مع الحلقة الأخيرة من غسيل الدماغ، والبوستات السابقة في المراجع للي يحب يرجع لها..
كان ولاد "ابو اسماعيل" في 2012 طلعوا هاشتاج، بالتعاون مع الهاربة "آيات عرابي" خدته منهم و كملت عليه و سموه #معركة_الوعي..
ليه اختارت أجهزة المخابرات المعادية اللي بتشغل الناس دي الاسم ده؟ عشان مبدأيًا لما بتسمع كلمة "معركة" حواسك بتنتبه.. و لما يضاف إليه "وعي".. بتحس إن فايتك حاجة..
و لأن حاجتنا للتعلم فطرية.. فشحذ انتباهك دا بيخليك مؤهل لاستقبال الطرش اللي حيلقيه عليك المأجور اللي بيكتب.. يقولك بقى السيسي دوبلير.. مرسي راجع.. أي هطلنة..
وعشان الموضوع مش سهل و ضالع فيه أجهزة مخابرات ثقيلة.. بيشغلوا معاهم مؤيدين.. مؤيدين للدولة "يبدو" انهم فكرهم زي فكرك.. بس هو كل وظيفته يملا لك دماغك بهبل من طراز "سامي عنان وشفيق خطة مخابراتية"..
يعني دي خطة انطلت على أجهزة المخابرات الأجنبية و هو كشفها وهو ع الكنبة بيهرش زي النسانيس..!
كوميديا..
بس متبصلهاش كده.. بص لها من منطلق انه بيملا راسك "هراء".. وبيخليك تدخل على الهاشتاج و تقرا اي جهل.. تملا راسك كلام فارغ يعني..
عشان كده بفرح جدًا لما بلاقي ناس بتردد كلام زي "الحروب تنحسم في صدور الرجال" و "مغالطة منطقية" و "تأثير إبليس".. طول ما انت بتتعلم جديد.. و بتردد مصطلحات بتقولها لأول مرة.. و تبحث عن معناها.. يبقى انت على طريق صحيح.. عمر راسك ما تبقى فارغة..
والراس الفارغة سهل اوي تتحشى كفر بالوطن والأهل والدولة و الفضائل..
اللي بيتعمل دا نوع من البروباجاندا..
يعني إيه "بروباجاندا Propaganda"؟
البروباجاندا هي "دعاية موجهة".. هدفها نشر المعلومات بطريقة موجهة أحادية المنظور.. مش بتجيبلك الصورة كاملة..
يعني زي اللي بتلاقيه بيقولك "يا عيني.. شوف في أمريكا.. بينقذوا عصفورة مسكينة وقعت ماعرفش فين".. مابيوضحكلش بالمقابل ان نفس أمريكا دي حرقت اليابانيين أحياء ودمرت العراق وسوريا وليبيا وقتلت ملايين البشر منذ ظهورها لحد النهاردة..
منظور واحد يبعتلك المعلومة خلاله..
في كتاب اسمه "عصر البروباجاندا Age of Propaganda " كتبه اتنين اسمهم "براتكانيس و أرونسون Anthony Pratkanis and Elliot Aronson".. بيركز على شرح القصة دي للي يحب يتوسع فيها..
البروباجاندا بتعتمد على الميديا.. سوشيال ميديا أو وسائل تواصل اجتماعي.. اعلام.. سينما.. اعلانات.. أي ميديا مقرؤة أو مرئية..
""براتكانيس و أرونسون" بقى قالوا إن اللي انت شايفه على الميديا.. في الحقيقة مش هو الواقع..
في واقع تاني أجمل و أحسن و أفضل..
أو على الأقل مختلف..
الميديا بتعتمد على صورة واحدة مش محسوسة.. و مفتقدة لعناصر كتير مش حتشوفها إلا في الطبيعة..
تخيل صورة مكان طبيعي يجنن زي جزر المالديف اللي في الصورة دي.. انت نفسك دلوقتي تتمدد هناك على وش الموج و تسترخي.. بس حتفكر مرتين لما تعرف إنه "في الواقع".. المالديف فيها 26 نوع قروش..
شفت الواقع بيبقى مختلف ازاي؟
الكلام دا مش معناه "ماتستمعش".. بالعكس.. معناه "اعرف و افهم الصح".
فاكر إعلانات بتسخر من "الطريق إلي إيلات"؟ فاكر اعلانات بتسخر من الأب و الأم؟ فاكر إعلانات بتسخر من التجنيد؟
كل دا حصل بالفعل..
زن وتكرار لهراء و توجيه في اتجاه معين.. هدفه في الآخر سلب عقلك.. لو اتسلب عقل حد حتلاقيه في جماعة ارهابية بقول مرسي أمير المدمنين.. دي حقيقة.. معظم دول فعليًا.. بلا عقل..
بخصوص الموضوع دا.. مدير الإف بي آي السابق "روبرت مولر Robert Mueller" أعلن مرة صراحة: "ممكن اللي تكون مصدق أنك شفته بعينيك يكون مش موجود أصلا.. إحنا خلقناه في راسك"...! و يقال - و إن كانت المعلومة دي بلا مرجع - أن التصريح دا كان أحد الأسباب اللي كلفته منصبه في 2013...
يا ترى ابنك اللي انت متأكد من وطنيته و تربيتك.. اللي قاعد على السوشيال ميديا و بيلاقي نفسه من صفحة "تبدو" وطنية بيدخل على هاشتاج لـ"آيات عرابي".. و منه على التليفزيون.. يشوف الجزيرة.. و منه علي الفيسبوك تاني يقولوله "تركيا جنة الله في الأرض" و"بلدك وحشة وفاشلة وعمرها ما حتتقدم".. و لو حب يسمع أغنية يقدموله كآبة و "عفن" و فن هابط..
طيب ايه الاكتئاب دا؟ ما اروح الجنة بقى.. تعالى يا عم اشتغل معاكم في داعش لو عشت أهي فلوس و لو مت حدخل الجنة..
متخيل اللفة بتوصل بيك لفين؟
البروباجاندا تخليك تكسب حرب.. بشرط تعتمد على عناصر ذكية لدعايتك.. مش بهايم زي الي بنشوفهم على السوشيال ميديا والجزيرة ورصد و الخ...
غسيل الدماغ طرق الوقاية منه سهلة مش صعبة.. و اتكلمنا عنها في الجزء التاني..
أعتقد أن ولادنا يستحقوا إننا نحميهم..
------------
مراجع:
------------
1 - منشورات سابقة:
https://www.facebook.com/hammouda.m.hammouda/posts/2006299959382753
-
https://www.facebook.com/hammouda.m.hammouda/posts/2006698239342925
-https://www.facebook.com/hammouda.m.hammouda/posts/2007754199237329
- https://www.facebook.com/hammouda.m.hammouda/posts/2010312918981457
- https://www.facebook.com/hammouda.m.hammouda/posts/2011539222192160
2 - https://bit.ly/2Nnfmwj
3 - Propaganda and psychological warfare:
https://bit.ly/2KNtRrS