من مميزات أجاثا كريستي إنها كانت متجددة متنوعة في أدبها، يعني الأمر ماقتصرش علي "بوارو".. كشخصية وحيدة.. زي "دويل" و"هولمز".. ماقتصرش الأمر حتى علي أدب الجريمة.. لأ.. كتبت ست قصص رومانسية باسم مستعار.. هو "ماري ويستماكوت Mary Westmacott"...
كانت - بحكم عملها في المستشفي في لندن إبان الحرب - بتكتب علم حقيقي في الإصابات و في السموم بالذات.. وكانت بتستشير الخبراء.. لدرجة إن الصيدلي النابه بالمستشفي.. السيد " هارولد دايفز Harold Davis" هو اللي اقترح عليها تستخدم التسمم بـ"الثاليوم Thallium" في قصة "الجواد الشاحب The Pale Horse" .. وكان وصفها لأعراض التسمم دقيقة للغاية.. من فقدان شعر وغيره...
يبدو إن كل اللي بتلمسه أجاثا أو تقترب منه كان بيتحول لذهب.. لأن "هارولد" فيما بعد بيبقي كبير الصيادلة بوزارة الصحة بالمملكة المتحدة.. زوجها الجديد عالم الآثار - بسبب شهرتها - بتهتم الحكومة بأعماله وبمتنحه المملكة رتبة "فارس Knight".. صديقتها "دوروثي سايرز Dorothy L. Sayers" بتتحول لكاتبة شهيرة.. ومحرر صغير في التليجراف بيتحول لصحفي شهير مرموق لأنه عمل معاها لقاء صحفي...
كان في مضايقات في مسيرتها لكن بسيطة.. مرة مثلا استدعتها "المخابرات البريطانية the British intelligence agency" وحققت معاها تحقيق مطول.. بعدما ظهرت في قصتها "إن أو إم؟ - ?N or M" شخصية جديدة...
شخصية اسمها "ميجور بليشلي Major Bletchley".. وكانت بريطانيا عندها منشأة سرية استخبارية لاعتراض وفك الشفرة اسمها "بليشلي بارك Bletchley Park".. اللي كتبته "أجاثا" عن الميجور جعل المخابرات البريطانية تعتقد إن لها جاسوس في "بليشلي بارك".. لكن طلعت بريئة.. وأحداث وشخصيات القصة مجرد صدفة...
من الشخصيات اللي ابتكرتها "أجاثا".. كانت "الآنسة ماربل Miss Marple"...
"الآنسة ماربل" العانس اللطيفة اللي لابسة طاقية في الصورة جنب "أجاثا كريستي".. بالمناسبة "عانس" مش شتيمة زي ما بينتشر على السوشيال ميديا ومش بتتقال على المرأة بس..
كلمة "عانس Spinster" بتتقال على الرجل والست سواء.. يعني شخص تجاوز سن الزواج المعتاد المتعارف عليه في محيطه.. بس بشكل ما بقينا مصرين نلحقها بالمرأة بس...
المهم إن "الآنسة ماربل" مكانتش باللطف دا طول عمرها.. كانت ست حشرية فضولية جدا.. وعجوز متشككة مزعجة وبترغي كتير و غاوية شائعات وقيل وقال.. بتكره الناس ومتوقعة دايما منهم الشر.. بس قصة ورا قصة.. الشخصية اتغيرت وبقت هادئة لطيفة بيحبها كل جيرانها في قريتها "ساينت ماري ميد St. Mary Mead"
"مس ماربل" كانت بدايتها بسبب قصة "مقتل روجر أكرويد The Murder of Roger Ackroyd" .. لما "مايكل نورتون" عمل للقصة "تهيئة adaptation" للمسرح.. وكان فيها شخصية لعانس عجوز اسمها "كارولين شيبرد Caroline Sheppard".. بس "نورتون" حذفها باعتبار "العواجيز راحت عليهم ومبيثيروش اهتمام حد"... وحط بدالها بنت صغيرة..
