شفنا إزاي إن مفيش حاجة اسمها "قرد أتطور لإنسان" .. و إن كل سلالة ليها أجدادها المستقلة في شجرة التطور.. و أحيانا سلالتين أو أكتر بيشتركوا في جد مشترك..
و شفنا إن مفيش حاجة اسمها "البقاء للأقوى".. البقاء "للأصلح".. يعني للأقدر على التكاثر...
و شفنا إزاي الجماعة الماديين قالوالنا "كتاب داروين أثبت عدم وجود خالق و مفيهوش حرف واحد غلط"..و المتدينين قالولنا "الكتاب كله غلط و كلام فارغ.. و في خالق و مفيش تطور".. و إزاي الفريقين خبطوا في بعض..
الماديين قالوا لـ"داروين": "أنت ملحد.. برافو عليك.." والمتدينين قالوا له "أنت ملحد.. حاتروح النار و تحل عليك اللعنة"..
و "داروين" الحقيقي.. تاه بينهم في النص...
بس "داروين" كان محضر للفريقين مفاجأة في كتابه "حول أصل الأنواع".. لما اتضح انه ختم الكتاب بفقرة في آخر صفحة بتقول:
"هناك عظمة في رؤية الحياة.. بكل قواها المتعددة، والتي نفخها الخالق في الأصل.. في شكل أو عدة أشكال"
"There is grandeur in this view of life, with its several powers, having been originally breathed by the Creator into a few forms or into one"..
يعني داروين كان مؤمن بوجود خالق بينفخ الروح و يبث الحياة.. و مؤمن بالتطور في نفس الوقت؟
خرج علينا الجماعة التطوريين و على رأسهم في عصرنا الحالي الدكتور "دوكينز".. و قالوا لنا
"لأ.. هو مراته بس كانت متدينة شوية.. فكتب السطر دا عشان ماتقولوش حاجة"..
يعني باختصار بيقولوا لنا إن داروين قعد يكتب كتاب لمدة 20 سنة.. ينفي وجود الإله.. و بعدين هدمه بآخر فقرة عشان خاف من "المدام"..
بعد شوية هم نفسهم لقوا كلامهم عبيط.. فرجعوا قالوا "لأ هو عمل ده عشان يتقي شر الكنيسة"..
مع إن "داروين" ما أبرزش الفقرة دي للي كفروه من رجال الكنيسة و لا حاول يتناقش معاهم من الأصل.. كان كل هدفه هو و مجموعة من اللي فهموا نظريته إنهم ينقذوا الناس و العلماء من فخ الصراع الديني - اللاديني اللي حاصل.. و يوجههوهم لأن دي نظرية علمية.. مش نظرية لإثبات وجود الله أو نفيه...
يعني في الواقع "داروين" سجل أسس التطور و بحثها 20 سنة.. و فضل مؤمن..
و في نفس اللحظة في علماء رياضيات زي ما شفنا قالوالنا "فرضية إن خلية واحدة تتكون بالصدفة.. دي علمياً فرضية مستحيلة"..
يعني علماء الرياضيات دول عرفوا إن الحياة لم تنشأ صدفة.. و مع ذلك أنكر كتير منهم وجود الإله...
و أراهنك إن كتير من رافضي نظرية التطور علشان معتقدين إن داروين كان ملحد.. مش حيقبلوها برضه.. بعدما عرفوا إنه كان يؤمن بوجود إله...
إذن المسألة مش حكاية تطور.. و لا داروين.. و لا العلم أثبت و لا العلم نفى.. موضوع الإيمان من عدمه.. موضوع داخلي و مالوش علاقة بالنظريات العلمية اللي بيتمحك فيها المتدينين و الملحدين..
المثير للغيظ إن بعد وفاة "داروين".. طبعات كتابه الجديدة بدأت تتحذف منها كلمة "الخالق".. مش عارف دا عناد و للا إيه بالضبط و ايه فايدته.. بس بقت الجملة "الحياة التي تم نفخها"..
دا شيء أنا مش فاهمه إطلاقاً.. تؤمن و للا تنكر.. أنت حر.. إيه الفكرة إنك تزيف في تاريخ عشان تثبت إنك صح؟ و تثبت لمين؟؟
و للدرجة دي قضيتك مهتزة.. سواء إيمان أو إلحاد.. و محتاج تثبتها طول الوقت و تأكد على صحتها؟
مقبول عند المتدين إنك تقول له "كل المخلوقات من طين واحد".. بس بيرفض تماما تقول له "من أصل واحد".. و مقبول عند المادي إنه يقولك: "الطبيعة كونت نفسها بنفسها و المخلوقات و الخلايا المعقدة اتعملت بالصدفة".. بس لو جبتله صورة جبل منحوتة على شكل .قطة.. حايقولك "دا فوتوشوب يا عبيط.. إزاي الشكل المعقد دا يتعمل لوحده"..
