"مسز فليتشر Jessica Beatrice Fletcher" في حقيقتها مزيج من عدة محققين خياليين.. فهي "مس ماربل".. بس امريكية.. و نشطة متحركة كثيرة الاسفار زي "بوارو".. منطقية زي "هولمز".. و حياتها طبيعية زي الفرنسي "ميجريه Commissaire Jules Maigret" اللي في الصورة مع الغليون...
"ميجريه" بيتربع على القمة من حيث أعداد القصص اللي ظهر فيها مقارنة بأي محقق أو مخبر على الإطلاق، حوالي 76 قصة و 28 قصة قصيرة.. "ميجريه" حل ألغاز جرايمهم كلهم.. "ميجريه" مكانش له صفات خاصة و من أكثر المحققين واقعية في عالم الأدب..
المفتش "ميجريه" كان رجل شرطة فرنسي عادي.. مجتهد و بيشتغل مع فريقه.. نجاحه بيعتمد على البحث الدؤوب و الشغل الروتيني المعتاد لرجل الشرطة و روح الفريق.. بدون ذكاء شخصي خارق..
"جيسيكا فلتشر".. اللي ظهرت في سلسلة "جريمة قتل كتبتها Murder, She Wrote" إختلفت عن "ميجريه" في إنها كانت مدرسة لغة إنجليزية و عضوة كونجرس و كاتبة ثرية.. و لها علاقات و دا فتح لها آفاق لمغامرات لم تتح لـ"ميجريه"...
بتسافر كتير جدا و تتفسح و ثروتها بتذلل لها العقبات.. و كانت بتحل جرائم في أسفارها.. بالإضافة إلي إنها لها أخ "مشير Marshall" مرة واحدة.. و أخ تاني طبيب شرعي.. فكان الأول بيذلل لها العقبات اللي تقف في طريقها إجرائيا.. و يدفع رجال البحث الجنائي يستعينوا بيها.. و الثاني بيمدها بما خفى عليها من علوم الطب الشرعي...
"فليتشر" عايشة في مدينة خيالية زي "مس ماربل".. "اسمها Cabot Cove".. و الحمدلله كل جيرانها الغلسين اللزجين بيتقتلوا.. و هي بتحقق في الجرايم دي...
أسفارها الكتير بتخلي مغامراتها تتمدد.. لدرجة إنها في قصة بتلتقي بمحقق آخر لمؤلف آخر.. المحقق "توماس ماجنوم Thomas Magnum"..
و "ماجنوم" كان ضابط بحري.. بعدما ترك البحرية.. قرر يبقي محقق خاص . و محدش اتصل بيه و لا جاله شغل.. فلقى نفسه مفلس تقريبا.. و كان ممكن ينتهي به الأمر كمتسول.. خصوصا إنه عابث سكير من أرباب الحياة الماجنة.. لولا صداقته بالفنان الأديب "روبين ماسترز Robin Masters".. اللي بيديله وظيفة عنده في هاواي.. بمرتب معقول.. و يسمح له يستخدم بيته الفاضي علي الشاطيء و يقود سيارته الفيراري الحمراء.. و بدأت الأوساط الراقية تنتبه له كمخبر سري حقيقي.. مفيش اي شخصية لأي محقق عاشت حياة رفاهية و هلس زي اللي عاشها "ماجنوم"...
قصص "ماجنوم" بتميل أكثر للأكشن و الحركة.. عن التفكير المنطقي الذكي زي "هولمز" و "بوارو" و "ماربل" و "فلتشر"...
"ماجنوم" كان له صديق هو الملازم "يوشي تاناكا Lt. Yoshi Tanaka".. شخصية ثانوية مساندة.. الشخصية دي كانت كارثة و حلت على دماغ "ماجنوم".. لأن كان فيها كتير جدا من "كولومبو".. بمعطفه و خفه ظله و طريقته.. و بالتالي شدت انتباه الناس أكتر من "ماجنوم" نفسه..
دا دفع المؤلف إنه يكتب قصة مخصوص من قصص "ماجنوم".. بيستفرد فيها قاتل بالملازم "يوشي".. و يقتله...
"فلتشر" بتعتمد علي ذكائها و علي الإيحاء للقاتل إنه انتصر و إن الخطوات اللي هي بتتخذها بغباء مصطنع.. في صالح اخفاء جريمته و دا أحيان كتير بيخلي القاتل يساعدها...
بحكم تأثر الشخصية بعالم "أجاثا كريستي".. فهي بتتعرض كتير للسموم في أعمالها.. زي قصة "ليلة العنكبوت Night of the Tarantula".. اللي القاتل بيحاول يقنع فيه الجميع إن القتل بيتم عن طريق السحر الاسود و "دمى الفودو Voodoo dolls"...
"فلتشر" كانت سبب من أسباب شهرة "أنجيلا لانسبري Angela Lansbury" اللي في الصورة دي.. اشهر من جسدت الدور..
تقدر تدور على حلقات "فلتشر" علي يوتيوب بكلمة بحث "Murder, she wrote".. "أمريكا أونلاين AOL".. اختارت مسز "فلتشر" في 2011 كواحدة من "أكثر الشخصيات النسائية التليفزيونية شهرة 100 Most Memorable Female TV Characters"..
المرة الجاية بقي نتكلم عن الطبيب العجوز الوحيد.. النحيل العصبي الذي يدخن بشراهة.. و يبحث في الألغاز والجرائم و الأحداث الغامضة المرتبطة بالباراسيكولوجي و ما وراء الطبيعة.. "د. ميسر علي Misir Ali"...
د. "ميسر علي" شخصية من الأدب البنغالي.. و مش معروف مطلقا لقاريء العربية.. و انا مابعتبروش محقق اصلا.. بس "رابطة الأدباء الأمريكية The American Literature Association" اعتبرته كذلك.. فمفيش مانع نفسح له مجال وسط آخرين.. و يكون لنا لقاء معاه فيما بعد.. و يبقى للحديث ختام...
------
المنشورات السابقة
------
1 - https://goo.gl/KeQqsN
2 - https://goo.gl/hnar7K
3 - https://goo.gl/fasDn1
4 - https://goo.gl/WYXj1r