الموقف دا غاظ "أجاثا كريستي" جدا.. وقررت تعمل شخصية تمنح بيها كبار السن فرصتهم و تثبت انهم قادرين على العطاء.. فبدأت ترسم خيوط شخصية "الآنسة ماربل".. وانتقمت "أجاثا" من "نورتون" بأنها خلته القاتل المجنون في قصتها "ستار Curtain".. وقتلته...!
"الآنسة ماربل" مزيج من عدة شخصيات.. بس في حقيقتها.. هي قريبة جدا من عمة أجاثا كريستي الحقيقية.. مس "مارجريت ويست Margaret West"...
"الأنسة ماربل".. ذكائها حاد للغاية.. ولها ذاكرة حديدة مش موجودة عند بشري في التاريخ.. خبيثة شوية وبتتظاهر بالغباء دايما ودا بيدفع الناس إنها تقدرها أقل من قدرها.. وتثق فيها...
"الآنسة ماربل" كمان لها قلب كبير طيب بس فولاذي.. يعني ممكن تشوف جثة مذبوحة من غير ما يطرف لها جفن.. "ماربل" بتزور مسرح الجريمة أحيانا.. قليل مش كتير.. وسكوتلانديارد بتستعين بيها بشكل غير رسمي لذكائها الخارق..
الممنوع إنها تعمله زي دخول مكان معين متعلق بجريمة.. أو اللي يستعصى عليها.. كانت بتستعين عليه بصديقها الشرطي المتقاعد "سير هنري Sir Henry Clithering"....
"الآنسة ماربل" بتحل الجرائم بأسلوب مبتكر للغاية.. بتسمع وتلاحظ.. وتستمع للمحققين وهي علي مقعدها الوثير بتغزل التريكو أو تشرب الشاي.. لحد ما تسمع كلمة أو تشوف حركة معينة أو تفتكر موقف معين.. هو مفتاح اللغز.. وبعدين تقول لهم في هدوء:
- "لقد حدثت جريمة كهذه ذات مرة في ساينت ماري ميد"...
عموما قصص "ماربل" بتفترض إن أي جريمة في الكون.. حصل زيها في "ساينت ماري ميد".. القرية الخيالية اللي ابتكرتها "أجاثا" وعايشة فيها "الآنسة ماربل"...
بتقول "الآنسة ماربل" جملتها دي و تبدأ تسرد القصة.. من غير أسماء.. بس بصفات "ابن العم".. "الأخت".. "الخادم".. وتربط الجريمتين وبعدين تتوصل للمجرم الحقيقي..
"أجاثا" هنا خلت "ماربل" معتمدة علي ذاكرتها في تذكر الجرائم الشبيهة.. وعلى اللي شافته خلال حياتها في "ساينت ماري ميد" من الجانب المظلم للنفس البشرية..
أي جريمة في الوجود حصل جريمة موازية ليها في "ساينت ماري ميد".. يعني لو قلت لماربل إن في واحد في "السنبلاوين" لقوه غرقان في الترعة.. حاتقولك "لقد حدثت جريمة كهذه ذات مرة في ساينت ميري ميد"...
دا كان ممكن يحول القصص اللي فيها "مس ماربل" لقصص مملة جدا.. لولا إن ربطها للأحداث وتتبعها للمواقف وامساكها بالعنصر المشترك بين الجريمتين.. كان دايما بيبقي في قالب مشوق للغاية.. بالتالي عمرك ما تزهق من "الآنسة ماربل"...
"للآنسة ماربل" جملة أخرى شهيرة بتكررها أكتر من مرة.. ويبدو إنها برضه موجهة من "أجاثا كريستي" إلي "نورتون":
- "الشباب يظنون أن العجائز حمقى، لكن العجائز يعرفون يقيناً أن الشباب حمقى"...
"مس ماربل" كان عمرها 74 سنة.. حسب ما بنفهم من سياق القصص، ففي قصة "فندق بريترام Bertram's Hotel" بتقول إنها مجتش المكان دا من 60 سنة.. لما كانت بنت عمرها 14 سنة.. عمر أبطال قصص أجاثا كريستي كان عامل لها مشكلة دايما.. لأنها كانت بتتمنى أحيانا لو انهم أصغر بخمس أو ست سنين.. عشان يقدروا يتحركوا بشكل أيسر.. وأعلنت مرة إنها ندمت عشان مخلتش "بوارو" يبدأ في الظهور و هو أصغر من كده...