........!
اللي عمله الفريقين عبر الوقت سبب خلل رهيب.. لأن بقى فيه النهاردة طلبة في كليات علمية.. مش فاهمة بتدرس إيه.. و شايفة اصطدام وهمي بين العلم اللي بتدرسه و الدين اللي بتعتنقه.. دفعها دفعاً لأنها ترتمي في أحضان الإرهاب.. لأن في رأيهم "الشيطان سيطر على العالم".. و "العلم بقى كفر"...
أنا مش عارف العبط دا حينتهى إمتي.. حتى المدارس بتدرس الداروينية غلط في معظم دول الشرق الأوسط...
عموماً... إيمان "داروين" أو إلحاده مايشغلنيش.. هو مش جاي يخطبني.. اللي يهمني نظريته و علومه..
و المهم إن النظرية خرجت للنور.. و شفنا بالفعل أجداد مشتركة في السجل الحفري.. لأنواع كتير.. زي السحالي و الثعابين.. و الدولفين و الحوت.. و التماسيح و الديناصورات.. و عرفنا إن في أجداد مشتركة داروين ماتكلمش عنها.. و ماتكلمش عن جد الإنسان و لا صفاته.. و سار على حافة الموضوع دا و تفاداه تماما...
بنكرر اللي طرحته النظرية: أنت ماتطورتش لابن عمتك.. انتوا الاتنين قرايب ليكم أصل واحد و أسلاف مشتركة..
بييجي العام 1882.. و بيتوفى "داروين" بفشل في القلب.. و جرى الزمن و دخلنا عصر الميكروسكوب الإليكتروني و الحمض النووي.. و اكشتفنا حاجات أكتر.. و اكتشفنا إننا احتمال مانعرفش شكل الأجداد دول أبدا..
الحقيقة إننا عبر القرون.. فقدنا اجزاء من شفرات حمضنا النووي.. واستبدلناها بغيرها و اتغيرت شفرتنا.. و اتعدلت و اتطورت.. و بقت النهاردة مختلفة كتير عن الأصل.. و جه العلماء في 2015 قالوا لنا: إن عندنا جينات غريبة.. ماورثناهاش عن الأجداد...و إن عندنا حلقة ناقصة بين حمضنا النووي و بين شجرة التطور..
و العلم لسه بيبحث الحلقات المفقودة في كل الأجناس في الجينوم أو في السجل الحفري.. و بيدور عليها.. و يحاول يكمل الشجرة...
من تطبيقات نظرية التطور النهاردة، دراسة البكتيريا اللي طورت مناعة للمضادات الحيوية.. دراسة الآفات الزراعية اللي اتطورت أصبحت بتقاوم المبيدات.. تخليق الإنزيمات..
زرع سلالات العفن و الطحالب اللي بتنتج المضادات الحيوية في المعامل.. و تخليق المضادات الحيوية نفسها في المعمل..
عرفنا إن التدخين و الإشعاع و السموم بتغير ضفيرة الحمض النووي بتاعتنا و بتورث تشوهات لأولادنا.. عرفنا فيروس زي الإيدز بينسخ نفسه و يتكاثر إزاي و بندرس إيه الطرق اللي ممكن نستعملها لمنع عملية دخوله للخلية.. أو وقف عملية النسخ..
صناعة و تخليق النكهات و الألوان الطبيعية اللي بتتحط على أكلك كل يوم.. زراعة الخضار و الفواكه صيف شتا.. القضاء على السرطانات و الفيروسات والتلقيح الصناعي..
وتطبيقات مالهاش حصر في البيولوجيا الجزئية و الأمراض الوراثية...
كان لسه قدام "داروين" كتير يتعلمه و يعرفه.. بس هو اتكلم في حدود علوم عصره.. و نجح.. و حطلنا نواة نبدأ نتحرك منها و نوصل للي وصلناله النهاردة...
-------
مراجع
------
1 - https://goo.gl/sjglRk
2 - https://goo.gl/LpFNvM
3 - https://goo.gl/pXt2Lk
4 - https://goo.gl/WCX6uq
5 - المنشورات سابقة:
I - https://goo.gl/oUPAOO
II - https://goo.gl/WHw9rZ
III - https://goo.gl/P2O1jj
IV - https://goo.gl/x6Iz4l