السرطان في الأصل مش من الأمراض المعدية، اللي بنتكلم عنها هنا في السلسلة دي حالات نادرة جدا و غير شائعة..
بالتالي تقدر تتعامل مع مريض السرطان عادي، و متحسسوش بالألم و تتعامل معاه على إنه جربان.. هو يستحق مساندتك مش نفورك..
بس النهاردة حنتكلم عن سرطان بينتقل من كائن لكائن.. و من شخص لشخص..
الموضوع دا مختلف عن "العدوى المسببة للسرطان Infectious causes of cancer".. و دي بتبقى عدوى بكتيرية أو فيروسية بتزود فرصك في إنك تصاب بالسرطان، و ممكن لا قدر الله تصيبك به فعلا..
على سبيل المثال "السل أو الدرن Tuberculosis" مرض رئوي بتسببه بكتيريا، بس مع ذلك من أسباب سرطان الرئة..
مرضى فيروس "بي و سي".. احتمال انهم يصابوا بسرطان الكبد، أكتر بـ200 مرة من شخص لم يصب بالفيروسات دي..
"فيروس خلية ميركل التورامي Merkel cell polyomavirus" هو السبب في معظم حالات نوع نادر من سرطانات الجلد الشديدة.. اسمه "سلاطان خلية ميركل Merkel cell carcinoma"..
في حزمة كاملة من الفيروسات اسمها "الفيروسات الورمية Oncoviruses".. بتسبب السرطان..
بكتيريا بتسبب سرطان.. فيروسات بتسبب سرطان.. و حتى الطفيليات.. في منها بيسبب سرطانات.. زي ما البلهارسيا الدموية Schistosoma haematobium" بتسبب في الغالب سرطان المثانة.. و الملاريا في إفريقية بتسبب "بوركت ليمفوما Burkitt's lymphoma"...
بس في حالات شديدة الندرة بيحصل فيها شيء آخر..
بتنتقل خلايا السرطان من جسم مصاب و تعدي جسم سليم..
"انتقال السرطان النسيلي Clonally transmissible cancer".. أو "السرطانات المعدية Contagious cancers" دي سرطانات بتنتقل من جسد حي إلي جسد حي آخر..
الإنتقال دا بيحصل في الكلاب.. و الهامستر.. و بعض المحار، و كلب البحر و"شيطان تسمانيا" اللي في الصورة دا..
ونادرًا في البشر...
ففي العام 2015، في رجل صيني اصيب بعدوى طفيلية بالدودة الشريطية بسبب أكلة "سوشي".. خلايا الدودة دي كانت بتنقسم انقسام مجنون مش طبيعي.. و نقلت "الحدث" دا لخلاياه.. اللي بدأت تنقسم بنفس الطريقة، و تتحول لخلايا سرطانية..
خد بالك هنا مش بنتكلم عن سرطان نشأ من خلايا جسم المريض نفسه.. دا انتقل له من كائن آخر..
و لو حابب تصنف الحالة دي ضمن "انتقال السرطان بسبب الطفيليات".. مفيش أي مشكلة..
في حالة تانية لجراح كان بيعمل عملية لمريض بورم ليفي خبيث، و جرح نفسه دون قصد بالمبضع أثناء الجراحة، و اللي حصل ساعتها إنه بدون قصد دس جوا جسمه هو نفسه بعضًا من خلايا المريض المصابة.. و أصيب بالمرض بالتالي..
و في البشر أيضا حالات اصيبت "بسرطان كابوزي Kaposi's sarcoma" بعد عمليات زراعة أعضاء من متبرعين مصابين بالمرض.. و اتضح لاحقًا إن عملية الزرع، شملت خلايا مصابة.. سببت العدوى..
الحالة نادرة جدًا و بتستلزم إن الخلايا المصابة تدخل جسمك و تبدأ تتعامل مع خلاياك.. و دا مابيحصلكش من التواصل مع مريض سرطان عادي.. ممكن تنام في حضن مريض السرطان على فراش واحد بدون أي مشاكل..
عند الحيوان اللي اسمه "شيطان تسمانيا" ظهر سرطان من النوع المعدي دا "اسمه DFTD" و بدأ يبيد الفصيلة.. لأنه قاتل بنسبة 100%..
و لكن فجأة حصل تطور طبيعي غريب.. و اشتغلت مفاتيح التطور اللي ربنا خلقها في خلايانا، في محاولة لإنقاذ الفصيلة دي..
اتطورت فجأة عند 25% من حيوانات "شيطان تسمانيا"؛ آلية مناعية دفاعية.. بتهاجم السرطان دا.. و تعزل خلاياه.. و تقتله..
النهاردة الطب بيحاول يحط ايده على الآلية دي.. لأنها ممكن تفيد البشر في القضاء على سرطانات كتير.. و الشفاء منها للأبد..
موضوع الخلايا السرطانية اللي بتتمشى من شخص لشخص و تعديه نادر و غريب.. بس مش أغرب من مرض "حساسية الماء" أو مثلا مرض "متلازمة أليس في بلاد العجائب"..
و دول نتكلم عنهم بعدين..
و يبقى للحديث بقية..
-----------
مراجع:
----------
1 - Welsh, James S. (2011). "Contagious cancer". The Oncologist. 16 (1): 1–4. ..
2 - Weiss, Robin A.; Fassati, Ariberto; Murgia, Claudio (21 December 2006)...
3 - Gärtner, Hermine-Valeria; Seidl, Christian; Luckenbach, Christine; Schumm, Georg; Seifried, Erhard; Ritter, Horst; Bültmann, Burkhard (1996). "Genetic analysis of a sarcoma accidentally transplanted from a patient to a surgeon". New England Journal of Medicine. 335 (20): 1494–1497..
4 - Rapid evolutionary response to a transmissible cancer in Tasmanian devils:
https://www.nature.com/articles/ncomms12684
5 - Transmissible cancers, are they more common than thought?
https://www.ncbi.nlm.nih.gov/pmc/articles/PMC4869404/
6 - منشورات سابقة:
- https://goo.gl/ZZir6n