حظ "الآنسة ماربل" مكانش حلو مع السينما والتليفزيون.. الأعمال اللي اتعملت كانت بسيطة و قليلة.... بينما بوارو خد منها نصيب الأسد...
القصة الأخيرة للـ "الآنسة ماربل" كتبتها أجاثا كريستي وحفظتها مع وصية في قبو بنك في لندن، علي أن تنشر بعد وفاتها.. واسمها "الجريمة النائمة Sleeping Murder"..
المرة دي مش حنحكي "الجريمة النائمة".. عشان نتشجع وندور عليها و نقراها.. بس القصة بتتعلق بـ"جويندا Gwenda".. إللي بتنتقل لبيت قديم اول مرة تروحه بيطل على البحر.. وبتبدأ تهيئه لمعيشتها.. وبدأت تعمل في البيت مع العمال وفي مخيلتها الدهان و الإصلاحات و نقش لـ"ورق حائط" معين بتتمنى تركبه..
وأثناء العمل.. العمال بيفتحوا باب مغلق منسي للمرة الأولى.. ومذهولة.. بتشوف "جويندا" فيه نفس ورق الحائط اللي كانت بتتخيله بالضبط...
بيسوء الأمر لما "جويندا" بتهاجمها رؤى مش مفهومة وذكريات مروعة.. و بدأت تشوف لمحات من ماضي غريب.. ممتزج برعب غامض، كل ما تحاول تنزل للطابق الأرضي من البيت...
حياة "جويندا" بتتحول لجحيم من الرعب والفزع و الأرق.. وبتستعين "بالآنسة ماربل".. وبتطلب منها المساعدة.. وبتحكي لها كل مخاوفها.. بما فيها رؤى عن لغز جريمة قتل رهيبة حدثت في الماضي البعيد...
بنتنتهي مسيرة الآنسة ماربل بـ"الجريمة النائمة".. وبتنتهي قصص "أجاثا كريستي" نفسها.. بعدما قدمت لنا عشرات المغامرات لـ"بوارو" و "مس ماربل" وشخصيات أخرى زي "السيد هارلي كوين Mr. Harley Quin".. أكثر محققيها ضبابية وغموض و اللي محدش يعرف عنه كتير سوى إنه بيحل الجرائم بالغريزة و"الحدس".. و ظهر في مجموعة "السيد كوين الغامض The Mysterious Mr Quin".. و"أدريان أوليفر Ariadne Oliver" و"باركر بين Parker Pyne" و غيرهم.. و إن كانوا ماحصلوش علي شهرة زي "بوارو" أو اللطيفة الطيبة "الآنسة ماربل"...
وفي 12 يناير من العام 1976.. بتموت "أجاثا كريستي" في هدوء في بيتها في "وينتربروك Winterbrook".. وبيتختم بيتها بالشمع الأزرق بأمر من حكومة بريطانيا.. باعتباره من التراث الإنجليزي، لا يجوز هدمه أو تشويهه.. وبتظل تحمل لحد يومنا دا لقب أطلقه عليها محبيها حول العالم..
لقب "ملكة الجريمة".. أو "ملكة أدب الجريمة The queen of crime"....
طبعاً بعدما عرفنا كل دا عن "أوجوست ديووبا " و"هولمز" و"بوارو" و "ماربل".. ماينفعش ما نعديش على المخبر الأشهر.. الظريف المهمل الغير مهندم منكوش الشعر.. اللي لو شفته تحسبه متسول بلا مأوى.. بمعطفه الشهير اللي ناقص زرار ومشافش المكواه في حياته، وسيجاره المشتعل، وعربيته المعفنة...
"كولومبو".. اللي الحديث عنه يطول.. ويبقى إن شاء الله لحديثنا بقية...
----------
(المراجع أول تعليق)
----------