعامل كمادة و مرة كطاقة.. عشان مفيش سبيل لإدراك الحقيقة"..
ومكانش عاجبه الكلام.. و دخل في مناظرات كتير بسببه لحد وفاته..
الراجل دا كان بعبع و صداع للفيزيائيين من يوم ما ظهر و لحد النهاردة بعدما مات بأكتر من نص قرن...
الراجل دا كان اسمه ألبرت..
ألبرت آينشتاين...
و دا يخلي للموضوع بقية...
------------
مراجع
-----------
1 - منشورات سابقة:
-https://goo.gl/2GfWC2
- https://goo.gl/8QyXaq
- https://goo.gl/qAedCr
2 - https://goo.gl/pGR7UU
3 - https://goo.gl/NG6Ceh
4 - Bryce Seligman DeWitt, Quantum Mechanics and Reality: Could the solution to the dilemma of indeterminism be a universe in which all possible outcomes of an experiment actually occur?, Physics Today, 23(9) pp 30–40 (September 1970) "every quantum transition taking place on every star, in every galaxy, in every remote corner of the universe is splitting our local world on earth into myriads of copies of itself." ...
5 - Physics Today,, 24(4), (April 1971), pp 38–44...
6 - http://stefano.osnaghi.free.fr/Everett.pdf : Studies in History and Philosophy of Modern Physics. 40: 97–123....
7 - Bohr, N. (1927/1928). The quantum postulate and the recent development of atomic theory, Nature Supplement April 14 1928, 121: 580–590...
8 - Preparata, G. (2002). An Introduction to a Realistic Quantum Physics...
9 - Afshar S.S. et al: Paradox in Wave Particle Duality. Found. Phys. 37, 295 (2007) ...
10 - "Observing the quantum behavior of light in an undergraduate laboratory". American Journal of Physics. 72: 110....
#كوانتم#Quantum